% Text title : mahagaNapatistotra % File name : mahagaNapatistotra.itx % Category : ganesha, stotra % Location : doc\_ganesha % Transliterated by : Dhaval Patel drdhaval2785 at gmail.com % Proofread by : Dhaval Patel drdhaval2785 at gmail.com % Latest update : September 15, 2014 % Send corrections to : Sanskrit@cheerful.com % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. mahAgaNapatistotraM shrIrAghavachaitanyavirachitam ..}## \itxtitle{.. mahAgaNapatistotraM shrIrAghavachaitanyavirachitam ..}##\endtitles ## tachChiShyakR^itayA TippaNyA sametam | yogaM yogavidAM vidhUtavividhavyAsa~NgashuddhAshaya\- prAdurbhUtasudhArasaprasR^imaradhyAnAspadAdhyAsinAm | AnandaplavamAnabodhamadhurAmodachChaTAmeduraM taM bhUmAnamupAsmahe pariNataM dantAvalasyAtmanA || 1|| dantAvalo gajastasyevAsyaM mukhaM yasya sa gajAnanastadAtmanA tadrUpeNa pariNataM taM bhUmAnaM paraM brahmopAsmahe | kIdR^ishaM tam | Anando brahmAnandastena plavamAnaH | lakShaNayA pUrNAnandAbhinna ityarthaH | IdR^isho yo bodhastena chidAnandamayaM svarUpamuktam | tadvivartarUpaH prapa~ncha eva madhurAmodachChaTAtvena rUpitastena meduram | punaH kIdR^isham | yogavidAM yogam | kIdR^ishAM yogavidAm | vidhUto vividho vyAsa~Ngo yairata eva shuddho ya AshayastasminprAdurbhUtaH sudhArasaH shAntisukhaM yeShAM te cha te prasR^imaraM prasAri dhyAnaM yasminnIdR^ishaM yadAspadaM kaMdarAdi tadadhyAsinashcha teShAm || tArashrIparashaktikAmavasudhArUpAnugAM yaM vidu\- stasmai stAtpraNatirgaNAdhipataye yo rAgiNAbhyarthyate | Amantrya prathamaM vareti varadetyArtena sarvaM janaM svAminme vashamAnayeti satataM svAhAdibhiH pUjitaH || 2|| mahAgaNapatimantramuddharati \- tAraH praNavaH, shrIrlakShmIbIjam, parashaktirmAyAbIjam, kAmaH kAmabIjam, vasudhA bhUmibIjam, iti pa~ncharUpANAM bIjAnAmanu gamityakSharametAdR^ishaM yaM sAdhakA vidustasmai gaNAdhipataye praNatiH stAditi yojanA | yaH satataM svAhAsvadhAdibhiH shaktibhiH pUjitaH | Artena rAgiNA prathamaM vareti tato varadetyAmantryAbhyarthyate | abhyarthanAmevAha \- sarvaM janaM svAminme vashamAnayeti | svAhAdibhirityanena svAhAnto mantraH | atrAdhipadaM sarvamiti cha padaM ChandonurodhAduktam | mantre tu gaNapataye tathA sarvajanamityekameva padam | svAminniti cha mantrAdbahirbhUtam || kallolA~nchalachumbitAmbudatatAvikShudravAmbhonidhau dvIpe ratnamaye suradrumavanAmodaikamedasvini | mUle kalpatarormahAmaNimaye pIThe.akSharAmbhoruhe ShaTkoNAkalitatrikoNarachanasatkarNike.amuM bhaje || 3|| kallolAnAM mahormINAma~nchalAH prAntAstairAshliShTA meghatatiryenaitAdR^isha ikShurasasamudre suradrumANAM pArijAtAdInAM vanaM tadAmodena paripuShTe | ratnamayaM dvIpaM vArimadhyasthalaM tadgatasya kalpatarormUle mahAmaNimayaM pIThaM tatra ShaTkoNayuktatrikoNakarNIkAyukte.akSharAmbhoruhe tantraprasiddhe mAtR^ikAkamale.amuM mahAgaNapatiM bhaje || chakraprAsarasAlakArmukagadAsadbIjapUradvija\- vrIhyagrotpalapAshapa~NkajakaraM shuNDAgrajAgradghaTam | AshliShTaM priyayA sarojakarayA ratnasphuradbhUShayA mANikyapratimaM mahAgaNapatiM vishveshamAshAsmahe || 4|| chakraM prasiddham, prAsastrishUlaH, rasAlakArmukamikShudhanuH, gadA prasiddhA, bIjapUro mAtuli~Ngam, dvijaH svakIyo dantaH, vrIhyagraM shAlima~njarI, utpalaM prasiddham, pAshapa~Nkaje cha prasiddhe, evaM dashAyudhAni kareShu yasya | shuNDAgre puShkare jAgratsthito ghaTo ratnapUrNo hemakumbho yasya | kamalahastayA priyayA dakShiNahastenAli~NgitaM mANikyapratimaM shoNachChaviM sarveshvaraM mahAgaNapatimAshAsmahe || dAnAmbhaHparimeduraprasR^imaravyAlambirolambabhR^i\- tsindUrAruNagaNDamaNDalayugavyAjAtprashastidvayam | trailokyeShTAvidhAnavarNasubhagaM yaH padmarAgopamaM dhatte sa shriyamAtanotu satataM devo gaNAnAM patiH || 5|| dAnAmbhasA madAmbunA parimeduraM vyAptaM prasR^imarAnvyAlambino rolambAnbhramarAnbibhartIti prasR^imaravyAlambirolambabhR^it | sindUreNAruNametAdR^ishaM kumbhapradeshadvayaM tasya miShAttrailokyeShTavidhAnvarNasubhagaM tribhuvanashubhavidhyakSharamanoj~nam | padmarAgopamaM padmarAgo lohitakastadupamaM prashastidvayaM yo dhatte sa gaNAnAM patirdevaH satataM shriyamAtanotu | yathA mR^idambulipte dAruphalake raktachUrNaM dattvAkSharANi, tathA dAnAmbulipte sindUravati kumbhasthale bhramarA ityuktaM bhavati || bhrAmyanmandaraghUrNanAparavashakShIrAbdhivIchichChaTA\- sachChAyAshchalachAmaravyatikarashrIgarvasarvaMkR^iShAH | dikkAntAghanasArachandanarasAsArAH shrayantAM manaH svachChandaprasarapraliptaviyato herambadantatviShaH || 6|| herambadantatviSho manaH shrayantAm | kiMbhUtAH | bhrAmyato mandarasya ghUrNanAvR^ittayastadAyattasya kShIrAbdhervIchayo laharyastAsAM ChaTA agrabhAgAstaiH sadR^ishAH | punaH kIdR^ishAH | chalachAmaravyatikarashrIgarvasarvaMkakR^iShAH | vyatikaro vyatiSha~NgaH | dikkAntetyAdirUpakam | ghanasAraH karpUraH | tathA svachChandaprasarapraliptaviyato.analpasaMchArAkIrNAkAshAH | etena tviShAM bahutvaM vyajyate || muktAjAlakarambitapravikasanmANikyapu~njachChaTA\- kAntAH kambukadambachumbitaghanAbhogapravAlopamAH | jyotsnApUratara~NgamantharataratsaMdhyAvayasyAshchiraM herambasya jayanti dantakiraNAkIrNAH sharIratviShaH || 7|| mauktikasamUhamishritapradIptamANikyasamUhachChaTAvatkAntA manoharAH | sha~NkhasamUhasaMgatavistIrNavidrumasamAH | jyotsnApUratara~Nge mantharaM tarantI chAsau saMdhyA cha tasyA vayasyAH sAmyAtsakhyaH | etAdR^ishA herambasya dantakiraNairvyAptAH sharIratviShashchiraM jayanti || shuNDAgrAkalitena hemakalashenAvarjitena kShara\- nnAnAratnachayena sAdhakajanAnsaMbhAvayankoTishaH | dAnAmodavinodalubdhamadhupaprotsAraNAvirbhava\- tkarNAndolanakhelano vijayate devo gaNagrAmaNIH || 8|| shuNDApradhR^itasuvarNakalashasaMgR^ihItena kSharatA bahutvAdbahirapi nirgachChatA muktAmANikyAdiratnasamUhena koTishaH sAdhakajanAnsaMbhAvayannasaMkhyAtAnupAsakAnsampadA vardhayan | dAnetyAdi | Amodo gandhaharShayoH | protsAraNamuchchATanaM tadarthamAvirbhavatkarNAndolanakrIDaH | gaNAnAmIshvaro devo vijayate || herambaM praNamAmi yasya purataH shANDilyamUle shriyA bibhratyAmburuhe samaM madhuripuste sha~Nkhachakre vahan | nyagrodhasya tale sahAdrisutayA shaMbhustayA dakShiNe bibhrANaH parashuM trishUlamitayA pAshA~NkushAbhyAM shubham || 9|| shANDilyamUle bilvavR^ikShasyAdho yasya mahAgaNapateH purato.agrabhAge padme bibhratyA shriyA samaM te prasiddhe sha~Nkhachakre vahanmadhuripurviShNurasti | tathA yasya dakShiNe nyagrodhasya tale vaTavR^ikShAdhaH pAshA~NkushAbhyAmitayA sahitayAdrisutayA pArvatyA saha parashuM trishUlaM cha bibhrANaH shaMbhuH shivo.asti || pashchAtpippalamAshrito ratipatirdevasya ratyotpale bibhratyA samamaikShavaM dhanuriShUnpauShpAnvahanpa~ncha cha | vAme chakragadAdharaH sa bhagavAnkroDaH priyaMgostale hastodyachChukashAlima~njarikayA devyA dharaNyA saha || 10|| devasya pashchime pippalavR^ikShasyAdha utpale bibhratyA ratyA samamaikShavaM dhanuH pa~ncha pauShpAniShUMshcha vahan ratipatiH kAmadevo.asti | asya cha vAme priyaMguvR^ikShAdho hastodyachChukashAlima~njarikayaikasminkare kIramanyatra kalamakaNishaM bibhratyA dharaNyA saha sa prasiddho bhagavAnkroDo varAho.asti taM herambaM praNamAmIti pUrveNAnvayaH || ShaTkoNAshriShu ShaTsu ShaD gajamukhAH pAshA~NkushAbhIvarA\- nbibhrANAH pramadAsakhAH pR^ithumahAshoNAshmapu~njatviShaH | AmodaH purataH pramodasumukhau taM chAbhito durmukhaH pashchAtpArshvagato.asya vighna iti yo vighnakarteti cha || 11|| ShaTkoNasya pIThasya ShaTsvashriShu pAlIShu ShaD gajamukhA dhyeyAH | kIdR^ishAste | pAshA~NkushAbhayavarAnhasteShu bibhrANAH | pramadAnAM sakhAya iti pramadAsakhAH | bhAryAsahitA ityarthaH | pR^ithushchAsau mahAshoNAshmanAM padmarAgANAM pu~njastadvattviT kAntiryeShAM te | yadi 'pR^ithumahAH' iti visargAntaH pAThastadA bhinnaM padam | pR^ithurmaho yeShAM te | akArAnto.api mahashabdo.asti | teShAM nAmAnyAha \- purato.agrakoNa AmodaH | taM chAmodamabhitaH pramodasumukhau | puraH kalpitapUrvadigapekShayAgnikoNe pramodaH, evamIshAnakoNe sumukha ityarthaH | pashchAtpashchimakoNe durmukhaH | asya durmukhasya vighna iti yasya nAma sa ekasminpArshve vighnakarteti yasya nAma sa dvitIyapArshve.asti | arthAdeko nairR^ityakoNe, aparo vAyavye vartate || AmodAdigaNeshvarapriyatamAstatraiva nityaM sthitAH kAntAshleSharasaj~namantharadR^ishaH siddhiH samR^iddhistataH | kAntiryA madanAvatItyapi tathA kalpeShu yA gIyate sAnyA yApi madadravA tadaparA drAviNyamUH pUjitAH || 12|| kAntasya svasvabharturAli~NganarasaM jAnantyata eva mantharA rAgiNI dR^igyAsAM tAH | AmodAdInAM pUrvashlokoktAnAM ShaNNAM bhAryAsteShAM samIpe sthitA dhyeyAH | tAsAM nAmAni cha \- siddhiH, samR^iddhiH, kAntiH, madanAvatI, madadravA, drAviNI cheti || AshliShTau vasudhetyatho vasumatI tAbhyAM sitAlohitau varShantau vasu pArshvayorvilasatastau sha~Nkhapadmau nidhI | a~NgAnyanvatha mAtarashcha paritaH shakrAdayo.abjAshrayA\- stadbAhye kulishAdayaH paripatatkAlAnalajyotiShaH || 13|| vasudhayA vasumatyA cha krameNAli~Ngitau shuklaraktavarNau dhanaM varShantau tau sha~NkhapadmasaMj~nau prasiddhau nidhI ShaTkoNapArshvayorvilasataH | tayordhyAnaM kuryAdityarthaha | anu nidhidhyAnAnantaraM hR^idayAni ShaDa~NgAni dhyAyet | parito brAhmyAdyA aShTa mAtaro dhyeyAH | ShaTkoNAdbahiHsthite.aShTadalakamala indrAdayo dikpAlAstadbAhye teShAM samIpa eva paripatatkAlAnalajyotiShaH pradIptasvarUpA indrAdInAM hetayo vajrAdyA dhyeyAH || ithaM viShNushivAditattvatanave shrIvakratuNDAya huM\- kArAkShiptasamastadaityapR^itanAvrAtAya dIptatviShe | AnandaikarasAvabodhalaharIvidhvastasarvormaye sarvatra prathamAnamugdhamahase tasmai parasmai namaH || 14|| 'herambaM praNamAmi' (9.10) iti shlokAbhyAM viShNushivAdisvarUpaistanurmUrtiryasya sa tasmai | AdipadAtsmarakroDau | huMkAramAtreNa nirastasamastAsurasainyasamUhAya dIptakAntaye | Anandeti | niratishayasukhasphuraNatara~NgairdUrIkR^itasampUrNormaye | UrmayaH ShaDbhAvavikArAH | te cha \- jAyate, asti, vardhate, vipariNamate, apakShIyate, nashyatIti cha | AnandaikarasAvayodhalaharIbhirvidhvastAH sarveShAM sAdhakAnAmUrmayaH ShaDindriyajanyA vR^ittayo yasmAdityeke | UrmishabdenAvidyAdayo yogashAstraprasiddhAH kleshAH | sarvatra prathamAnaM mugdhaM sundaraM maho yasya tasmai parasmai jagato.anyasmai namaH || sevAhevAkidevAsuranaranikarasphArakoTIrakoTI\- koTivyATIkamAnadyumaNisamamaNishreNibhAveNikAnAm | rAjannIrAjanashrIsakhacharaNanakhadyotavidyotamAnaH shreyaH stheyaH sa deyAnmama vimaladR^isho bandhuraM sindhurAsyaH || 15|| sevAyAM hevAko.abhilASho yeShAm | ahamagre.ahamagre bhavAmItIchChA | ahaMpUrviketi yAvat | te cha te devAsuranarANAM samUhAsteShAM dedIpyamAnamukuTAgrANAM yA koTiH saMkhyAvisheShastatra vyATIkamAnAH susaMgatAH sUryatulyaratnapa~NktikAntipravAhAsteShAm | rAjantI nIrAjanashrIrArAtrikashobhA tasyAH sakhAyaste cha te charaNanakhAshcha teShAM dyotena prakAshena vidyotamAnaH sa prasiddhaH sindhurAsyo gajamukhaH | he vimaladR^ishaH paNDitAH | mama bandhuraM ramyaM stheyaH sthirataraM shreyaH kalyANaM deyAt | mametyasya vA vimaladR^isha iti visheShaNam | 'vimaladR^ishA' iti pAThe tu saumyAvalokanena shreyo dadyAdityarthaH || etena prakaTarahasyamantramAlAgarbheNa sphuTatarasaMvidA stavena | yaH stauti prachurataraM mahAgaNeshaM tasyeyaM bhavati vashaMvadA trilokI || 16|| sphuTatarasaMvidetyanena stotre prasAdaguNaH sUchitaH | prachurataraH muhurmuhuH | anyatspaShTam || iti shrImatparamahaMsaparivrAjakAchAryavaryashrIrAghavachaitanyavirachitaM mahAgaNapatistotraM tachChiShyakR^itayA TippaNyA sametaM samAptam | ## Encoded and proofread by Dhaval Patel drdhaval2785 at gmail.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}