Dakshinamurti Stotram

 दक्षिणामूर्तिस्तोत्रम् 
आधिक्यमस्मात् जगतः आधिगन्तुं
     विश्वादिकोक्तेः विषयं प्रपद्ये ।
आद्यक्षणातङ्कनिवर्तनाय
     प्रसूतिमत्तारहितम् प्रपद्ये ॥ १॥

कालग्रहग्राहभयापनुत्यै
     कृतान्तशिक्षाकृतिनं प्रपद्ये ।
श‍ृङ्गारभूजृम्भणवारणाय
     प्रसून कोदण्ड रिपुं प्रपद्ये ।
विनेतुमार्तिं विषयाध्व जन्यां
     वटद्रुमाधोवसतिम् प्रपद्ये ॥ २॥

मोहातिरेकस्मयमोषणाय
     पादार्दितापस्मरणं प्रपद्ये ।
कर्माटवीपाटन कौतुकेन
     पाणौ विराजत्परशुम् प्रपद्ये ॥ ३॥

विशुद्धविज्ञानविकासहेतोः
     प्रबोधमुद्राभरितम् प्रपद्ये ।
तापत्रयाटोपसमापनाय
     प्राळेयधामाभरणं प्रपद्ये ॥ ४॥

वैमल्यसम्पादनवाञ्छया अहं
     मन्दाकिनीमाल्यधरं प्रपद्ये ।
प्रसादलाभं परमीहमानः
     मुग्धस्मितोल्लासिमुखं प्रपद्ये ॥ ५॥

व्यथामशेषां अपनेतुकामः
     नाम्ना मृडम् नाथमहम् प्रपद्ये ।
अनाद्यविद्याशमनं प्रपद्ये  this line was composed by Maha Swamigal
     नाम्ना महिम्ना अपि च शङ्करं त्वाम् ॥ ६॥

सर्वज्ञतासारभृतं प्रपद्ये
     निस्सीमसौहित्यनिधिं प्रपद्ये ।
अनादिबोधायतनं प्रपद्ये
     स्वतन्त्रतायाः सदनं प्रपद्ये ॥ ७॥

हरं प्रपद्ये अहं अलुप्तशक्तिं
     अमेयसामर्थ्यमहं प्रपद्ये ।
शिवं प्रपद्ये जनकं विधातुः
     ईशं  हृषीकेशगुरुं प्रपद्ये ॥ ८॥

गवं प्रपत्तिं ईशानं तन्वते तत्त्वदर्शिनः ।
तत्क्रतुन्यायरसिकाः तत्तादृशफलाप्तये ॥ ९॥

नमः श्री दक्षिणामूर्तये ।

इति समरपुङ्गवदीक्षितेन्द्रविरचितं दक्षिणामूर्तिस्तोत्रं सम्पूर्णम् ।


Source: yAtrAprabandha by samarapungavadIkShitendraH