% Text title : umAshatakam 1 % File name : umAshatakam1.itx % Category : shataka, devii, pArvatI, stotra, gaNapati-muni, ramaNa-maharShi, devI % Location : doc\_devii % Author : Ganapati Muni with Ramana Maharshi % Transliterated by : DPD % Proofread by : DPD % Description-comments : From The Collected Works of Vasishtha Kavyakantha Ganapati Muni Vol 1 % Latest update : November 24, 2012 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Uma Shatakam ..}## \itxtitle{.. umAshatakam ..}##\endtitles ## prathamaM dashakam (AryAvR^ittam) phullatvaM ravidIdhitinirapekShamumAmukhyAbjasya | pUrNaM karotu mAnasamabhilAShaM puNyabhUmijuShAm || 1|| kailAsavAsinI vA dhavaladyutibimbanilayA vA | AkAshAntarapIThasthitota me devatA bhavati || 2|| AkAshAntarapIThasthitaiva sAkShAtparAshaktiH | tasyA aMshavyaktI shashini sitAdrau cha rAjantyau || 3|| sa~NkalpavAtasa~NgAdAnandaraso ghanIbhUtaH | antarvyApakashakteH samapadyata te vapurmAtaH || 4|| ichChAvichitravIryAttejaHpaTalo ghanIbhUtaH | antarvyApakashakteH samapadyata te vibhorgAtram || 5|| ichChAyogAttejasi tava bhAgaH kashchidastIshe | vij~nAnayogato mudi bhAgyastvayi kashchidIshasya || 6|| samrAjau shashabhR^iti yau gR^ihavantau yau cha sitagiriNA | tadidaM yuvayormAyA veShAntaramithunayugalamume || 7|| yadyapi vibhUtiradhikaM yuvayorvishvAmbike bhavati | mithune tathApyamU vAM nediShThe devi pashyAmaH || 8|| dampatyorbhagavati vAM pratibimbau bhAskare bhavataH | dehabhuvau bhUchakrasvapnapravyakttI sudhAmahasi || 9|| dehe bhuvaH pratibimbaH prANanmUlasya nedIyAn | pratibimbavyaktteshcha svapnavyakttishcha nediShThA || 10|| \medskip\hrule\medskip dvitIyaM dashakam (vasantatilakAvR^ittam) kAshmIramunnatapayodharakumbhasImni srigdhaM pradigdhamumayA sharaNaM mamAstu | bhettA purAmupari bhasmana eva dhatte rAgasya chihnamiva yatparirambhalagnam || 11|| asmAkamambudaghanastanitopameShu herambabR^iMhitavibhUtiShu bhAShiteShu | siddhodyamAnamatil~Nghya nijApadAnaM baddhashrutirbhavatu bhargagR^ihasya netrI || 12|| sandeha eSha mama chandrakalAdharasya shuddhAntasundari manAMsi satAM tavA~NghriH | shuddhAni kiM vishati kinnu bhajanti shuddhim a~Nghre praveshamanu tAni vidhUya pa~Nkam || 13|| trailokyapAlanavidhAyi vikasvarAbja\- shobhAviDambi maNipIThataTIvilambi | kShemapradAyi hR^idaye charaNaM nyadhAyi kiMvA na te nagasute yadi yaM vipannaH || 14|| vighnAni yanmuhuridaM hR^idayaM chalaM yat saukhyaM na ki~nchidapi yadyaduparyasaukhyam | tvAmAshritasya cha mamAkhilalokarAj~nI mattaH paro jagati ko manujeShu kalkI || 15|| mA bhUnnideshavachanaM nayanA~nchalasya mAbhUtprasAraNamayi tyaja nirdayatvam | a~NgIkuru stutaguNe charaNAmbujaM te dhyAtuM tadeva bahu me bhuvanasya mAtaH || 16|| kAmaM dadAtu na dAdatu mano dhinotu no vA dhinotu nayatAddivamanyato vA | Atmarpito.ayagajApadapa~NkajAya kiM kA~NkShate pratiphalaM vipulo.anurAgaH || 17|| pAdaM dadAsi manase kinu pApino me pAriplavAya bhuvanAdhikavAsanAya | dUre sa tAvadachalendrakumArikA me devi praNAmamurarIkuru tAvatA.alam || 18|| ArAdhanaM tava bhavAni yathAvidhAnaM kartuM kulAchalakumAri na parayAmi | pAdArvindayugameva tavAnato.ahaM pApAkulaH sharaNamIshvari kA~NkShamANaH || 19|| baddhavratA praNatapApanivAraNe tvaM baddhA~njalishcha bahupApasamAkulo.aham | kartavyamadritanaye nipuNaM vimR^ishya nirdhArayAtra na yathA yashaso vilopaH || 20|| \medskip\hrule\medskip tR^itIyaM dashakam (pR^ithvIvR^ittam) vrataM tava vidanhR^idi praNatapApanAshe kR^itaM phalapravaNapAtakapramathito.api nAsmyAkulaH | bhavAmi shirasA natastava bhavAni pAdAmbujaM vratasya paripAlane yadi matirgatirme bhava || 21|| tapashcharitumuttamaM prayatitaM mayAnekadA parantu bahulairadhaiH pariNatairvR^ito.adhvA mama | ayaM mama dR^iDho.a~njalistanuviyogakAlAvadhi \- ryadi tvamachalavratAsyachalakanyake mAmava || 22|| ajeyabahupApabhR^idbhuvi janiShyamANaH khalaH kamIshadayite purA na viditastavAyaM janaH | vrataM kR^itamidaM tvayA paramasAhasopetayA kvA vA janani yoShitAM jagati dIrghamAlochanam || 23|| ihApuradhamarShaNAnyayasha eva bhUtvA mudhA vyaloki niyamaistathA na bahulaishchA kashchijjayaH | sthiraM na madadhakShaye madadhatejasA bhUyasA vrataM cha tava kuNThitaM yadi mamaiva kIrtiH parA || 24|| kShaye yadi madenasAmasukare na dhIraM mano na te nagapateH sute kimapi chintyametatkR^ite | vrataM visR^ija tanmudhA nanu vadhUsvabhAvAtkR^itaM sthirIbhavatu durvidhirbhuvi tava prasadAdbalI || 25|| kR^itaM paramayatnashchiramanujjhitaM shraddhayA bhR^itaM bahuvidhodyamairavijitaM mahApAtakaiH | gataM dhanataraM yasho jayati pApajAtaM mam vrataM cha tava tAdR^ishaM janani kasya vA syAjjayaH || 26|| madIyaduritAvalipralayakAlakAdambinI madonnatavijR^imbhaNaM vR^ijanabha~Ngabaddhavrate | bhavapriyatame nijaprabalahu~NkR^itiproddhata \- prabha~njanamahaujasA shamaya pAlayAtmavratam || 27|| adhakShayavidhau tu te pariNatA parIpakvatA vibhedakathanaM kathaM pR^Ithulavaibhave yujyate | idaM tava vigarhaNaM pariNatainasaM vA stuti \- rmano yadi mR^iDAni te jagati sAdhyamevAkhilam || 28|| sahasranayanAdibhiH suravaraiH samArAdhitA sahasrakiraNaprabhA sitamarIchishItA mama | sahasradalapa~Nkaje kR^itaniketanA dehinAM sahasradalalochanA duritasantatiM kR^intatu || 29|| sarojabhavasaMstutA sakalalokarAjyeshvarI karopamitapallavA karuNayAntarullolitA | uroruhabharAlasA mayapurArisammohinI karotu madaghakShayaM kumudalochanA kAchana || 30|| \medskip\hrule\medskip chaturthaM dashakam (shArdUlavikrIDitavR^ittam) kAlAmbhodharachArusAndrakabari pUrNendubimbAnanA tATa~NkadyutidhautagaNDaphalakA tAmbUlaraktAdharA | prAleyadyutibAlakena rachitottaMsA harA~NkAsanA shAntA nUtanapallavAbhacharaNA bhUtyai shivA chintyate || 31|| shrIpAdaM tavashailarAjaduhitaH bhAsvatkarAsphAlana \- prodbhuddhAmbujasundaraM shrutivadhUchUDAtaTIlAlitam | vandantAM tridivaukaso vashamitaH saMvAhayatvIshvaro yogI dhyAyatu vandivadbhagavati prastauti so.ayaM janaH || 32|| yasyAshchAmaradhAriNI sarasijaprAsAdasa~nchAriNI vAgdevI hR^idayeshvaraprabhR^itayo nAkaukasaH ki~NkarAH | devaH kairavabandhukorakadharo lIlAsahAyaH sakhA tasyAH pAdasarojavandipadavIM pApto.asmyahaM bhAgyataH || 33|| pAdasya kriyate kShaNAntakatichana dhyAnaM jagaddhAtri te yattasyebhaghaTAkulA~NganamahIshrIrnAnurupaM phalam | nodgAro madhumAdhurimadamuShAM svAbhAviko vA girAM sAdhIyastu phalaM yadIshvari punardhyAtuM matirjAyate || 34|| devi tvachcharaNAravindayugaladhyAnasya kechitphalaM manyante rathavAjisAmajavadhUsaudhAdirUpAM shriyam | pIyUShadravasAravaibhavamuShAM vAchAM pare pATavaM prAj~nAH sAdhanamAditaH pariNatau pAhuH phalaM tatsvayam || 35|| lobhaH kutrachidasti kutrachidasau roShaH paraM bhIShaNaH kutrApyeSha manobhavo.atimaline svAnte nishAnte mama | etasyApyahahAdrirAjatanuje koNe tvadIyaM padaM kheTImastakalAlitaM shuchitamaM vA~nChAmi kartuM khalaH || 36|| kandarpeNa nivAritaM prahasatA lobhena nirbhartsitaM mAtsaryeNa tiraskR^itaM madamahAnAgena chA.abhidrutam | durbhrAntyA galahasti taM bata punaH krodhena dhUtaM balA \- dapyetatpadamamba te vishati me cheto.asya varNyA kR^ipA || 37|| uddIpyannakharAMshujAlajaTilastvatpAdakaNThIravo yAvanmIlitalochanaH shashikalAchUDAmaNervallabhe | tAvallobhakaTiprakhelati mudaM puShNAti kAmadvipo roShadvIpipatishcha garjatitarAM manmAnase kAnane || 38|| chA~nchalyaM hR^idayasya nashyanti kathaM yuShmatprasAdaM vinA tvaM vA devi kathaM prasIdasi yadi sthairyAdapetaM manaH | anyonyAshrayadoSha eSha sumahAnanyaM vidhiM sthApaya \- tyasmAkaM varade tavota karuNAM nirhetukAM jantuShu || 39|| bhaktirme tvayi bhargapatni mahatI dhyAtuM cha vA~nChAmi te pAdAmbhojayugaM tathApi chalatAM cheto na me mu~nchati | kAmAH santi sahasrasho nagasute pashchAdbravImyagrataH chittasya sthiratAM pradehi karuNA yadyasti te vastutaH || 40|| \medskip\hrule\medskip pa~nchamaM dashakam (subodhitAvR^ittam) uDurAjakalAkalApakAnte sadaye sundari komalA~Ngi mAtaH | shrutipadmadR^ishAvataMsitaM te padapadmaM pratibhAtu mAnase me || 41|| aruNAchalanAthasadmanAthe charitaM te charaNasya dhAtri chitram | kriyate.abjasanAbhinAmunA yadgatapa~Nke munimAnase nivAsaH || 42|| charitaM charaNAmbujanmanaste paramaM vismayamAtanoti mAtaH | atirAgavadapyado vidhate sahavAsena yadantaraM virAgam || 43|| bhavabhAmini karmasharmadAtuH bhavadIyasya padasya vismayAya | api dhUlividhUsaraM vidhatte yadidaM vItarajo mano munInAm || 44|| charaNaM jagadamba kaiTabhAriryatamAno.api dadarsha naiva yasya | sa harastava dR^ishyate vilagnashcharaNe chaNDi charAcharAdhinAthaH || 45|| kamalAsanaka~njalochanAdInavamatya tridashAnnageshakanye | aguNe ramase nage.atra shoNe kva guNAn pashyati jAtipakShapAtaH || 46|| kusumAdapi komalaM vapuste hR^idayeshastvaruNo giriH kaThoraH | prachalAkhutura~Ngamasya mAtaH samanudhyAya bibhemi chetasedam || 47|| yadasau vihitaH sito.aruNAdristava hAsena sitena nAtra chitram | idamadbhutamasya mAnasaM yadvimalaM pArvati nIyate.atirAgam || 48|| navaku~NkumareNupa~Nkilasya smaraNAtte satataM stanAchalasya | svayamapyachalo babhUva shoNaH shashidhArI jagataM savitri sha~Nke || 49|| smaraNAdaruNAchalasya mukttiH kathamashlIlakapAlabhUShaNasya | vapuSho.adharmamuShya chennachetastimiradhvaMsini sarvama~Ngale tvam || 50|| \medskip\hrule\medskip ShaShThaM dashakam (tUNakavR^ittam) gauri chaNDi kAlike gaNAdhinAyakAmbike skandamAtarindukhaNDashekhare parAtpare | vrajanAyike prapa~ncharAj~ni haimavatyume bhargapatni pAlayeti gIyatAM sadA sakhe || 51|| vAsudevamukhyanityadevamaulivisphura\- dratrajAlarashmijAtara~njitA~Nghripa~Nkaje | shItabhAnubAlachUDachittabAlaDolike shailapAlabAlike sadA vadAmi nAma te || 52|| kalpavalli gAyatAM nitambinImatallike nAma te vipashchito nirantaraM gR^iNanti ye | daityajaitri lokadhAtri rAtrirANNibhAnane shailavaMshavaijayanti jantavo jayanti te || 53|| Anane tvadIyanAma pAvanAchcha pAvanaM yasya puNyapUruShasya pUruShArdhavigrahe | sAnumanmahendraputri sammadAya bhUyase bandhanAlayo.api tasya nandanaM vanaM yathA || 54|| nAmakIrtaneShu yA ShaDAnanasya ShaDvidhAt shabdato.api bhAShitAtpR^ithakpadAbhishobhitAt | unnataikanAdato gajAnanasya bR^IMhitAt tR^iptimeti putrayoH samApi sA jayatyumA || 55|| mugdhamitramAnase mahAndhakArabandhure nidritamumAM nije bahirgaveShayasyaho | tatpravishya pashya vedadIpakena tAM tataH tArashabdabodhitAM vidhAya sAdhayAmR^itam || 56|| Adimo vibhoH suto yadIyamUlamAshritaH ku~njarAnano bibharti sAlatAtanau tatA | agrato dadhAti ki~nchidambujaM marandava \- ttatra shakttiruttamA prabodhayanti tAM vidaH || 57|| dvAdashAntashAyinI hR^idambujAntarasthitA maNDaladvayAlayA sitAdrishR^igachAriNI | sarvabhUtajAlabharturAsanArdhabhAginI bhUtimuttamAM tanotu bhubhR^itaH sutA tava || 58|| kShatramardanprasUrasUrilokadurgamA durgamATavIvihAralAlasA madAlasA | nityashakttipauruShA mamA~NghrimUlavAsinaH | satyakIrtirArtijAlahAriNI haratvadham || 59|| shakttidhAriNaH savitri sarvashakttimatyume bhaktimajjanograpApanigrahe dhR^itagrahe | devamauliratnakAntidhautapAdukAya te sarvama~Nghraye madiyamAtmanA sahArpyate || 60|| \medskip\hrule\medskip saptamaM dashakam (madAlasAvR^ittam) jambhArimukhyasurasambhAvitA bahuladambhAtmanAmasulabhA pumbhAvadR^iptasanishumbhAdibandhugaNashumbhAsurendradamanI kumbhApahAsikuchakumbhAnaghorujitarambhA.anuraktahR^idayA shambhAvibhendramukhaDimbhA karotu tava shaM bhAminImaNirumA || 61|| tArAvalItulitahArAlishobhikuchabhArA.alasAlasagatiH dhArAdharAbhakachabhArA suparvaripuvIrAbhimAnashamanI | nIrATaketusharadhArAbhadR^iShTiratidhIrA dharAdharasutA vArANasIvasati vArAshitUNaratirArAdhyatAmayi sakhe || 62|| khyAtA munIndrajanagItA mayUrahayapotA.atichitracharitA shItAchalAchipatijAtA prabhAtayamatAtAvisheShacharaNA | pUtA pinAkadharapItAdharA tridivapAtAlabhUtalajuShAM sA tApajAtamavigItA.akhilaM haratu mAtA kaTAkShakalayA || 63|| khaNDAmR^itadyutishikhaNDA mahogratarabhaNDAdidaityadamanI chaNDA.analADhyakulakuNDAlayA vihitadaNDA khalAya bhuvane | shuNDAlabhUmipatituNDadhibhUtataruShaNDA chalANDaghaTamR^it\- piNDAyitA sakalapiNDAntarasthamaNibhANDAyitA.astu sharaNam || 64|| rAkAsudhAkarasamAkArahAsadhutabhIkA bhavAbdhitaraNe naukA kaTAkShadhutashokA mahAmahimapAkAriNA.api vinutA | ekAmbikA sakalalokAvalerachalatokAyitAkhilaghana\- shrIkAnatasya mama sA kAlikA kamalanIkAshadR^ik dishatu sham || 65|| nIlAlakA madhurashIlA vidhUtaripujAlA vilasavasatiH lolA dR^ishoH kanakamAlAvatI vibudhalIlAvatIparivR^ita | kilAlajAptamukhahelA jitAmR^itakaremAtale nivasatAM shAlAruchAmajinachelA.abalA kapaTakolAnujA dishatu sham || 66|| avyAdudAratarapavyAyudhaprabhR^itihavyAshirkIrtitaguNA gavyAjyasammilitakavyAshilokanutabhavyA.atipAvanakathA | shravyA sadA vividhanavyAvatAravarakavyArabhaTyabhiratA divyAkR^itistaruNavyAbhapAdakhilamavyAtmajA tava kulam || 67|| doShAkarArbhakavibhUShA kaTAkShadhutadoShA nirantaramana \- stoShA parA kaluShikAShAyadhAriyativeShA.anavApyacharaNA | bhAShAvadhUdayitasheShAhishAyivinutaiShA viShAdashamanI poShAya pApatatishoShAya chAstu kulayoShA bhavasya bhavatAm || 68|| vandArusAdhujanamandAravalliravindAbhadIrghanayanA kundAlikalparadavR^indA padAbjanatavR^indArakenduvadanA | mandA gatAvalamamandA matau jitamukundAsuraprashamanI nandAtmajA dishatu shaM dAruNAdhatatibhindAnanAmanivahA || 69|| shyAmA kadambavanadhAmA bhavArtiharanAmA namajjanahitA bhImA raNeShu surabhAmAvataMsasumadAmAnuvAsitapadA | kAmAhitasya kR^itakAmA kilAlamabhirAmA ramAlayamukhI kShemAya te bhavatu vAmA kadambakalalAmAyitA bhagavatI || 70|| \medskip\hrule\medskip aShTamaM dashakam (drutavilambitavR^ittam) jalaruhaM daharaM samupAshritA jalacharadhvajasUdanasundarI | haratu bodhadR^igAvaraNaM tamo hR^idayagaM hasitena sitena me || 71|| namadamartyakirITakR^itaiH kiNaiH kamaThapR^iShThanibhe prapade.a~NkitA | ajinachelavadhUrvidadhAtu vo vR^ijinajAlamajAlamavikramam || 72|| lalitayA natapAlanalolayA pramathanAthamanoharalIlayA | kirimukhImukhashaktyupajIvyayA viditayAditayA gatimAnaham || 73|| amR^itadIdhitipovataMsayA kR^itapadAnatapApanirAsayA | gatimadardhanarakR^itichitrayA bhuvanameva na me kulamAryayA || 74|| agaNayaM na cha goShpadavadyadi tribhuvanaM kutale na tarAmi kim | sharaNavAnahamuttamabhAvayA girijayArijayAvitadevayA || 75|| sakaruNA kushalaM tava reNukAtanurumA tanutAdudito yataH | yudhi munirvidadhau parashuM dadhajjanapatInapatIvra bhujAmadAn || 76|| dasharathAtmajapUjitamIshvaraM vidadhatI ratinAthavashaM gatam | dishatu vaH kushalaM nagavardhinI harihayArihayAna mR^igeshvarA || 77|| janani shumbhanishumbhamahAsuronmathana vishrutavikramayA tvayA | jagadarakShyata gopakuleshituH tanujayAnujayArjunasAratheH || 78|| charaNayordhR^itayA vijayAmahe jagati mAraripupriyabhAmayA | shashikalAmalamandarahAsayA nagajayA gajayAnavilAsayA || 79|| imamagAdhipanandini kalkinaM ruShamapohya harasya vilokitaiH | kaluShanAshanabhImadR^ishollasanmadanakairavakairavalochane || 80|| \medskip\hrule\medskip navamaM dashakam (AryAvR^iyttam) sa jayati puNyakuleShu bhrAmyan gaNanAthamAturAlokaH | yamanucharato janArdanakulataruNI devatA cha girAm || 81|| kasya prabalapratibhaTabhujakaNDUvAraNaM mahadvIryam | kasya girAmiha sargo yugasya parivartane.api paTuH || 82|| kasya punarantarAtmani sa~NgasahasrairachAlitA niShThA | dhUrjaTidiyate yuShmaddR^igantabhR^itamantarA dhanyam || 83|| yasya nidAnamavidyA mamakAraH pUrvarUpama~NkuritaH || rUpaM tApatritayaM satsa~NgaH ki~nchidupashAntayai || 84|| antaHkaraNaM sthAnaM prakopano viShayapa~nchakAbhyAsaH | muktiH suShuptisamaye punaragamanAya ghorAya || 85|| lobhAbhilASharoShAH kaphamArutamAyavastrayo doShAH | aruchiH pathye bhUyasyanubandhopadravo ghoraH || 86|| tasya prayachCha shamanaM saMsArAkhyajvarasya bhUrikR^ipe | mR^ityu~njayasya bhAmini bheShajamAlokitaM nAma || 87|| bhavadIyasya bhavAni prasiddhacharite kaTAkShameghasya | prAvR^iTparitApahR^ito bhavyAmR^itavarShiNaH karuNA || 88|| rAjogradR^iShTirugro yuvarAjaH santataM madopetaH | tava rAj~ni na karuNA chedbhuvanasya kathaM shubhaM bhavatu || 89|| rAj~ni tava dR^iShTiravane vinatAnAmapi sadaiva khelantyAH | tapato.api nityamIsho lolo lilAsu te bhavati || 90|| \medskip\hrule\medskip dashamaM dashakam (shashivadanAvR^ittam) padakamalApta trikaluShahartrI | jayati shiveti tribhuvanabhartrI || 91|| adhitanudR^iShTistaTidadhibhUtam | pramathapateH sA sudR^igadhidaivam || 92|| svanayanavR^itau sthiracharaNAnAm | dvidalasaroje bhagavati bhAsi || 93|| daharasaroje nihitapadAnAm | dvidalasarojAdavatarasi tvam || 94|| ayi kulakuNDe dhR^itacharaNAnAm | dashashatapatraM vrajasi tapantI || 95|| daharasaroje dR^ishamapihitvA | viShayaparANAM skhalasi bahistvam || 96|| skhalasi yatastvaM sa bhavati hInaH | vilasasi yasmin sa khalu mahAtmA || 97|| dR^ishi dR^ishi chittvaM hR^idi hR^idi sattA | pratinarashIrShaM pramadakalA.asi || 98|| tava laharIShu tripuravirodhI | kimiva na chitraM janani karoti || 99|| harashiraso gauryavasi jagattvam | gaNapatishIrShAdava munibhUmim || 100|| || iti shrIbhagavanmaharShiramaNAntevAsino vAsiShThasya narasiMhasUnoH gaNapateH kR^itiH umAshatakaM samAptam || ## Encoded and proofread byDPD \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}