%@@1
% File name             : guruagiitaa.itx
%--------------------------------------------
% Text title            : gurugItA shorter version
% Author                : Vyasa (by tradition) author of Puranas
% Language              : sanskrit
% Subject               : religion
% Description/comments  :
% Transliterated by     : Kapila and Mrs. Shankaran achintya at ican.net
% Proofread by          : Sunder Hattangadi(sunderh at hotmail.com), Kirk Wortman
% Latest update         : 7/22/98, 11/22/2006
% Send corrections to   : sanskrit@cheerful.com
% Special Instructions  : i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access           :
% http://sanskritdocuments.org/
% http://sanskrit.gde.to
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
%@@2
%
% Please ignore the following commands upto #indian and others with \ mark,
% which are needed for devanaagarii output and formatting.
%--------------------------------------------------------


\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. guru gItA - short version  ..}##
\itxtitle{.. shrIgurugItA laghu ..}##\endtitles ##
                 .. shrI ..
          .. shrI gurupAdukA pa~nchakam ..
OM namo gurubhyo gurupAdukAbhyo namaH parebhyaH parapAdukAbhyaH .
AchArya siddheshvara pAdukAbhyo namo namaH shrI gurupAdukAbhyaH ..
ai~NkAra hR^iI~NkAra rahasya yukta
       shrI~NkAra gUDhArthamahAvibhUtyA .. 1..
o~NkAra marma pratipAdinIbhyAM
       namo namaH shrI gurupAdukAbhyAm .. 2..
hotrAgni hautrAgni haviShyahotra
       homAdi sarvAkR^iti bhAsamAnAm .
yad brahma tadbodha vitAriNIbhyAM
       namo namaH shrI gurupAdukAbhyAm .. 3..
kAmAdi sarpavraja gAruDAbhyAM
       viveka vairAgya nidhi pradAbhyAm .
bodha pradAbhyAM dR^itamokShadAbhyAM
       namo namaH shrI gurupAdukAbhyAm .. 4..
ananta sa.nsAra samudra tAra
       naukAyitAbhyAM sthirabhaktidAbhyAm .
jADyAbdhi sa.nshoShaNa vADavAbhyAM
       namo namaH shrI gurupAdukAbhyAm .. 5..
          .. OM shAntiH shAntiH shAntiH ..
          .. atha shrI gurugItA prAraMbhaH ..
shrIgaNeshAya namaH . shrIsarasvatyai namaH . shrIgurubhyo namaH .
.. OM ..
asya shrI gurugItA stotramantrasya .
bhagavAn sadAshiva R^iShiH .
nAnAvidhAni ChandA.nsi .
shrI guruparamAtmA devatA .
haM bIjam .
saH shaktiH .
kroM kIlakam .
shrI guruprasAdasiddhyarthe jape viniyogaH ..
          .. atha dhyAnam ..
ha.nsAbhyAM parivR^ittapatrakamalairdivyairjagatkAraNair \-
vishvotkIrNamanekadehanilayaiH svachChandamAtmechChayA .
taddyotaM padashAMbhavaM tu charaNaM dIpA~NkuragrAhiNaM
pratyakShAkSharavigrahaM gurupadaM dhyAyedvibhuM shAshvatam ..
mama chaturvidhapuruShArthasiddhyarthe jape viniyogaH .
          .. atha shrIgurugItA ..
sUta uvAcha \-
kailAsa shikhare ramye bhaktisandhAnanAyakam .
praNamya pArvatI bhaktyA sha~NkaraM paryapR^ichChata .. 1..
shrI devyuvAcha \-
OM namo devadevesha parAtparajagadguro .
sadAshiva mahAdeva gurudIkShAM pradehi me .. 2..
kena mArgeNa bho svAmin dehi brahmamayo bhavet .
tvaM kR^ipAM kuru me svAmin namAmi charaNau tava .. 3..
Ishvara uvAcha \-
mamarUpAsi devi tvaM tvatprItyarthaM vadAmyaham .
lokopakArakaH prashno na kenApi kR^itaH purA .. 4..
durlabhaM triShu lokeShu tachChR^iNuShva vadAmyaham .
guruM vinA brahma nAnyatsatyaM satyaM varAnane .. 5..
vedashAstrapurANAni itihAsAdikAni cha .
mantrayantrAdividyAshcha smR^itiruchchATanAdikam .. 6..
shaivashAktAgamAdIni anyAni vividhAni cha .
apabhra.nshakarANIha jIvAnAM bhrAntachetasAm .. 7..
yaj~no vrataM tapo dAnaM japastIrthaM tathaiva cha .
gurutattvamavij~nAya mUDhAste charate janAH .. 8..
gururbuddhyAtmano nAnyat satyaM satyaM na sa.nshayaH .
tallAbhArthaM prayatnastu kartavyo hi manIShibhiH .. 9..
gUDha vidyA jaganmAyA dehe chAj~nAnasaMbhavA .
udayo yatprakAshena gurushabdena kathyate .. 10..
sarvapApavishuddhAtmA shrIguroH pAdasevanAt .
dehI brahma bhavedyasmAttvatkR^ipArthaM vadAmi te .. 11..
gurupAdAMbujaM smR^itvA jalaM shirasi dhArayet .
sarvatIrthAvagAhasya saMprApnoti phalaM naraH .. 12..
shoShaNaM pApapa~Nkasya dIpanaM j~nAnatejasAm .
gurupAdodakaM samyak sa.nsArArNavatArakam .. 13..
aj~nAnamUlaharaNaM janma karma nivAraNam .
j~nAnavairAgyasiddhyarthaM gurupAdodakaM pibet .. 14..
guroH pAdodakaM pItvA guroruchChiShTabhojanam .
gurumUrteH sadA dhyAnaM gurumantra.n sadA japet .. 15..
kAshI kShetraM tannivAso jAhnavI charaNodakam .
gururvishveshvaraH sAkShAt tArakaM brahma nishchitam .. 16..
guroH pAdodakaM yattu gayA.asau so.akShayo vaTaH .
tIrtharAjaH prayAgashcha gurumUrtyai namo namaH .. 17..
gurumUrtiM smarennityaM gurunAma sadA japet .
gurorAj~nAM prakurvIta guroranyanna bhAvayet .. 18..
guruvaktrasthitaM brahma prApyate tatprasAdataH .
gurordhyAnaM sadA kuryAtkulastrI svapateryathA .. 19..
svAshramaM cha svajAtiM cha svakIrtipuShTivardhanam .
etatsarvaM parityajya guroranyanna bhAvayet .. 20..
ananyAshcintayanto mAM sulabhaM paramaM padam .
tasmAt sarvaprayatnena gurorArAdhanaM kuru .. 21..
trailokye sphuTavaktAro devAdyasurapannagAH .
guruvaktrasthitA vidyA gurubhaktyA tu labhyate .. 22..
gukArastvandhakArashcha rukArasteja uchyate .
aj~nAnagrAsakaM brahma gurureva na sa.nshayaH .. 23..
gukAraH prathamo varNo mAyAdiguNabhAsakaH .
rukAro dvitIyo brahma mAyA bhrAnti vinAshanam .. 24..
evaM gurupadaM shreShThaM devAnAmapi durlabham .
hAhA hUhU gaNaishchaiva gandharvaishcha prapUjyate .. 25..
dhruvaM teShAM cha sarveShAM nAsti tattvaM guroH param .
AsanaM shayanaM vastraM bhUShaNaM vAhanAdikam .. 26..
sAdhakena pradAtavya.n gurusa.ntoShakArakam .
gurorArAdhanaM kAryaM svajIvitvaM nivedayet .. 27..
karmaNA manasA vAchA nityamArAdhayedgurum .
dIrghadaNDaM namaskR^itya nirlajjo gurusannidhau .. 28..
sharIramindriyaM prANAM sadgurubhyo nivedayet .
AtmadArAdikaM sarvaM sadgurubhyo nivedayet .. 29..
kR^imikITabhasmaviShThA durgandhimalamUtrakam .
shleShmaraktaM tvachA mA.nsaM va~nchayenna varAnane .. 30..
sa.nsAravR^ikShamArUDhAH patanto narakArNave .
yena chaivoddhR^itAH sarve tasmai shrIgurave namaH .. 31..
gururbrahmA gururviShNurgururdevo maheshvaraH .
gurureva parabrahma tasmai shrIgurave namaH .. 32..
hetave jagatAmeva sa.nsArArNavasetave .
prabhave sarvavidyAnA.n shambhave gurave namaH .. 33..
aj~nAnatimirAndhasya j~nAnA~njanashalAkayA .
chakShurunmIlitaM yena tasmai shrIgurave namaH .. 34..
tvaM pitA tva.n cha me mAtA tvaM bandhustva.n cha devatA .
sa.nsArapratibodhArthaM tasmai shrIgurave namaH .. 35..
yatsatyena jagatsatyaM yatprakAshena bhAti tat .
yadAnandena nandanti tasmai shrIgurave namaH .. 36..
yasya sthityA satyamidaM yadbhAti bhAnurUpataH .
priyaM putradi yatprItyA tasmai shrIgurave namaH .. 37..
yena chetayate hIdaM chittaM chetayate na yam .
jAgratsvapnasuShuptyAdi tasmai shrIgurave namaH .. 38..
yasya j~nAnAdidaM vishvaM na dR^ishyaM bhinnabhedataH .
sadekarUparUpAya tasmai shrIgurave namaH .. 39..
yasyAmataM tasya mataM mataM yasya na veda saH .
ananyabhAva bhAvAya tasmai shrIgurave namaH .. 40..
yasya kAraNarUpasya kAryarUpeNa bhAti yat .
kAryakAraNarUpAya tasmai shrIgurave namaH .. 41..
nAnArUpamidaM sarvaM na kenApyasti bhinnatA .
kAryakAraNatA chaiva tasmai shrIgurave namaH .. 42..
yada~NghrikamaladvandvaM dvandvatApanivArakam .
tArakaM sarvadA.apadbhyaH shrIguruM praNamAmyaham .. 43..
shive kruddhe gurustrAtA gurau kruddhe shivo na hi .
tasmAt sarvaprayatnena shrIguruM sharaNa.n vrajet .. 44..
vande gurupadadvandvaM vA~Nmanashchittagocharam
shvetaraktaprabhAbhinnaM shivashaktyAtmakaM param .. 45..
gukAraM cha guNAtItaM rukAraM rUpavarjitam .
guNAtItasvarUpaM cha yo dadyAtsa guruH smR^itaH .. 46..
atrinetraH sarvasAkShI achaturbAhurachyutaH .
achaturvadano brahmA shrIguruH kathitaH priye .. 47..
ayaM mayA~njalirbaddho dayA sAgaravR^iddhaye .
yadanugrahato jantushchitrasa.nsAramuktibhAk .. 48..
shrIguroH paramaM rUpaM vivekachakShuSho.amR^itam .
mandabhAgyA na pashyanti andhAH sUryodayaM yathA .. 49..
shrInAthacharaNadvandvaM yasyAM dishi virAjate .
tasyai dishe namaskuryAd bhaktyA pratidinaM priye .. 50..
tasyai dishe satatama~njalireSha Arye
     prakShipyate mukharito madhupairbudhaishcha .
jAgarti yatra bhagavAnguruchakravartI
     vishvodaya pralayanATakanityasAkShI .. 51..
shrInAthAdi gurutrayaM gaNapatiM pIThatrayaM bhairavaM
     siddhaughaM baTukatrayaM padayugaM dUtIkramaM maNDalam .
vIrAndvyaShTachatuShka ShaShTi navaka.n vIrAvalI pa~nchakaM
     shrImanmAlinimantrarAjasahita.n vande gurormaNDalam .. 52..
abhyastaiH sakalaiH sudIrghamanilairvyAdhipradairduShkaraiH
     prANAyAmashatairanekakaraNairduHkhAtmakairdurjayaiH .
yasminnabhyudite vinashyati balI vAyuH svayaM tatkShaNAt.h
     prAptuM tatsahajaM svabhAvamanisha.n sevadhvamekaM gurum .. 53..
svadeshikasyaiva sharIrachintanaM
     bhavedanantasya shivasya chintanam .
svadeshikasyaiva cha nAmakIrtanaM
     bhavedanantasya shivasya kIrtanam .. 54..
yatpAdareNukaNikA kApi sa.nsAravAridheH .
setubandhAyate nAthaM deshikaM tamupAsmahe .. 55..
yasmAdanugraha.n labdhvA mahadaj~nAnamutsR^ijet .
tasmai shrIdeshikendrAya namashchAbhIShTasiddhaye .. 56..
pAdAbja.n sarvasa.nsAradAvAnalavinAshakam .
brahmarandhre sitAmbhojamadhyasthaM chandramaNDale .. 57..
akathAditrirekhAbje sahasradalamaNDale .
ha.nsapArshvatrikoNe cha smarettanmadhyaga.n gurum .. 58..
sakalabhuvanasR^iShTiH kalpitAsheShapuShTiH
     nikhilanigamadR^iShTiH sampadAM vyarthadR^iShTiH .
avaguNaparimArShTistatpadArthaikadR^iShTiH
     bhava guNaparameShTirmokShamArgaikadR^iShTiH .. 59..
sakalabhuvanara~NgasthApanA stambhayaShTiH
     sakaruNarasavR^iShTistattvamAlAsamaShTiH .
sakalasamayasR^iShTiH sachchidAnandadR^iShTir\-
     nivasatu mayi nityaM shrIgurordivyadR^iShTiH .. 60..
agnishuddhasama.n tAta jvAlA parichakAdhiyA .
mantrarAjamimaM manye.aharnishaM pAtu mR^ityutaH .. 61..
tadejati tannaijati taddUre tatsamIpake .
tadantarasya sarvasya tadu sarvasya bAhyataH .. 62..
ajo.ahamajaro.ahaM cha anAdinidhanaH svayam .
avikArashchidAnanda aNIyAnmahato mahAn .. 63..
apUrvANAM paraM nityaM svayaMjyotirnirAmayam .
virajaM paramAkAshaM dhruvamAnandamavyayam .. 64..
shrutiH pratyakShamaitihyamanumAnashchatuShTayam .
yasya chAtmatapo veda deshikaM cha sadA smaret .. 65..
manu~ncha yadbhavaM kAryaM tadvadAmi mahAmate .
sAdhutvaM cha mayA dR^iShTvA tvayi tiShThati sAMpratam .. 66..
akhaNDamaNDalAkAraM vyApta.n yena charAcharam .
tatpadaM darshitaM yena tasmai shrIgurave namaH .. 67..
sarvashrutishiroratnavirAjitapadAmbujaH .
vedAntAmbujasUryo yastasmai shrIgurave namaH .. 68..
yasya smaraNamAtreNa j~nAnamutpadyate svayam .
ya eva sarva saMprAptistasmai shrIgurave namaH .. 69..
chaitanya.n shAshvata.n shAnta.n vyomAtItaM nira~njanam .
nAdabindukalAtItaM tasmai shrIgurave namaH .. 70..
sthAvaraM ja~NgamaM chaiva tathA chaiva charAcharam .
vyAptaM yena jagatsarvaM tasmai shrIgurave namaH .. 71..
j~nAnashaktisamArUDhastattvamAlA vibhUShitaH .
bhuktimuktipradAtA yastasmai shrIgurave namaH .. 72..
anekajanmasamprAptasarvakarmavidAhine .
svAtmaj~nAnaprabhAveNa tasmai shrIgurave namaH .. 73..
na guroradhikaM tattvaM na guroradhikaM tapaH .
tattvaM j~nAnAtparaM nAsti tasmai shrIgurave namaH .. 74..
mannAthaH shrIjagannAtho madgurustrijagadguruH .
mamAtmA sarvabhUtAtmA tasmai shrIgurave namaH .. 75..
dhyAnamUla.n gurormUrtiH pUjAmUla.n guroH padam .
mantramUla.n gurorvAkyaM mokShamUla.n guroH kR^ipA .. 76..
gururAdiranAdishcha guruH paramadaivatam .
guroH parataraM nAsti tasmai shrIgurave namaH .. 77..
saptasAgaraparyanta tIrthasnAnAdikaM phalam .
gurora~NghripayobindusahasrA.nshe na durlabham .. 78..
harau ruShTe gurustrAtA gurau ruShTe na kashchana .
tasmAtsarvaprayatnena shrIguru.n sharaNa.n vrajet .. 79..
gurureva jagatsarvaM brahmaviShNushivAtmakam .
guroH parataraM nAsti tasmAtsaMpUjayedgurum .. 80..
j~nAnaM vij~nAnasahita.n labhyate gurubhaktitaH .
guroH parataraM nAsti dhyeyo.asau gurumArgibhiH .. 81..
yasmAtparatara.n nAsti neti netIti vai shrutiH .
manasA vachasA chaiva nityamArAdhayedgurum .. 82..
guroH kR^ipA prasAdena brahmaviShNusadAshivAH .
samarthAH prabhavAdau cha kevalaM gurusevayA .. 83..
devakinnaragandharvAH pitaro yakShachAraNAH .
munayo.api na jAnanti gurushushrUShaNe vidhim .. 84..
mahAha~NkAragarveNa tapovidyAbalAnvitAH .
sa.nsArakuharAvarte ghaTayantre yathA ghaTAH .. 85..
na muktA devagandharvAH pitaro yakShakinnarAH .
R^iShayaH sarvasiddhAshcha gurusevA parA~NmukhAH .. 86..
dhyAnaM shR^iNu mahAdevi sarvAnandapradAyakam .
sarvasaukhyakara.n nityaM bhuktimuktividhAyakam .. 87..
shrImatparabrahma guruM smarAmi
     shrImatparabrahma guruM vadAmi .
shrImatparabrahma guruM namAmi
     shrImatparabrahma guruM bhajAmi .. 88..
brahmAnandaM paramasukhada.n kevalaM j~nAnamUrtiM
     dvandvAtIta.n gaganasadR^isha.n tattvamasyAdilakShyam .
eka.n nitya.n vimalamachala.n sarvadhIsAkShibhUtaM
     bhAvAtIta.n triguNarahita.n sadguru.n ta.n namAmi .. 89..
nityaM shuddhaM nirAbhAsaM nirAkAraM nira~njanam .
nityabodhaM chidAnandaM guruM brahma namAmyaham .. 90..
hR^idambuje karNikamadhyasa.nsthe
     si.nhAsane sa.nsthitadivyamUrtim .
dhyAyedguruM chandrakalAprakAshaM
     chitpustakAbhIShTavaraM dadhAnam .. 91..
shvetAmbaraM shvetavilepapuShpaM
     muktAvibhUShaM muditaM dvinetram .
vAmA~NkapIThasthitadivyashaktiM
     mandasmitaM sAndrakR^ipAnidhAnam .. 92..
AnandamAnandakaraM prasannaM
     j~nAnasvarUpaM nijabodhayuktam .
yogIndramIDyaM bhavarogavaidyaM
     shrImadguruM nityamahaM namAmi .. 93..
yasminsR^iShTisthitidhva.nsanigrahAnugrahAtmakam .
kR^ityaM pa~nchavidhaM shashvadbhAsate taM namAmyaham .. 94..
prAtaH shirasi shuklAbje  dvinetraM dvibhujaM gurum .
varAbhayayutaM shAntaM smarettaM nAmapUrvakam .. 95..
na guroradhikaM na guroradhikaM
     na guroradhikaM na guroradhikam .
shivashAsanataH shivashAsanataH
     shivashAsanataH shivashAsanataH .. 96..
idameva shivaM tvidameva shivaM
     tvidameva shivaM tvidameva shivam .
mama shAsanato mama shAsanato
     mama shAsanato mama shAsanataH .. 97..
eva.nvidha.n guruM dhyAtvA j~nAnamutpadyate svayam .
tatsadguruprasAdena mukto.ahamiti bhAvayet .. 98..
gurudarshitamArgeNa manaHshuddhiM tu kArayet .
anityaM khaNDayetsarvaM yatki~nchidAtmagocharam .. 99..
j~neyaM sarvasvarUpaM cha j~nAnaM cha mana uchyate .
j~nAnaM j~neyasamaM kuryAn nAnyaH panthA dvitIyakaH .. 100..
evaM shrutvA mahAdevi gurunindAM karoti yaH .
sa yAti narakaM ghoraM yAvachchandradivAkarau .. 101..
yAvatkalpAntako dehastAvadeva guruM smaret .
gurulopo na kartavyaH svachChando yadi vA bhavet .. 102..
hu~NkAreNa na vaktavyaM prAj~naiH shiShyaiH katha~nchana .
guroragre na vaktavyamasatyaM cha kadAchana .. 103..
guruM tvaMkR^itya huMkR^itya guruM nirjitya vAdataH .
araNye nirjale deshe sa bhavedbrahmarAkShasaH .. 104..
munibhiH pannagairvA.api surairvA shApito yadi .
kAlamR^ityubhayAdvApi gurU rakShati pArvati .. 105..
ashaktA hi surAdyAshcha ashaktA munayastathA .
gurushApena te shIghraM kShayaM yAnti na sa.nshayaH .. 106..
mantrarAjamidaM devi gururityakSharadvayam .
smR^itivedArthavAkyena guruH sAkShAtparaM padam .. 107..
shrutismR^itI avij~nAya kevalaM gurusevakAH .
te vai sa.nnyAsinaH proktA itare veShadhAriNaH .. 108..
nityaM brahma nirAkAraM nirguNaM bodhayet param .
sarvaM brahma nirAbhAsaM dIpo dIpAntaraM yathA .. 109..
guroH kR^ipAprasAdena AtmArAmaM nirIkShayet .
anena gurumArgeNa svAtmaj~nAnaM pravartate .. 110..
Abrahma staMbaparyantaM paramAtmasvarUpakam .
sthAvaraM ja~NgamaM chaiva praNamAmi jaganmayam .. 111..
vande.ahaM sachchidAnandaM bhedAtItaM sadA gurum .
nityaM pUrNaM nirAkAraM nirguNaM svAtmasa.nsthitam .. 112..
parAtparataraM dhyeyaM nityamAnandakArakam .
hR^idayAkAshamadhyasthaM shuddhasphaTikasannibham .. 113..
sphaTikapratimArUpaM dR^ishyate darpaNe yathA .
tathAtmani chidAkAramAnandaM so.ahamityuta .. 114..
a~NguShThamAtrapuruShaM dhyAyatashchinmayaM hR^idi .
tatra sphurati bhAvo yaH shR^iNu taM kathayAmyaham .. 115..
agocharaM tathA.agamyaM nAmarUpavivarjitam .
niHshabdaM tadvijAnIyAt svabhAvaM brahma pArvati .. 116..
yathA gandhaH svabhAvena karpUrakusumAdiShu .
shItoShNAdi svabhAvena tathA brahma cha shAshvatam .. 117..
svayaM tathAvidho bhUtvA sthAtavyaM yatrakutrachit .
kITabhramaravattatra dhyAnaM bhavati tAdR^isham .. 118..
gurudhyAnaM tathA kR^itvA svayaM brahmamayo bhavet .
piNDe pade tathA rUpe mukto.asau nAtra sa.nshayaH .. 119..
shrI pArvatyuvAcha \-
piNDa.n ki.n tu mahAdeva pada.n ki.n samudAhR^itam .
rUpAtIta.n cha rUpa.n kimetadAkhyAhi sha~Nkara .. 120..
shrI mahAdeva uvAcha \-
piNDa.n kuNDalinIshaktiH pada.n ha.nsamudAhR^itam .
rUpa.n binduriti j~neya.n rUpAtIta.n nira~njanam .. 121..
piNDe muktA pade muktA rUpe muktA varAnane .
rUpAtIte tu ye muktAste muktA nAtra sa.nshayaH .. 122..
svayaM sarvamayo bhUtvA paraM tattvaM vilokayet .
parAtparataraM nAnyat sarvametannirAlayam .. 123..
tasyAvalokanaM prApya sarvasa~NgavivarjitaH .
ekAkI niHspR^ihaH shAntastiShThAsettatprasAdataH .. 124..
labdhaM vA.atha na labdhaM vA svalpaM vA bahulaM tathA .
niShkAmenaiva bhoktavyaM sadA sa.ntuShTachetasA .. 125..
sarvaj~napadamityAhurdehI sarvamayo budhAH .
sadAnandaH sadA shAnto ramate yatrakutrachit .. 126..
yatraiva tiShThate so.api sa deshaH puNyabhAjanam .
muktasya lakShaNaM devi tavAgre kathitaM mayA .. 127..
upadeshastathA devi gurumArgeNa muktidaH .
gurubhaktistathA dhyAnaM sakalaM tava kIrtitam .. 128..
anena yadbhavetkAryaM tadvadAmi mahAmate .
lokopakArakaM devi laukikaM tu na bhAvayet .. 129..
laukikAtkarmaNo yAnti j~nAnahInA bhavArNavam .
j~nAnI tu bhAvayetsarvaM karma niShkarma yatkR^itam .. 130..
idaM tu bhaktibhAvena paThate shR^iNute yadi .
likhitvA tatpradAtavyaM tatsarva.n saphala.n bhavet .. 131..
gurugItAtmakaM devi shuddhatattvaM mayoditam .
bhavavyAdhivinAshArthaM svayameva japetsadA .. 132..
gurugItAkSharaikaM tu mantrarAjamimaM japet .
anye cha vividhA mantrAH kalAM nArhanti ShoDashIm .. 133..
anantaphalamApnoti gurugItAjapena tu .
sarvapApaprashamanaM sarvadAridryanAshanam .. 134..
kAlamR^ityubhayaharaM sarvasa~NkaTanAshanam .
yakSharAkShasabhUtAnAM choravyAghrabhayApaham .. 135..
mahAvyAdhiharaM sarvaM vibhUtisiddhidaM bhavet .
athavA mohanaM vashyaM svayameva japetsadA .. 136..
vastrAsane cha dAridrya.n pAShANe rogasa.nbhavaH .
modinyA.n duHkhamApnoti kAShThe bhavati niShphalam .. 137..
kR^iShNAjine j~nAnasiddhirmokShashrI vyAghracharmaNi .
kushAsane j~nAnasiddhiH sarvasiddhistu ka.nbale .. 138..
kushairvA dUrvayA devi Asane shubhrakaMbale .
upavishya tato devi japedekAgramAnasaH .. 139..
dhyeyaM shuklaM cha shAntyarthaM vashye raktAsanaM priye .
abhichAre kR^iShNavarNaM pItavarNaM dhanAgame .. 140..
uttare shAntikAmastu vashye pUrvamukho japet .
dakShiNe mAraNaM proktaM pashchime cha dhanAgamaH .. 141..
mohanaM sarvabhUtAnAM bandhamokShakaraM bhavet .
devarAjapriyakaraM sarvalokavashaM bhavet .. 142..
sarveShAM staMbhanakaraM guNAnAM cha vivardhanam .
duShkarmanAshanaM chaiva sukarmasiddhidaM bhavet .. 143..
asiddhaM sAdhayetkAryaM navagrahabhayApaham .
duHsvapnanAshanaM chaiva susvapnaphaladAyakam .. 144..
sarvashAntikaraM nityaM tathA vandhyAsuputradam .
avaidhavyakaraM strINAM saubhAgyadAyakaM sadA .. 145..
AyurArogyamaishvaryaputrapautrapravardhanam .
akAmataH strI vidhavA japAnmokShamavApnuyAt .. 146..
avaidhavyaM sakAmA tu labhate chAnyajanmani .
sarvaduHkhabhayaM vighnaM nAshayechChApahArakam .. 147..
sarvabAdhAprashamanaM dharmArthakAmamokShadam .
yaM yaM chintayate kAmaM taM taM prApnoti nishchitam .. 148..
kAmitasya kAmadhenuH kalpanAkalpapAdapaH .
chintAmaNishchintitasya sarvama~NgalakArakam .. 149..
mokShaheturjapennityaM mokShashriyamavApnuyAt .
bhogakAmo japedyo vai tasya kAmaphalapradam .. 150..
japechChAktashcha saurashcha gANapatyashcha vaiShNavaH .
shaivashcha siddhidaM devi satyaM satyaM na sa.nshayaH .. 151..
atha kAmyajape sthAnaM kathayAmi varAnane .
sAgare vA sarittIre.athavA hariharAlaye .. 152..
shaktidevAlaye goShThe sarvadevAlaye shubhe .
vaTe cha dhAtrImUle vA maThe vR^indAvane tathA .. 153..
pavitre nirmale sthAne nityAnuShThAnato.api vA .
nirvedanena maunena japametaM samAcharet .. 154..
shmashAne bhayabhUmau tu vaTamUlAntike tathA .
siddhyanti dhauttare mUle chUtavR^ikShasya sannidhau .. 155..
guruputro varaM mUrkhastasya siddhyanti nAnyathA .
shubhakarmANi sarvANi dIkShAvratatapA.nsi cha .. 156..
sa.nsAramalanAshArthaM bhavapAshanivR^ittaye .
gurugItAmbhasi snAnaM tattvaj~naH kurute sadA .. 157..
sa eva cha guruH sAkShAt sadA sadbrahmavittamaH .
tasya sthAnAni sarvANi pavitrANi na sa.nshayaH .. 158..
sarvashuddhaH pavitro.asau svabhAvAdyatra tiShThati .
tatra devagaNAH sarve kShetre pIThe vasanti hi .. 159..
AsanasthaH shayAno vA gachCha.nstiShThan vadannapi .
ashvArUDho gajArUDhaH supto vA jAgR^ito.api vA .. 160..
shuchiShmA.nshcha sadA j~nAnI gurugItAjapena tu .
tasya darshanamAtreNa punarjanma na vidyate .. 161..
samudre cha yathA toyaM kShIre kShIraM ghR^ite ghR^itam .
bhinne kuMbhe yathAkAshastathAtmA paramAtmani .. 162..
tathaiva j~nAnI jIvAtmA paramAtmani lIyate .
aikyena ramate j~nAnI yatra tatra divAnisham .. 163..
eva.nvidho mahAmuktaH sarvadA vartate budhaH .
tasya sarvaprayatnena bhAvabhaktiM karoti yaH .. 164..
sarvasandeharahito mukto bhavati pArvati .
bhuktimuktidvayaM tasya jihvAgre cha sarasvatI .. 165..
anena prANinaH sarve gurugItA japena tu .
sarvasiddhiM prApnuvanti bhuktiM muktiM na sa.nshayaH .. 166..
satyaM satyaM punaH satyaM dharmyaM sA~NkhyaM mayoditam .
gurugItAsamaM nAsti satyaM satyaM varAnane .. 167..
eko deva ekadharma ekaniShThA para.n tapaH .
guroH parataraM nAnyannAsti tattvaM guroH param .. 168..
mAtA dhanyA pitA dhanyo dhanyo va.nshaH kulaM tathA .
dhanyA cha vasudhA devi gurubhaktiH sudurlabhA .. 169..
sharIramindriyaM prANAshchArthaH svajanabAndhavAH .
mAtA pitA kulaM devi gurureva na sa.nshayaH .. 170..
AkalpajanmanA koTyA japavratatapaHkriyAH .
tatsarvaM saphalaM devi gurusa.ntoShamAtrataH .. 171..
vidyAtapobalenaiva mandabhAgyAshcha ye narAH .
gurusevA.n na kurvanti satyaM satyaM varAnane .. 172..
brahmaviShNumaheshAshcha devarShipitR^ikinnarAH .
siddhachAraNayakShAshcha anye.api munayo janAH .. 173..
gurubhAvaH paraM tIrthamanyatIrthaM nirarthakam .
sarvatIrthAshrayaM devi pAdA~NguShThaM cha vartate .. 174..
japena jayamApnoti chAnantaphalamApnuyAt .
hInakarma tyajansarvaM sthAnAni chAdhamAni cha .. 175..
japa.n hInAsana.n kurvanhInakarmaphalapradam .
gurugItAM prayANe vA sa~NgrAme ripusa~NkaTe .. 176..
japa~njayamavApnoti maraNe muktidAyakam .
sarvakarma cha sarvatra guruputrasya siddhyati .. 177..
idaM rahasyaM no vAchyaM tavAgre kathitaM mayA .
sugopyaM cha prayatnena mama tvaM cha priyA tviti .. 178..
svAmi mukhyagaNeshAdi viShNvAdInAM cha pArvati .
manasApi na vaktavyaM satyaM satyaM vadAmyaham .. 179..
atIvapakvachittAya shraddhAbhaktiyutAya cha .
pravaktavyamidaM devi mamAtmA.asi sadA priye .. 180..
abhakte va~nchake dhUrte pAkhaNDe nAstike nare .
manasApi na vaktavyA gurugItA kadAchana .. 181..
saMsArasAgarasamuddharaNaikamantraM
     brahmAdidevamunipUjitasiddhamantram ..
dAridryaduHkhabhavarogavinAshamantraM
     vande mahAbhayaharaM gururAjamantram .. 182..
.. iti shrIska.ndapurANe uttarakha.nDe IshvarapArvatI sa.nvAde
gurugItA samApta ..
.. shrIgurudattAtreyArpaNamastu ..
##
Transliterated by Kapila Shankaran
%%The shorter version was done by Shankarans (Kapila and her mother).
%%Then, Swami Vishvarupananda sent copy of the longer version
%%(now out of print).
%% gurugita.* is longer version
%% gurugiitaa.* is shorter version
%% Kirk Wortman corrected and added four verses commonly available.
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
{\rm http://sanskritdocuments.org}
\end{document}