श्रीशारदाष्टकस्तोत्रम्
(श्रीशारदाष्टकम्)
श्री शारदे चारुरूपे-
ऋष्यशृङ्गाचलस्थेभजेमातरन्त्वां
श्री शारदे चारुरूपे (श्री शारदे) ॥ ध्रुवपदम् ॥
तुङ्गानदीपुण्यतीरे-तापसानन्दपूरे तपोऽरातिचोरे ।
नित्यं वसन्तीं ज्वलन्तीं- सर्वविद्याधिदात्रीं
विरिञ्चेस्सुपत्नीम् ॥ (श्री शारदे) १॥
श्री शङ्करस्थापितां तां -
शान्तिदान्त्यादि सम्पूर्ण संन्यासि वन्द्याम् ।
सर्वार्थदात्रीं सवित्रीं-
देशिकेन्द्रस्वरूपेण सर्वत्र यान्तीम् ॥ (श्री शारदे) २॥
कारुण्य सम्पूर्ण नेत्रां-
शुभ्रवस्त्रां पवित्रां शरच्चन्द्रवक्त्राम् ।
सद्रत्नभूषाविचित्रां-
योगिवृन्दार्पितानन्दबिल्वादिपत्राम् ॥ (श्री शारदे) ३॥
श्री कुङ्कुमालिप्तगात्रीं-
भक्तवृन्दार्पितस्वीयकल्याणनेत्राम् ।
आविष्कृतानेकशास्त्रां -
अब्जसम्भूतसम्बद्ध माङ्गल्यसूत्राम् ॥ (श्री शारदे) ४॥
शृङ्गाद्रिवासां प्रणम्यां -
नाथरूपां नमद्राजराजधिदेवाम् ।
राज्यादिदानैकदीक्षां -
वेदवेदान्त सन्धायि कारुण्यवीक्षाम् ॥ (श्री शारदे) ५॥
अन्तर्मुखाराध्यदेवीं-
भक्तसम्बोधिदाम्नाय गम्भीर भावाम् ।
नित्यं कृतानेकसेवां-
त्याजिताज्ञान सम्भूत जीवात्मभेदाम् ॥ (श्री शारदे) ६॥
शुद्धस्वभावैरुपास्यां -
ऋष्यशृङ्गाद्रिपीठस्य संन्यासि वश्याम् ।
विद्यार्थिलोकेनवन्द्यां -
विष्णुरुद्रादिमान्यां सुपुण्यैकलभ्याम् ॥ (श्री शारदे) ७॥
लोकैकरक्षैकदीक्षां -
अक्षमालादिहस्तां यदीन्द्रादिपक्षाम् ।
अक्षय्यलक्ष्मीकटाक्षां
दृष्टमात्रेण तापादिसंहारवक्षाम् ॥ (श्री शारदे) ८॥
भक्त्याकृतं स्तोत्ररत्नं- दीक्षि
तानन्तरामेण विद्यादिसिद्ध्यै ।
श्री शारदा दोषमूलं -
भक्तियुक्तः पठेद्यो लभेतैव सर्वम् ॥ (श्री शारदे) ९॥
इति श्री अनन्तरामेणविरचितम् श्रीशारदाष्टकस्तोत्रं सम्पूर्णम् ।
Proofread by Mohan Chettoor