% Text title            : devI evaM pArvatI sahasranAmastotra kUrmapurANAntargatam
% File name             : shrIdevIsahasranAmastotraKurmaPurana.itx
% Category              : sahasranAma, devii, dashamahAvidyA, stotra, devI
% Location              : doc\_devii
% Transliterated by     : sa.wikisource.org
% Proofread by          : DPD
% Latest update         : June 1, 2013
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Devi or Paravti SahasranAmastotram ..}##
\itxtitle{.. shrIdevI athavA pArvatisahasranAmastotram kUrmapurANAntargatam ..}##\endtitles ##

atha devImAhAtmyam |
sUta uvAcha
ityAkarNyAtha munayaH kUrmarUpeNa bhAShitam |
viShNunA punarevainaM praNatA harim || 12.1||
R^iShayaH UchuH
kaiShA bhagavatI devI shaMkarArddhasharIriNI |
shivA satI haimavatI yathAvadbrUhi pR^ichChatAm || 12.2||
teShAM tadvachanaM shrutvA munInAM puruShottamaH |
pratyuvAcha mahAyogI dhyAtvA svaM paramaM padam || 12.3||
shrIkUrma uvAcha
purA pitAmahenoktaM merupR^iShThe sushobhane |
rahasyametad vij~nAnaM gopanIyaM visheShataH || 12.4||
sAMkhyAnAM paramaM sAMkhyaM brahmavij~nAnamuttamam |
saMsArArNavamagnAnAM jantUnAmekamochanam || 12.5||
yA sA mAheshvarI shaktirj~nAnarUpA.atilAlasA |
vyomasaMj~nA parA kAShThA seyaM haimavatI matA || 12.6||
shivA sarvagatA.anAntA guNAtItAtiniShkalA |
ekAnekavibhAgasthA j~nAnarUpA.atilAlasA || 12.7||
ananyA niShkale tattve saMsthitA tasya tejasA |
svAbhAvikI cha tanmUlA prabhA bhAnorivAmalA || 12.8||
ekA mAheshvarI shaktiranekopAdhiyogataH |
parAvareNa rUpeNa krIDate tasya sannidhau || 12.9||
seyaM karoti sakalaM tasyAH kAryamidaM jagat |
na kAryaM nApi karaNamIshvarasyeti sUrayaH || 12.10||
chatasraH shaktayo devyAH svarUpatvena saMsthitAH |
adhiShThAnavashAttasyAH shR^iNudhvaM munipuMgavAH || 12.11||
shAntirvidyA pratiShThA cha nivR^ittishcheti tAH smR^itAH |
chaturvyUhastato devaH prochyate parameshvaraH || 12.12||
anayA parayA devaH svAtmAnandaM samashnute |
chaturShvapi cha vedeShu chaturmUrtirmaheshvaraH || 12.13||
asyAstvanAdisaMsiddhamaishvaryamatulaM mahat |
tatsambandhAdanantAyA rudreNa paramAtmanA || 12.14||
saiShA sarveshvarI devI sarvabhUtapravartikA |
prochyate bhagavAn kAlo hariH prANo maheshvaraH || 12.15||
tatra sarvamidaM protamotaMchaivAkhilaM jagat |
sa kAlo.agnirharo rudro gIyate vedavAdibhiH || 12.16||
kAlaH sR^ijati bhUtAni kAlaH saMharate prajAH |
sarve kAlasya vashagA na kAlaH kasyachid vashe || 12.17||
pradhAnaM puruShastattvaM mahAnAtmA tvahaMkR^itiH |
kAlenAnyAni tattvAni samAviShTAni yoginA || 12.18||
tasya sarvajaganmUrtiH shaktirmAyeti vishrutA |
tadeyaM bhrAmayedIsho mAyAvI puruShottamaH || 12.19||
saiShA mAyAtmikA shaktiH sarvAkArA sanAtanI |
vaishvarUpaM maheshasya sarvadA samprakAshayet || 12.20||
anyAshcha shaktayo mukhyAstasya devasya nirmitAH |
j~nAnashaktiH kriyAshaktiH prANashaktiriti trayam || 12.21||
sarvAsAmeva shaktInAM shaktimanto vinirmitAH |
mAyayaivAtha viprendrAH sA chAnAdiranashvarAH || 12.22||
sarvashaktyAtmikA mAyA durnivArA duratyayA |
mAyAvI sarvashaktIshaH kAlaH kAlakAraH prabhuH || 12.23||
karoti kAlaH sakalaM saMharet kAla eva hi |
kAlaH sthApayate vishvaM kAlAdhInamidaM jagat || 12.24||
labdhvA devAdhidevasya sannidhiM parameShThinaH |
anantasyAkhileshasya shaMbhoH kAlAtmanaH prabhoH || 12.25||
pradhAnaM puruSho mAyA mAyA chaivaM prapadyate |
ekA sarvagatAnantA kevalA niShkalA shivA || 12.26||
ekA shaktiH shivaiko.api shaktimAnuchyate shivaH |
shaktayaH shaktimanto.anye sarvashaktisamudbhavAH || 12.27||
shaktishaktimatorbhedaM vadanti paramArthataH |
abhedaMchAnupashyanti yoginastattvachintakAH || 12.28||
shaktayo girajA devI shaktimAnatha shaMkaraH |
visheShaH kathyate chAyaM purANe brahmavAdibhiH || 12.29||
bhogyA vishveshvarI devI maheshvarapativratA |
prochyate bhagavAn bhoktA kapardI nIlalohitaH || 12.30||
mantA vishveshvaro devaH shaMkaro manmathAntakaH |
prochyate matirIshAnI mantavyA cha vichArataH || 12.31||
ityetadakhilaM viprAH shaktishaktimadudbhavam |
prochyate sarvavedeShu munibhistattvadarshibhiH || 12.32||
etatpradarshitaM divyaM devyA mAhAtmyamuttamam |
sarvavedAntavIdeShu nishchitaM brahmavAdibhiH || 12.33||
ekaM sarvagataM sUkShmaM kUTasthamachalaM dhruvam |
yoginastatprapashyanti mahAdevyAH paraM padam || 12.34||
AnandamakSharaM brahma kevalaM niShkalaM param |
yoginastatprapashyanti mahAdevyAH paraM padam || 12.35||
parAtparataraM tattvaM shAshvataM shivamachyutam |
anantaprakR^itau lInaM devyAstatparamaM padam || 12.36||
shubhaM nira~njanaM shuddhaM nirguNaM dvaitavarjitam |
AtmopalabdhiviShayaM devyAstataparamaM padam || 12.37||
saiShA dhAtrI vidhAtrI cha paramAnandamichChatAm |
saMsAratApAnakhilAnnihantIshvarasaMshrayA || 12.38||
tasmAdvimuktimanvichChan pArvatIM parameshvarIm |
AshrayetsarvabhUtAnAmAtmabhUtAM shivAtmikAm || 12.39||
labdhvA cha putrIM sharvANIM tapastaptvA sudushcharan |
sabhAryaH sharaNaM yAtaH pArvatIM parameshvarIm || 12.40||
tAM dR^iShTvA jAyamAnAM cha svechChayaiva varAnanAm |
menA himavataH patnI prAhedaM parvateshvaram || 12.41||
menovAcha
pashya bAlAmimAM rAjanrAjIvasadR^ishAnanAm |
hitAya sarvabhUtAnAM jAtA cha tapasAvayoH || 12.42||
so.api dR^iShTvA tataH devIM taruNAdityasannibhAm |
kapardinIM chaturvakrAM trinetrAmatilAlasAm || 12.43||
aShTahastAM vishAlAkShIM chandrAvayavabhUShaNAm |
nirguNAM saguNAM sAkShAtsadasadvyaktivarjitAm || 12.44||
praNamya shirasA bhUmau tejasA chAtivihvalaH |
bhItaH kR^itA~njalistasyAH provAcha parameshvarIm || 12.45||
himavAnuvAcha
kA tvaM devi vishAlAkShi shashA~NkAvayavA~Nkite |
na jAne tvAmahaM vatse yathAvadbrUhi pR^ichChate || 12.46||
girIndravachanaM shrutvA tataH sA parameshvarI |
vyAjahAra mahAshailaM yoginAmabhayapradA || 12.47||
devyuvAcha
mAM viddhi paramAM shaktiM parameshvarasamAshrayAm || 12.48||
ananyAmavyayAmekAM yAM pashyanti mumukShavaH |
ahaM vai sarvabhAvAnAtmA sarvAntarA shivA || 12.49||
shAshvataishvaryavij~nAnamUrtiH sarvapravartikA |
anantA.anantamahimA saMsArArNavatAriNI || 12.50||
divyaM dadAmi te chakShuH pashya me rUpamaishvaram |
etAvaduktvA vij~nAnaM dattvA himavate svayam || 12.51||
svaM rUpaM darshayAmAsa divyaM tat pArameshvaram |
koTisUryapritIkAshaM tejobimbaM nirAkulam || 12.52||
jvAlAmAlAsahasrADhyaM kAlAnalashatopamam |
daMShTrAkarAlaM durddharShaM jaTAmaNaDalamaNDitam || 12.53||
kirITinaM gadAhastaM sha~NkachakradharaM tathA |
trishUlavarahastaM cha ghorarUpaM bhayAnakam || 12.54||
prashAntaM somyavadanamanantAshcharyasaMyutam |
chandrAvayavalakShmANaM chandrakoTisamaprabham || 12.55||
kirITinaM gadAhastaM nUpurairupashobhitam |
divyamAlyAmbaradharaM divyagandhAnulepanam || 12.56||
sha~NkhachakradharaM kAmyaM trinetraM kR^ittivAsasam |
aNDasthaM chANDabAhyasthaM bAhyamAbhyantaraM param || 12.57||
sarvashaktimayaM shubhraM sarvAkAraM sanAtanam |
brahmondropendrayogIndrairvandyamAnapadAmbujam || 12.58||
sarvataH pANipAdAntaM sarvato.akShishiromukham |
sarvamAvR^itya tiShThantaM dadarsha parameshvaram || 12.59||
dR^iShTvA tadIdR^ishaM rUpaM devyA mAheshvaraM param |
bhayena cha samAviShTaH sa rAjA hR^iShTamAnasaH || 12.60||
AtmanyAdhAya chAtmAnamo~NkAraM samanusmaran |
nAmnAmaShTasahasreNa tuShTAva parameshvarIm || 12.61||
himavAnuvAcha
shivomA paramA shaktiranantA niShkalAmalA |
shAntA mAheshvarI nityA shAshvatI paramAkSharA || 12.62||
achintyA kevalA.anantyA shivAtmA paramAtmikA |
anAdiravyayA shuddhA devAtmA sarvagA.achalA || 12.63||
ekAnekavibhAgasthA mAyAtItA sunirmalA |
mahAmAheshvarI satyA mahAdevI nira~njanA || 12.64||
kAShThA sarvAntarasthA cha chichChaktiratilAlasA |
nandA sarvAtmikA vidyA jyotIrUpA.amR^itAkSharA || 12.65||
shAntiH pratiShThA sarveShAM nivR^ittiramR^itapradA |
vyomamUrtirvyomalayA vyomAdhArA.achyutA.amarA || 12.66||
anAdinidhanA.amoghA kAraNAtmAkulAkulA |
svataH prathamajAnAbhiramR^itasyAtmasaMshrayA || 12.67||
prANeshvarapriyA mAtA mahAmahiShaghAtinI |
prANeshvarI prANarUpA pradhAnapuruSheshvarI || 12.68||
mahAmAyA suduShpUrA mUlaprakR^itirIshvarI
sarvashaktikalAkArA jyotsnA dyormahimAspadA || 12.69||
sarvakAryaniyantrI cha sarvabhUteshvareshvarI |
saMsArayoniH sakalA sarvashaktisamudbhavA || 12.70||
saMsArapotA durvArA durnirIkShya durAsadA |
prANashaktiH prANavidyA yoganIparamA kalA || 12.71||
mahavibhUtidurdarShA mUlaprakR^itisambhavA |
anAdyanantavibhavA paramAdyApakarShiNI || 12.72||
sargasthityantakaraNI sudurvAchyAduratyayA |
shabdayoniH shabdamayI nAdAkhyA nAdavigrahA || 12.73||
anAdiravyaktaguNA mahAnandA sanAtanI |
AkAshayoniryogasthA mahAyogeshvareshvarI || 12.74||
mahAmAyA suduShpArA mUlaprakR^itirIshvarI
pradhAnapuruShAtItA pradhAnapuruShAtmikA || 12.75||
purANI chinmayI puMsAmAdiH puruSharUpiNI |
bhUtAntarAtmA kUTasthA mahApuruShasaMj~nitA || 12.76||
janmamR^ityujarAtItA sarvashaktisamanvitA |
vyApinI chAnavachChinnA pradhAnAnupraveshinI || 12.77||
kShetraj~nashaktiravyaktalakShaNA malavarjitA |
anAdimAyAsaMbhinnA tritattvA prakR^itigrahA || 12.78||
mahAmAyAsamutpannA tAmasI pauruShI dhruvA |
vyaktAvyaktAtmikA kR^iShNA raktA shuklA prasUtikA || 12.79||
akAryA kAryajananI nityaM prasavadharmiNI |
sargapralayanirmuktA sR^iShTisthityantadharmiNI || 12.80||
brahmagarbhA chaturvishA padmanAbhA.achyutAtmikA |
vaidyutI shAshvatI yonirjaganmAteshvarapriyA || 12.81||
sarvAdhArA mahArUpA sarvaishvaryasamanvitA |
vishvarUpA mahAgarbhA vishveshechChAnuvartinI || 12.82||
mahIyasI brahmayoniH mahAlakShmIsamudbhavA
mahAvimAnamadhyasthA mahAnidrAtmahetukA || 12.83||
sarvasAdhAraNI sUkShmA hyavidyA pAramArthikA |
anantarUpA.anantasthA devI puruShamohinI || 12.84||
anekAkArasaMsthAnA kAlatrayavivarjitA |
brahmajanmA harermUrtirbrahmaviShNushivAtmikA || 12.85||
brahmeshaviShNujananI brahmAkhyA brahmasaMshrayA |
vyaktA prathamajA brAhmI mahatI j~nAnarUpiNI || 12.86||
vairAgyaishvaryadharmAtmA brahmamUrtirhR^idisthitA |
apAMyoniH svayaMbhUtirmAnasI tattvasaMbhavA || 12.87||
IshvarANI cha sharvANI shaMkarArddhasharIriNI |
bhavAnI chaiva rudrANI mahAlakShmIrathAmbikA || 12.88||
maheshvarasamutpannA bhuktimuktiphalapradA |
sarveshvarI sarvavandyA nityaM muditamAnasA || 12.89||
brahmendropendranamitA shaMkarechChAnuvartinI |
IshvarArddhAsanagatA maheshvarapativratA || 12.90||
sakR^idvibhAtA sarvArti samudraparishoShiNI |
pArvatI himavatputrI paramAnandadAyinI || 12.91||
guNADhyA yogajA yogyA j~nAnamUrtirvikAsinI |
sAvitrIkamalA lakShmIH shrIranantorasi sthitA || 12.92||
sarojanilayA mudrA yoganidrA surArdinI |
sarasvatI sarvavidyA jagajjyeShThA suma~NgalA || 12.93||
vAgdevI varadA vAchyA kIrtiH sarvArthasAdhikA |
yogIshvarI brahmavidyA mahAvidyA sushobhanA || 12.94||
guhyavidyAtmavidyA cha dharmavidyAtmabhAvitA |
svAhA vishvaMbharA siddhiH svadhA medhA dhR^itiH shrutiH || 12.95||
nItiH sunItiH sukR^itirmAdhavI naravAhinI |
pUjyA vibhAvarI saumyA bhoginI bhogashAyinI || 12.96||
shobhA vaMshakarI lolA mAlinI parameShThinI |
trailokyasundarI ramyA sundarI kAmachAriNI || 12.97||
mahAnubhAvA sattvasthA mahAmahiShamardinI |
padmamAlA pApaharA vichitrA mukuTAnanA || 12.98||
kAntA chitrAmbaradharA divyAbaraNabhUShitA |
haMsAkhyA vyomanilayA jagatsR^iShTivivarddhinI || 12.99||
niryantrA yantravAhasthA nandinI bhadrakAlikA |
AdityavarNA kaumArI mayUravaravAhanA || 12.100||
vR^iShAsanagatA gaurI mahAkAlI surArchitA |
aditirniyatA raudrA padmagarbhA vivAhanA || 12.101||
virUpAkShI lelihAnA mahApuranivAsinI |
mahAphalA.anavadyA~NgI kAmarupA vibhAvarI || 12.102||
vichitraratnamukuTA praNatArtiprabha~njanI |
kaushikI karShaNI rAtristridashArtivinAshinI || 12.103||
bahurUpA svarUpA cha virUpA rUpavarjitA |
bhaktArtishamanI bhavyA bhavabhAravinAshanI || 12.104||
nirguNA nityavibhavA niHsArA nirapatrapA |
yashasvinI sAmagItirbhavA~NganilayAlayA || 12.105||
dIkShA vidyAdharI dIptA mahendravinipAtinI |
sarvAtishAyinI vishvA sarvasiddhipradAyinI || 12.106||
sarveshvarapriyA bhAryA samudrAntaravAsinI |
akala~NkA nirAdhArA nityasiddhA nirAmayA || 12.107||
kAmadhenurbR^ihadgarbhA dhImatI mohanAshinI |
niHsa~NkalpA nirAta~NkA vinayA vinayapriyA || 12.108||
jvAlAmAlAsahasrADhyA devadevI manomayI |
mahAbhagavatI bhargA vAsudevasamudbhavA || 12.109||
mahendropendrabhaginI bhaktigamyA parAvarA |
j~nAnaj~neyA jarAtItA vedAntaviShayA gatiH || 12.110||
dakShiNA dahanA mAyA sarvabhUtanamaskR^itA |
yogamAyA vibhAgaj~nA mahAmohA mahIyasI || 12.111||
saMdhyA sarvasamudbhUtirbrahmavR^ikShAshrayAnatiH |
bIjA~NkurasamudbhUtirmahAshaktirmahAmatiH || 12.112||
khyAtiH praj~nA chitiH saMchchinmahAbhogIndrashAyinI |
vikR^itiH shAMsarI shAstirgaNagandharvasevitA || 12.113||
vaishvAnarI mahAshAlA devasenA guhapriyA |
mahArAtriH shivAmandA shachI duHsvapnanAshinI || 12.114||
ijyA pUjyA jagaddhAtrI durvij~neyA surUpiNI |
tapasvinI samAdhisthA trinetrA divi saMsthitA || 12.115||
guhAmbikA guNotpattirmahApIThA marutsutA |
havyavAhAntarAgAdiH havyavAhasamudbhavA || 12.116||
jagadyonirjaganmAtA janmamR^ityujarAtigA |
buddhimAtA buddhimatI puruShAntaravAsinI || 12.117||
tarasvinI samAdhisthA trinetrA divisaMsthitA |
sarvendriyamanomAtA sarvabhUtahR^idi sthitA || 12.118||
saMsAratAriNI vidyA brahmavAdimanolayA |
brahmANI bR^ihatI brAhmI brahmabhUtA bhavAraNI || 12.119||
hiraNmayI mahArAtriH saMsAraparivarttikA |
sumAlinI surUpA cha bhAvinI tAriNI prabhA || 12.120||
unmIlanI sarvasahA sarvapratyayasAkShiNI |
susaumyA chandravadanA tANDavAsaktamAnasA || 12.121||
sattvashuddhikarI shuddhirmalatrayavinAshinI |
jagatpriyA jaganmUrtistrimUrtiramR^itAsh || 12.122||
nirAshrayA nirAhArA nira~NkuravanodbhavA |
chandrahastA vichitrA~NgI sragviNI padmadhAriNI || 12.123||
parAvaravidhAnaj~nA mahApuruShapUrvajA |
vidyeshvarapriyA vidyA vidyujjihvA jitashramA || 12.124||
vidyAmayI sahasrAkShI sahasravadanAtmajA |
sahasrarashmiH sattvasthA maheshvarapadAshrayA || 12.125||
kShAlinI sanmayI vyAptA taijasI padmabodhikA |
mahAmAyAshrayA mAnyA mahAdevamanoramA || 12.126||
vyomalakShmIH siharathA chekitAnAmitaprabhA |
vIreshvarI vimAnasthA vishokAshokanAshinI || 12.127||
anAhatA kuNDalinI nalinI padmavAsinI |
sadAnandA sadAkIrtiH sarvabhUtAshrayasthitA || 12.128||
vAgdevatA brahmakalA kalAtItA kalAraNI |
brahmashrIrbrahmahR^idayA brahmaviShNushivapriyA || 12.129||
vyomashaktiH kriyAshaktirj~nAnashaktiH parAgatiH |
kShobhikA bandhikA bhedyA bhedAbhedavivarjitA || 12.130||
abhinnAbhinnasaMsthAnA vaMshinI vaMshahAriNI |
guhyashaktirguNAtItA sarvadA sarvatomukhI || 12.131||
bhaginI bhagavatpatnI sakalA kAlakAriNI |
sarvavit sarvatobhadrA guhyAtItA guhAvaliH || 12.132||
prakriyA yogamAtA cha ga~NgA vishveshvareshvarI |
kapilA kApilA kAntAkanakAbhAkalAntarA || 12.133||
puNyA puShkariNI bhoktrI puraMdarapurassarA |
poShaNI paramaishvaryabhUtidA bhUtibhUShaNA || 12.134||
pa~nchabrahmasamutpattiH paramArthArthavigrahA |
dharmodayA bhAnumatI yogij~neya manojavA || 12.135||
manoharA manorasthA tApasI vedarUpiNI |
vedashaktirvedamAtA vedavidyAprakAshinI || 12.136||
yogeshvareshvarI mAtA mahAshaktirmanomayI |
vishvAvasthA viyanmUrttirvidyunmAlA vihAyasI || 12.137||
kiMnarI surabhirvandyA nandinI nandivallabhA |
bhAratI paramAnandA parAparavibhedikA || 12.138||
sarvapraharaNopetA kAmyA kAmeshvareshvarI |
achintyA.achintyavibhavA hR^illekhA kanakaprabhA 12.139||
kUShmANDI dhanaratnADhyA sugandhA gandhAyinI |
trivikramapadodbhUtA dhanuShpANiH shivodayA || 12.140||
sudurlabhA dhanAdyakShA dhanyA pi~NgalalochanA |
shAntiH prabhAvatI dIptiH pa~NkajAyatalochanA || 12.141||
AdyA hR^itkamalodbhUtA gavAM matA raNapriyA |
satkriyA girijA shudirnityapuShTA nirantarA || 12.142||
durgAkAtyAyanIchaNDI charchikA shAntavigrahA |
hiraNyavarNA rajanI jagadyantrapravartikA || 12.143||
mandarAdrinivAsA cha shAradA svarNamAlinI |
ratnamAlA ratnagarbhA pR^ithvI vishvapramAthinI || 12.144||
padmAnanA padmanibhA nityatuShTA.amR^itodbhavA |
dhunvatI duHprakampA cha sUryamAtA dR^iShadvatI || 12.145||
mahendrabhaginI mAnyA vareNyA varadayikA |
kalyANI kamalAvAsA pa~nchachUDA varapradA || 12.146||
vAchyA vareshvarI vandyA durjayA duratikramA |
kAlarAtrirmahAvegA vIrabhadrapriyA hitA || 12.147||
bhadrakAlI jaganmAtA bhaktAnAM bhadradAyinI |
karAlA pi~NgalAkArA kAmabhedA.amahAmadA || 12.148||
yashasvinI yashodA cha ShaDadhvaparivarttikA |
sha~NkhinI padminI sAMkhyA sAMkhyayogapravartikA || 12.149||
chaitrA saMvatsarArUDhA jagatsampUraNIdhvajA |
shumbhAriH khecharIsvasthA kambugrIvAkalipriyA || 12.150||
khagadhvajA khagArUDhA parAryA paramAlinI |
aishvaryapadmanilayA viraktA garuDAsanA || 12.151||
jayantI hR^idguhA gamyA gahvareShThA gaNAgraNIH |
saMkalpasiddhA sAmyasthA sarvavij~nAnadAyinI || 12.152||
kalikalpavihantrI cha guhyopaniShaduttamA |
niShThA dR^iShTiH smR^itirvyAptiH puShTistuShTiH kriyAvatI || 12.153||
vishvAmareshvareshAnA bhuktirmuktiH shivA.amR^itA |
lohitA sarpamAlA cha bhIShaNI vanamAlinI || 12.154||
anantashayanA.anantA naranArAyaNodbhavA |
nR^isiMhI daityamathanI sha~NkhachakragadAdharA || 12.155||
saMkarShaNasamutpattirambikApAdasaMshrayA |
mahAjvAlA mahAmUrttiH sumUrttiH sarvakAmadhuk || 12.156||
suprabhA sustanA saurI dharmakAmArthamokShadA |
bhrUmadhyanilayA pUrvA purANapuruShAraNiH || 12.157||
mahAvibhUtidA madhyA sarojanayanA samA |
aShTAdashabhujAnAdyA nIlotpaladalaprabha12.158||
sarvashaktyAsanArUDhA sarvadharmArthavarjitA |
vairAgyaj~nAnaniratA nirAlokA nirindriyA || 12.159||
vichitragahanAdhArA shAshvatasthAnavAsinI |
sthAneshvarI nirAnandA trishUlavaradhAriNI || 12.160||
asheShadevatAmUrttirdevatA varadevatA |
gaNAmbikA gireH putrI nishumbhavinipAtinI || 12.161||
avarNA varNarahitA trivarNA jIvasaMbhavA |
anantavarNA.ananyasthA shaMkarI shAntamAnasA || 12.162||
agotrA gomatI goptrI guhyarUpA guNottarA |
gaurgIrgavyapriyA gauNI gaNeshvaranamaskR^itA || 12.163||
satyamAtA satyasaMdhA trisaMdhyA saMdhivarjitA |
sarvavAdAshrayA sAMkhyA sAMkhyayogasamudbhavA || 12.164||
asaMkhyeyA.aprameyAkhyA shUnyA shuddhakulodbhavA |
bindunAdasamutpattiH shaMbhuvAmA shashiprabhA || 12.165||
piSha~NgA bhedarahitA manoj~nA madhusUdanI |
mahAshrIH shrIsamutpattistamaHpAre pratiShThitA || 12.166||
tritattvamAtA trividhA susUkShmapadasaMshrayA |
shantA bhItA malAtItA nirvikArA nirAshrayA || 12.167||
shivAkhyA chittanilayA shivaj~nAnasvarUpiNI |
daityadAnavanirmAtrI kAshyapI kAlakarNikA || 12.168||
shAstrayoniH kriyAmUrtishchaturvargapradarshikA |
nArAyaNI narodbhUtiH kaumudI li~NgadhAriNI || 12.169||
kAmukI lalitAbhAvA parAparavibhUtidA |
parAntajAtamahimA baDavA vAmalochanA || 12.170||
subhadrA devakI sItA vedavedA~NgapAragA |
manasvinI manyumAtA mahAmanyusamudbhavA || 12.171||
amR^ityuramR^itAsvAdA puruhUtA puruShTutA |
ashochyA bhinnaviShayA hiraNyarajatapriyA || 12.172||
hiraNyA rAjatI haimA hemAbharaNabhUShitA |
vibhrAjamAnA durj~neyA jyotiShTomaphalapradA || 12.173||
mahAnidrAsamudbhUtiranidrA satyadevatA |
dIrghAkakudminI hR^idyA shAntidA shAntivarddhinI || 12.174||
lakShmyAdishaktijananI shaktichakrapravartikA |
trishaktijananI janyA ShaDUrmiparivarjitA || 12.175||
sudhAmA karmakaraNI yugAntadahanAtmikA |
saMkarShaNI jagaddhAtrI kAmayoniH kirITinI || 12.176||
aindrI trailokyanamitA vaiShNavI parameshvarI |
pradyumnadayitA dAtrI yugmadR^iShTistrilochanA || 12.177||
madotkaTA haMsagatiH prachaNDA chaNDavikramA |
vR^iShAveshA viyanmAtA vindhyaparvatavAsinI || 12.178||
himavanmerunilayA kailAsagirivAsinI |
chANUrahantR^itanayA nItij~nA kAmarUpiNI || 12.179||
vedavidyAvratasnAtA dharmashIlA.anilAshanA |
vIrabhadrapriyA vIrA mahAkAmasamudbhavA || 12.180||
vidyAdharapriyA siddhA vidyAdharanirAkR^itiH |
ApyAyanI harantI cha pAvanI poShaNI kalA || 12.181||
mAtR^ikA manmathodbhUtA vArijA vAhanapriyA |
karIShiNI sudhAvANI vINAvAdanatatparA || 12.182||
sevitA sevikA sevyA sinIvAlI garutmatI |
arundhatI hiraNyAkShI mR^igAMkA mAnadAyinI || 12.183||
vasupradA vasumatI vasorddhArA vasuMdharA |
dhArAdharA varArohA varAvarasahasradA || 12.184||
shrIphalA shrImatI shrIshA shrInivAsA shivapriyA |
shrIdharA shrIkarI kalyA shrIdharArddhasharIriNI || 12.185||
anantadR^iShTirakShudrA dhAtrIshA dhanadapriyA |
nihantrI daityasa~NghAnAM sihikA sihavAhanA || 12.186||
suSheNA chandranilayA sukIrtishChinnasaMshayA |
rasaj~nA rasadA rAmA lelihAnAmR^itasravA || 12.187||
nityoditA svayaMjyotirutsukA mR^itajIvanA |
vajradaNDA vajrajihvA vaidehI vajravigrahA || 12.188||
ma~NgalyA ma~NgalA mAlA malinA malahAriNI |
gAndharvI gAruDI chAndrI kambalAshvatarapriyA || 12.189||
saudAminI janAnandA bhrukuTIkuTilAnanA |
karNikArakarA kakShyA kaMsaprANApahAriNI || 12.190||
yugaMdharA yugAvarttA trisaMdhyA harShavarddhanI |
pratyakShadevatA divyA divyagandhA divA parA || 12.191||
shakrAsanagatA shAkrI sAndhyA chArusharAsanA |
iShTA vishiShTA shiShTeShTA shiShTAshiShTaprapUjitA || 12.192||
shatarUpA shatAvarttA vinatA surabhiH surA |
surendramAtA sudyumnA suShumnA sUryasaMsthitA || 12.193||
samIkShyA satpratiShThA cha nivR^ittirj~nAnapAragA |
dharmashAstrArthakushalA dharmaj~nA dharmavAhanA || 12.194||
dharmAdharmavinirmAtrI dhArmikANAM shivapradA |
dharmashaktirdharmamayI vidharmA vishvadharmiNI || 12.195||
dharmAntarA dharmamayI dharmapUrvA dhanAvahA |
dharmopadeShTrI dharmatmA dharmagamyA dharAdharA || 12.196||
kApAlI shakalA mUrttiH kalA kalitavigrahA |
sarvashaktivinirmuktA sarvashaktyAshrayAshrayA || 12.197||
sarvA sarveshvarI sUkShmA sUkShmAj~nAnasvarUpiNI |
pradhAnapuruShesheShA mahAdevaikasAkShiNI || 12.198||
sadAshivA viyanmUrttirvishvamUrttiramUrttikA |
evaM nAmnAM sahasreNa stutvA.asau himavAn giriH || 12.199||
bhUyaH praNamya bhItAtmA provAchedaM kR^itA~njaliH |
yadetadaishvaraM rUpaM ghoraM te parameshvari || 12.200||
bhIto.asmi sAmprataM dR^iShTvA rUpamanyat pradarshaya |
evamuktA.atha sA devI tena shailena pArvatI || 12.201||
saMhR^itya darshayAmAsa svarUpamaparaM punaH |
nIlotpaladalaprakhyaM nIlotpalasugandhikam || 12.202||
dvinetraM dvibhujaM saumyaM nIlAlakavibhUShitam |
raktapAdAmbujatalaM suraktakarapallavam || 12.203||
shrImadvishAlasaMvR^ittaMlalATatilakojjvalam |
bhUShitaM chArusarvA~NgaM bhUShaNairatikomalam || 12.204||
dadhAnamurasA mAlAM vishAlAM hemanirmitAm |
IShatsmitaM subimboShThaM nUpurArAvasaMyutam || 12.205||
prasannavadanaM divyamanantamahimAspadam |
tadIdR^ishaM samAlokya svarUpaM shailasattamaH || 12.206||
bhItiM saMtyajya hR^iShTAtmA babhAShe parameshvarIm |
himavAnuvAcha
adya me saphalaM janma adya me saphalaM tapaH || 12.207||
yanme sAkShAttvamavyaktA prasannA dR^iShTigocharA |
tvayA sR^iShTaM jagat sarvaM pradhAnAdyaM tvayi sthitam || 12.208||
tvayyeva lIyate devi tvameva cha parA gatiH |
vadanti kechit tvAmeva prakR^itiM prakR^iteH parAm || 12.209||
apare paramArthaj~nAH shiveti shivasaMshrayAt |
tvayi pradhAnaM puruSho mahAn brahmA tatheshvaraH || 12.210||
avidyA niyatirmAyA kalAdyAH shatasho.abhavan |
tvaM hi sA paramA shaktiranantA parameShThinI || 12.211||
sarvabhedavinirmuktA sarvebhedAshrayAshrayA |
tvAmadhiShThAya yogeshi mahAdevo maheshvaraH || 12.212||
pradhAnAdyaM jagat kR^itsnaM karoti vikaroti cha |
tvayaiva saMgato devaH svamAnandaM samashnute || 12.213||
tvameva paramAnandastvamevAnandadAyinI |
tvamakSharaM paraM vyoma mahajjyotirnira~njanam || 12.214||
shivaM sarvagataM sUkShmaM paraM brahma sanAtanam |
tvaM shakraH sarvadevAnAM brahmA brahmavidAmasi || 12.215||
vAyurbalavatAM devi yoginAM tvaM kumArakaH |
R^iShINAM cha vasiShThastvaM vyAso vedavidAmasi || 12.216||
sAMkhyAnAM kapilo devo rudrANAmasi shaMkaraH |
AdityAnAmupendrastvaM vasUnAM chaiva pAvakaH || 12.217||
vedAnAM sAmavedastvaM gAyatrI ChandasAmasi |
adhyAtmavidyA vidyAnAM gatInAM paramA gatiH || 12.218||
mAyA tvaM sarvashaktInAM kAlaH kalayatAmasi |
o~NkAraH sarvaguhyAnAM varNAnAM cha dvijAttamaH || 12.219||
AshramANAM cha gArhasthyamIshvarANAM maheshvaraH |
puMsAM tvamekaH puruShaH sarvabhUtahR^idi sthitaH || 12.220||
sarvopaniShadAM devi guhyopaniShaduchyate |
IshAnashchAsi kalpAnAM yugAnAM kR^itameva cha || 12.221||
AdityaH sarvamArgANAM vAchAM devi sarasvatI |
tvaM lakShmIshchArurUpANAM viShNurmAyAvinAmasi || 12.222||
arundhatI satInAM tvaM suparNaH patatAmasi |
sUktAnAM pauruShaM sUktaM sAma jyeShTaM cha sAmasu || 12.223||
sAvitrI chAsi jApyAnAM yajuShAM shatarudriyam |
parvatAnAM mahAmerurananto bhoginAmasi || 12.224||
sarveShAM tvaM paraM brahma tvanmayaM sarvameva hi || 12.225||
rUpaM tavAsheShakalAvihIna-
magocharaM nirmalamekarUpam |
anAdimadhyAntamanantAmAdyaM
namAmi satyaM tamasaH parastAt || 12.226||
yadeva pashyanti jagatprasUtiM
vedAntavij~nAnavinishchitArthAH |
AnandamAtraM praNavAbhidhAnaM
tadeva rUpaM sharaNaM prapadye || 12.227||
asheShabhUtAntarasanniviShTaM
pradhAnapuMyogaviyogahetum |
tejomayaM janmavinAshahInaM
prANAbhidhAnaM praNato.asmi rUpam || 12.228||
AdyantahInaM jagadAtmabhUtaM
vibhinnasaMsthaM prakR^iteH parastAt |
kUTasthamavyaktavapustathaiva
namAmi rUpaM puruShAbhidhAnam || 12.229||
sarvAshrayaM sarvajagadvidhAnaM
sarvatragaM janmavinAshahInam |
sUkShmaM vichitraM triguNaM pradhAnaM
nato.asmi te rUpamarUpabhedam || 12.230||
AdyaM mahAntaM puruShAtmarUpaM
prakR^ityavasthaM triguNAtmabIjam |
aishvaryavij~nAnavirAgadharmaiH
samanvitaM devi nato.asmi rUpam || 12.231||
dvisaptalokAtmakamambusaMsthaM
vichitrabhedaM puruShaikanAtham |
anantabhUtairadhivAsitaM te
nato.asmi rUpaM jagadaNDasaMj~nam || 12.231||
asheShavedAtmakamekamAdyaM
svatejasA pUritalokabhedam |
trikAlahetuM parameShThisaMj~naM
namAmi rUpaM ravimaNDalastham || 12.232||
sahasramUrdhAnamanantashaktiM
sahasrabAhuM puruShaM purANam |
shayAnamantaH salile tathaiva
nArAyaNAkhyaM praNato.asmi rUpam || 12.233||
daMShTrAkarAlaM tridashAbhivandyaM
yugAntakAlAnalakalparUpam |
asheShabhUtANDavinAshahetuM
namAmi rUpaM tava kAlasaMj~nam || 12.234||
phaNAsahasreNa virAjamAnaM
bhogIndramukhyairabhipUjyamAnam |
janArdanArUDhatanuM prasuptaM
nato.asmi rUpaM tava sheShasaMj~nam || 12.235||
avyAhataishvaryamayugmanetraM
brahmAmR^itAnandarasaj~namekam |
yugAntasheShaM divi nR^ityamAnaM
nato.asmi rUpaM tava rudrasaMj~nam || 12.236||
prahINashokaM vimalaM pavitraM
surAsurairarchitApAdapadmam |
sukomalaM devi vibhAsi shubhraM
namAmi te rUpamidaM bhavAni || 12.237||
OM namaste.astu mahAdevi namaste parameshvari |
namo bhagavatIshAni shivAyai te namo namaH || 12.238||
tvanmayo.ahaM tvadAdhArastvameva cha gatirmama |
tvAmeva sharaNaM yAsye prasIda parameshvari || 12.239||
mayA nAsti samo loke devo vA dAnavo.api vA |
jaganmAtaiva matputrI saMbhUtA tapasA yataH || 12.240||
eShA tavAmbikA devi kilAbhUtpitR^ikanyakA |
menA.asheShajaganmAturaho puNyasya gauravam || 12.241||
pAhi mAmamareshAni menayA saha sarvadA |
namAmi tava pAdAbjaM vrajAmi sharaNaM shivAm || 12.242||
aho me sumahad bhAgyaM mahAdevIsamAgamAt |
Aj~nApaya mahAdevi kiM kariShyAmi shaMkari || 12.243||
etAvaduktvA vachanaM tadA himagirIshvaraH |
samprekShaNamANo girijAM prA~njaliH pArshvato.abhavat || 12.244||
atha sA tasya vachanaM nishamya jagato.araNiH |
sasmitaM prAha pitaraM smR^itvA pashupatiM patim || 12.246||
devyuvAcha
shR^iNuShva chaitat prathamaM guhyamIshvaragocharam |
upadeshaM girishreShTha sevitaM brahmavAdibhiH || 12.247||
yanme sAkShAt paraM rUpamaishvaraM dR^iShTamadbhutam |
sarvashaktisamAyuktamanantaM prerakaM param || 12.248||
shAntaH samAhitamanA dambhAhaMkAravarjitaH |
tanniShThastatparo bhUtvA tadeva sharaNaM vraja || 12.249||
bhaktyA tvananyayA tAta padbhAvaM paramAshritaH |
sarvayaj~natapodAnaistadevArchchaya sarvadA || 12.250||
tadeva manasA pashya tad dhyAyasva yajasva cha |
mamopadeshAtsaMsAraM nAshayAmi tavAnagha || 12.251||
ahaM vai matparAn bhaktAnaishvaraM yogamAsthitAn |
saMsArasAgarAdasmAduddharAmyachireNa tu || 12.252||
dhyAnena karmayogena bhaktyA j~nAnena chaiva hi |
prApyA.ahaM te girishreShTha nAnyathA karmakoTibhiH || 12.253||
shrutismR^ityuditaM samyak karma varNAshramAtmakam |
adhyAtmaj~nAnasahitaM muktaye satataM kuru || 12.254||
dharmAtsaMjAyate bhaktirbhaktyA samprApyate param |
shrutismR^itibhyAmudito dharmo yaj~nAdiko mataH || 12.255||
nAnyato jAyate dharmo vedAd dharmo hi nirbabhau |
tasmAnmumukShurdharmArthI madrUpaM vedamAshrayet || 12.256||
mamaivaiShA parA shaktirvedasaMj~nA purAtanI |
R^igyajuH sAmarUpeNa sargAdau sampravarttate || 12.257||
teShAmeva cha guptyarthaM vedAnAM bhagavAnajaH |
brAhmaNAdIn sasarjAtha sve sve karmaNyayojayat || 12.258||
ye na kurvanti tad dharmaM tadarthaM brahmanirmitAH |
teShAmadhastAd narakAMstAmistrAdInakalpayat || 12.259||
na cha vedAdR^ite ki~nchichChAstraM dharmAbhidhAyakam |
yo.anyatraramateso.asau na saMbhAShyo dvijAtibhiH || 12.260||
yAni shAstrANi dR^ishyante loke.asmin vividhAnitu |
shrutismR^itiviruddhAni niShThA teShAM hi tAmasI || 12.261||
kApAlaM pa~ncharAtraM cha yAmalaM vAmamArhatam |
evaMvidhAni chAnyAni mohanArthAni tAni tu || 12.262||
ye kushAstrAbhiyogena mohayantIha mAnavAn |
mayA sR^iShTAni shAstrANi mohAyaiShAM bhavAntare || 12.263||
vedArthavittamaiH kAryaM yat smR^itaM karma vaidikam |
tatprayatnena kurvanti matpriyAste hi ye narAH || 12.264||
varNAnAmanukampArthaM manniyogAdvirAT svayam |
svAyaMbhuvo manurdhArmAn munInAM pUrvamuktavAn || 12.265||
shrutvA chAnye.api munayastanmukhAd dharmamuttamam |
chakrurdharmapratiShThArthaM dharmashAstrANi chaiva hi || 12.266||
teShu chAntarhiteShvevaM yugAnteShu maharShayaH |
brahmaNo vachanAttAni kariShyanti yuge yuge || 12.267||
aShTAdasha purANAni vyAsena kathitAni tu |
niyogAd brahmaNo rAjaMsteShu dharmaH pratiShThitaH || 12.268||
anyAnyupapurANAni tachChiShyaiH kathitAni tu |
yuge yuge.atra sarveShAM kartA vai dharmashAstravit || 12.269||
shikShA kalpo vyAkaraNaM niruktaM Chanda eva cha |
jyotiH shAstraM nyAyavidyA mImAMsA chopabR^iMhaNam || 12.270||
evaM chaturdashaitAni vidyAsthAnAni sattama |
chaturvedaiH sahoktAni dharmo nAnyatra vidyate || 12.271||
evaM paitAmahaM dharmaM manuvyAsAdayaH param |
sthApayanti mamAdeshAd yAvadAbhUtasamplavam || 12.272||
brahmaNA saha te sarve samprApte pratisaMchare |
parasyAnte kR^itAtmAnaH pravishanti paraM padam || 12.273||
tasmAt sarvaprayatnena dharmArthaM vedamAshrayet |
dharmeNa sahitaM j~nAnaM paraM brahma prakAshayet || 12.274||
ye tu sa~NgAn parityajya mAmeva sharaNaM gatAH |
upAsate sadA bhaktyA yogamaishvaramAsthitAH || 12.275||
sarvabhUtadayAvantaH shAntA dAntA vimatsarAH |
amAnino buddhimantastApasAH shaMsitavratAH || 12.276||
machchittA madgataprANA majj~nAnakathane ratAH |
saMnyAsino gR^ihasthAshcha vanasthA brahmachAriNaH || 12.277||
teShAM nityAbhiyuktAnAM mAyAtattvaM samutthitam |
nAshayAmi tamaH kR^itsnaM j~nAnadIpena mA chirAt || 12.278||
te sunirdhUtatamaso j~nAnenaikena manmayAH |
sadAnandAstu saMsAre na jAyante punaH punaH || 12.279||
tasmAt sarvaprakAreNa madbhakto matparAyaNaH |
mAmevArchaya sarvatra manasA sharaNaM gataH || 12.280||
ashakto yadi me dhyAtumaishvaraM rUpamavyayam |
tato me sakalaM rUpaM kAlAdyaM sharaNaM vraja || 12.281||
yadyat svarUpaM me tAta manaso gocharaM tava |
tanniShThastatparo bhUtvA tadarchanaparo bhava || 12.282||
yattu me niShkalaM rUpaM chinmAtraM kevalaM shivam |
sarvopAdhivinirmuktamanantamamR^itaM param || 12.283||
j~nAnenaikena tallabhyaM kleshena paramaM padam |
j~nAnameva prapashyanto mAmeva pravishanti te || 12.284||
tadbuddhayastadAtmAnastanniShThAstatparAyaNAH |
gachChantyapunarAvR^ittiM j~nAnanirdhUtakalmaShAH || 12.285||
mAmanAshritya paramaM nirvANamamalaM padam |
prApyate na hi rAjendra tato mAM sharaNaM vraja || 12.286||
ekatvena pR^ithaktvena tathA chobhayathApi vA |
mAmupAsya mahArAja tato yAsyAsi tatpadam || 12.287||
mAmanAshritya tattattvaM svabhAvavimalaM shivam |
j~nAyate na hi rAjendra tato mAM sharaNaM vraja || 12.288||
tasmAt tvamakSharaM rUpaM nityaM chArUpamaishvaram |
ArAdhaya prayatnena tato bandhaM prahAsyasi || 12.289||
karmaNA manasA vAchA shivaM sarvatra sarvadA |
samArAdhaya bhAvena tato yAsyasi tatpadam || 12.290||
na vai pashyanti tattattvaM mohitA mama mAyayA |
anAdyanantaM paramaM maheshvaramajaM shivam || 12.291||
sarvabhUtAtmabhUtasthaM sarvAdhAraM nira~njanam |
nityAnandaM nirAbhAsaM nirguNaM tamasaH param || 12.292||
advaitamachalaM brahma niShkalaM niShprapa~nchakam |
svasaMvedyamavedyaM tat pare vyomni vyavasthitam || 12.293||
sUkShmeNa tamasA nityaM veShTitA mama mAyayA |
saMsArasAgare ghore jAyante cha punaH punaH || 12.294||
bhaktyA tvananyayA rAjan samyag j~nAnena chaiva hi |
anveShTavyaM hi tad brahma janmabandhanivR^ittaye || 12.295||
ahaMkAraM cha mAtsaryaM kAmaM krodhaparigraham |
adharmAbhiniveshaM cha tyaktvA vairAgyamAsthitaH || 12.296||
sarvabhUteShu chAtmAnaM sarvabhUtAni chAtmani |
anvIkShya chAtmanAtmAnaM brahmabhUyAya kalpate || 12.297||
brahmabhUtaH prasannAtmA sarvabhUtAbhayapradaH |
aishvarIM paramAM bhaktiM vindetAnanyagAminIm || 12.298||
vIkShate tatparaM tattvamaishvaraM brahmaniShkalam |
sarvasaMsAranirmukto brahmaNeyavAvatiShThate || 12.299||
brahmaNo hi pratiShThA.ayaM parasya paramaH shivaH |
ananyashchAvyayaschaikashchAtmAdhAro maheshvaraH || 12.300||
j~nAnena karmayogena bhaktiyogena vA nR^ipa |
sarvasaMsAramuktyarthamIshvaraM sharaNaM vraja || 12.301||
eSha guhyopadeshaste mayA datto girIshvara |
anvIkShya chaitadakhilaM yatheShTaM karttumarhasi || 12.302||
ahaM vai yAchitA devaiH saMjAtA parameshvarAt |
vinindya dakShaM pitaraM maheshvaravinindakam || 12.303||
dharmasaMsthApanArthAya tavArAdhanakAraNAt |
menAdehasamutpannA tvAmeva pitaraM shritA || 12.304||
sa tvaM niyogAddevasya brahmaNaH paramAtmanaH |
pridAsyase mAM rudrAya svayaMvarasamAgame || 12.305||
tatsaMbandhAchcha te rAjan sarve devAH savAsavAH |
tvAM namasyanti vai tAta prasIdati cha shaMkaraH || 12.306||
tasmAtsarvaprayatnena mAM viddhIshvaragocharAm |
sampUjya devamIshAnaM sharaNyaM sharaNaM vraja || 12.307||
sa evamukto bhagavAn devadevyA girIshvaraH |
praNamya shirasA devIM prA~njaliH punarabravIt || 12.308||
vistareNa maheshAni yogaM mAheshvaraM param |
j~nAnaM vai chAtmano yogaM sAdhanAni prachakShva me || 12.309||
tasyaitat paramaM j~nAnamAtmayogamuttamam |
yathAvad vyAjahAreshAsAdhanAnicha vistarAt || 12.310||
nishamya vadanAmbhojAd girIndro lokapUjitaH |
lokamAtuH paraM j~nAnaM yogAsakto.abhavatpunaH || 12.311||
pradadau cha maheshAya pArvatIM bhAgyagauravAt |
niyogAdbrahmaNaH sAdhvIM devAnAM chaiva saMnidhau || 12.312||
ya imaM paThate.adhyAyaM devyA mAhAtmyakIrtanam |
shivasya saMnidhau bhaktyA suchistadbhAvabhAvitaH || 12.313||
sarvapApavinirmukto divyayogasamanvitaH |
ulla~Nghya brahmaNo lokaM devyAH sthAnamavApnuyAt || 12.314||
yashchaitat paThati stotraM brAhmaNAnAM samIpataH |
samAhitamanAH so.api sarvapApaiH pramuchyate || 12.315||
nAmnAmaShTasahasraM tu devyA yat samudIritam |
j~nAtvA.arkamaNDalagatAM saMbhAvya parameshvarIm || 12.316||
abhyarchya gandhapuShpAdyairbhaktiyogasamanvitaH |
saMsmaranparamaM bhAvaM devyA mAheshvaraM param || 12.317||
ananyamAnaso nityaM japedAmaraNAd dvijaH |
so.antakAle smR^itiM labdhvA paraM brahmAdhigachChati || 12.318||
athavA jAyate vipro brAhmaNAnAM kule shuchau |
pUrvasaMskAramAhAtmyAd brahmavidyAmavApnuyAt || 12.319||
samprApya yogaM paramaM divyaM tat pArameshvaram |
shAntaH sarvagAto bhUtvA shivasAyujyamApnuyAt || 12.320||
pratyekaM chAtha nAmAni juhuyAt savanatrayam |
pUtanAdikR^itairdoShairgrahadoShaishcha muchyate || 12.321||
japed vA.aharaharnityaM saMvatsaramatandritaH |
shrIkAmaH pArvatIM devIM pUjayitvA vidhAnataH || 12.322||
sampUjya pArshvataH shaMbhuM trinetraM bhaktisaMyutaH |
labhate mahatIM lakShmIM mahAdevaprasAdataH || 12.323||
tasmAt sarvaprayatnena japtavyaM hi dvijAtibhiH |
sarvapApApanodArthaM devyA nAma sahasrakam || 12.324||
prasa~NgAt kathitaM viprA devyA mAhAtmyamuttamam |
ataH paraM prajAsargaM bhR^igvAdInAM nibodhata || 12.325||
iti shrIkUrmapurANe ShaTsAhastryAM saMhitAyAM pUrvavibhAge
dvAdasho.adhyAyaH ||12||
##
From sa.wikisource.org.  
The text is different than found in Sansknet encoding.

Proofread byDPD



\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}