श्रीसीतामङ्गलमाला
हर्यानन्दं गुरुं नत्वा रामं सीतां च मारुतिम् ।
श्रीसीतामङ्गलानां च सन्मालां विदधाम्यहम् ॥ १॥
मङ्गलवासिनी या च जगन्मङ्गलकारिणी ।
तस्यै मङ्गलरूपायै श्रीसीतायै सुमङ्गलम् ॥ २॥
अनाघ्रातजगद्द्वन्द्वा याऽऽश्रितद्वन्द्वनाशिनी ।
तस्यै चाश्रयवर्यायै श्रीसीतायै सुमङ्गलम् ॥ ३॥
शान्तिमद्रामकान्तायै हन्त्र्यै च सकलागसाम् ।
तस्यै पापविहीनायै श्रीसीतायै सुमङ्गलम् ॥ ४॥
अविनाशि स्वरूपायै नाशिन्यै सकलापदाम् ।
प्रपन्नानन्ददायिन्यै श्रीसीतायै सुमङ्गलम् ॥ ५॥
भक्तकल्पलतारामलोकाभिराममूर्त्तये ।
आपद्विरामरूपायै श्रीसीतायै सुमङ्गलम् ॥ ६॥
सर्वविद्याधिराध्यायै रहितायै त्वविद्यया ।
वेदवेद्यानवद्यायै श्रीसीतायै सुमङ्गलम् ॥ ७॥
चिदचिद्भ्यां विशिष्टायै रक्षित्र्यै शिष्टकर्मणाम् ।
सच्चिदानन्दरूपायै श्रीसीतायै सुमङ्गलम् ॥ ८॥
ब्रह्माभिन्नस्वरूपाया कार्यकारणरूपिणी ।
तस्यै च प्राप्तकामायै श्रीसीतायै सुमङ्गलम् ॥ ९॥
भक्त्तितन्त्रस्वतन्त्रायै चार्थदायै श्रितार्थिनाम् ।
भक्त्यामुक्तिप्रदायै च श्रीसीतायै सुमङ्गलम् ॥ १०॥
सर्वाधिपत्यशीला या सर्वज्ञा सर्वशेषिणी ।
सुस्वामिन्यै श्रियै तस्यै श्रीसीतायै सुमङ्गलम् ॥ ११॥
परसौन्दर्यशालिन्यै दोषवर्ज्यगुणाब्धये ।
सर्वचित्तापहारिण्यै श्रीसीतायै सुमङ्गलम् ॥ १२॥
वेदोपबृंहणे श्रीमद्रामायणे महद्यशः ।
यस्याश्च विद्यते तस्यै श्रीसीतायै सुमङ्गलम् ॥ १३॥
हृद्यायै दिव्यदेहायै भूषितायै विभूषणैः ।
दिव्यपरिच्छदायै च श्रीसीतायै सुमङ्गलम् ॥ १४॥
अन्तर्बहिश्च व्याप्तायै सर्वस्य जगतः सतः ।
अन्तर्यामिस्वरूपायै श्रीसीतायै सुमङ्गलम् ॥ १५॥
परित्राणाय साधूनां धर्मसंस्थापनाय च ।
धृतसीतावतारायै श्रीसीतायै सुमङ्गलम् ॥ १६॥
सर्वावतारमूलायै, विनाशिन्यै च रक्षसाम् ।
धर्मरक्षाविधायिन्यै श्रीसीतायै सुमङ्गलम् ॥ १७॥
मिथिलेशतनूजायै भूमिजायै तथैव च ।
प्रियायै राघवेन्द्रस्य श्रीसीतायै सुमङ्गलम् ॥ १८॥
ब्रह्माण्डानामनन्तानां हेतवे चाघकेतवे ।
सेतवे च भवाम्भोधेः श्रीसीतायै सुमङ्गलम् ॥ १९॥
सुरासुरेश्वरैश्चाथ पूजितायै मुनीश्वरैः ।
कर्मणां फलदायै च श्रीसीतायै सुमङ्गलम् ॥ २०॥
रामेण परिणीता या वने रामानुगामिनी ।
तस्यै पत्यनुवर्त्तिन्यै श्रीसीतायै सुमङ्गलम् ॥ २१॥
चित्रकूटं गता या च चित्रकूटस्थ पूजिता ।
तस्यै चित्रकूटीरायै श्रीसीतायै सुमङ्गलम् ॥ २२॥
अनसूयोपदिष्टायै रक्षितायै च शाङ्गिणा ।
मन्दाकिनी विहारिण्यै श्रीसीतायै सुमङ्गलम् ॥ २३॥
फलाहारेण तुष्टायै हृष्टायै रामसेवया ।
गोदावरीविहारिण्यै श्रीसीतायै सुमङ्गलम् ॥ २४॥
सुवर्णवत् सुवर्णायै सुवर्णमृगलिप्सवे ।
सिन्धवे च सतीत्त्वस्य श्रीसीतायै सुमङ्गलम् ॥ २५॥
रावणेन हृतायै च रक्षितायै जटायुषा ।
अशोकवनवासिन्यै श्रीसीतायै सुमङ्गलम् ॥ २६॥
या रक्षिता स्वधर्मेण राक्षसीभिश्च तर्जिता ।
तस्यै महाविपन्नायै श्रीसीतायै सुमङ्गलम् ॥ २७॥
मारुत्याऽऽश्वासितायै च सन्दिष्टायै च शार्ङ्गिणा ।
मुद्रिकां प्राप्य हृष्टायै श्रीसीतायै सुमङ्गलम् ॥ २८॥
प्राणप्रियस्य रामस्य सद्दर्शनैक हेतवे ।
प्राणाश्च धारयन्त्यै हि श्रीसीतायै सुमङ्गलम् ॥ २९॥
अन्विष्टायै च मारुत्या वन्दितायै तथैव च ।
मारुतेर्वरदायै च श्रीसीतायै सुमङ्गलम् ॥ ३०॥
लङ्कायां च प्रदग्धायां मणि दत्त्वा च मारुतिम् ।
सन्देशप्रेषयित्र्यै च श्रीसीतायै सुमङ्गलम् ॥ ३१॥
ब्रह्मादिभिः सुरैर्या च स्तुता वानरसेनया ।
तस्यै चाग्निप्रशस्तायै श्रीसीतायै सुमङ्गलम् ॥ ३२॥
भवाब्धितारिणी या च कारिणी सर्वसम्पदाम् ।
तस्यै विपत्तिहारिण्यै श्रीसीतायै सुमङ्गलम् ॥ ३३॥
सफलपूजना या च सफलस्तुति कीर्तना ।
तस्यै सफलनत्यै च श्रीसीतायै सुमङ्गलम् ॥ ३४॥
रामेच्छ्या विना या च किञ्चित्कर्तुं हि नेच्छति ।
तस्यै रामानुकूलायै श्रीसीतायै सुमङ्गलम् ॥ ३५॥
यदिच्छ्या विनारामः कर्तुं किञ्चिन्न वाञ्छति ।
तस्यै रामानुसारिण्यै श्रीसीतायै सुमङ्गलम् ॥ ३६॥
यस्याश्च नाधिका काचित् काचिन्नास्ति च यादृशी ।
तस्यै साम्यविहीनायै श्रीसीतायै सुमङ्गलम् ॥ ३७॥
ऐश्वर्ये चाथ माधुर्ये रामब्रह्मसमा हि या ।
तस्यै रामानुरूपायै श्रीसीतायै सुमङ्गलम् ॥ ३८॥
रामवत् सत्यसङ्कल्पा सत्यकामा च या तथा ।
तस्यै रामसमानायै श्रीसीतायै सुमङ्गलम् ॥ ३९॥
रामस्य हर्षदा या च यस्या रामोऽपि हर्षदः ।
तस्यै रामसमानायै श्रीसीतायै सुमङ्गलम् ॥ ४०॥
रामवत् दोषहीना या रामवत् या गुणाम्बुधिः ।
तस्यै रामसमानायै श्रीसीतायै सुमङ्गलम् ॥ ४१॥
रामवत् सर्वशक्तिर्या जगद्धेतुश्च रामवत् ।
तस्यै रामसमानायै श्रीसीतायै सुमङ्गलम् ॥ ४२॥
रामवद्भुक्त्तिदा या च रामवन्मुक्त्तिदा च या ।
तस्यै रामसमानायै श्रीसीतायै सुमङ्गलम् ॥ ४३॥
रामवत् सकलात्मा या सर्वेश्वरी च रामवत् ।
तस्यै रामसमानायै श्रीसीतायै सुमङ्गलम् ॥ ४४॥
सर्वेभ्योऽभयदात्री या प्रपत्त्या रामवच्च या ।
तस्यै रामसमानायै श्रीसीतायै सुमङ्गलम् ॥ ४५॥
रामवद्वीक्षते या न श्रिताघांश्चात्मवत्तया ।
तस्यै रामसमानायै श्रीसीतायै सुमङ्गलम् ॥ ४६॥
विशिष्टा स्थूलसूक्ष्माभ्यां चिदचिद्भ्यां च रामवत् ।
तस्यै हि चाद्वितीयायै श्रीसीतायै सुमङ्गलम् ॥ ४७॥
यस्य स्मरणमात्रेण बाह्याभ्यन्तश्च शुध्यति ।
शुचीनां शुचये तस्यै श्रीसीतायै सुमङ्गलम् ॥ ४८॥
नामकीर्तनतो यस्या अपूर्णं पूर्णतामियात् ।
तस्यै पूर्णस्वरूपायै श्रीसीतायै सुमङ्गलम् ॥ ४९॥
यद्भक्तिर्मुक्तिधाम्नश्चाकण्टका राजपद्धतिः ।
तस्यै च भजनीयायै श्रीसीतायै सुमङ्गलम् ॥ ५०॥
यस्याः प्रपत्तितश्चैव दैवी माया निवर्त्तते ।
तस्यै शरण्यवर्यायै श्रीसीतायै सुमङ्गलम् ॥ ५१॥
निराधारा तथा या हि सर्वाधारस्वरूपिणी ।
तस्यै स्वमहिमस्थायै श्रीसीतायै सुमङ्गलम् ॥ ५२॥
धर्मार्थकाममोक्षाख्यपुरुषार्थप्रदा च या ।
तस्यै वदान्यवर्यायै श्रीसीतायै सुमङ्गलम् ॥ ५३॥
सच्चारित्रेण युक्ता या सर्वभूतहितैषिणी ।
तस्यै दोषविहीनायै श्रीसीतायै सुमङ्गलम् ॥ ५४॥
क्षमापुत्री क्षमाकर्ती याऽपकारं करोति न ।
तस्यै क्षमाब्धिरूपायै श्रीसीतायै सुमङ्गलम् ॥ ५५॥
कोटिसूर्यप्रभाढ्या या शीतला कोटिचन्द्रवत् ।
तस्यै चाद्भूतरूपायै श्रीसीतायै सुमङ्गलम् ॥ ५६॥
जगदन्तर्बहिष्ठायै सर्वब्रह्माण्डयोनये ।
अनादिनिधनायै च श्रीसीतायै सुमङ्गलम् ॥ ५७॥
योगदायै सुयोग्यायै योगीड्यायै तथैव च ।
योगफलप्रदायिन्यै श्रीसीतायै सुमङ्गलम् ॥ ५८॥
शोकहन्त्र्यै विशोकायै सर्वदायै च सर्वदा ।
रामाभिन्नस्वरूपिण्यै श्रीसीतायै सुमङ्गलम् ॥ ५९॥
गुणातीतस्वरूपायै प्रशास्त्र्यै शास्त्रयोनये ।
परभक्त्यैवप्राप्यायै श्रीसीतायै सुमङ्गलम् ॥ ६०॥
परानन्दवती या च परानन्दप्रदायिनी ।
परानन्दात्मने तस्यै श्रीसीतायै सुमङ्गलम् ॥ ६१॥
शक्तिकृच्छक्तिरूपा या महाशक्त्यभिवन्दिता ।
तस्यै शक्तिविशिष्टायै श्रीसीतायै सुमङ्गलम् ॥ ६२॥
वेदविद् वेदमाता या वेदविद्याप्रकाशिनी ।
तस्यै च वेदवन्द्यायै श्रीसीतायै सुमङ्गलम् ॥ ६३॥
विश्वकृद् विश्वभृद् या च विश्वहृद् विश्वरूपिणी ।
विश्वस्य हेतवे तस्यै श्रीसीतायै सुमङ्गलम् ॥ ६४॥
अनुग्रहशरीरा या या चानुग्रहवारिधिः ।
तस्यै निग्रहशून्यायै श्रीसीतायै सुमङ्गलम् ॥ ६५॥
अचिन्त्या योगिचिन्त्या या चिन्तया रहिता च या ।
तस्यै चिन्तापहारिण्यै श्रीसीतायै सुमङ्गलम् ॥ ६६॥
या हिरण्यलतातुल्या हिरण्यगर्भसंस्तुता ।
तस्यै हिरण्यवर्णायै श्रीसीतायै सुमङ्गलम् ॥ ६७॥
पद्मजासंस्तुता या च पद्मतुल्या सुकोमला ।
तस्यै पद्मासनायै हि श्रीसीतायै सुमङ्गलम् ॥ ६८॥
अमृतवचना या च याऽमृतपददायिनी ।
तस्यै च मृत्युहारिण्यै श्रीसीतायै सुमङ्गलम् ॥ ६९॥
यस्या भासा विभान्त्यत्र भासका भास्करादयः ।
तस्यै महाविभासिन्यै श्रीसीतायै सुमङ्गलम् ॥ ७०॥
ब्रह्माण्युमारमादीनां देवीनाञ्चैकहेतवे ।
ब्रह्माण्यादिसुवन्द्यायै श्रीसीतायै सुमङ्गलम् ॥ ७१॥
संस्तुता या च वाग्देवीसिन्धुजागिरिजादिभिः ।
करुणासिन्धवे तस्यै श्रीसीतायै सुमङ्गलम् ॥ ७२॥
यज्ज्ञानात् सर्वविज्ञानं याऽखिलज्ञानदायिनी ।
तस्यै ज्ञानस्वरूपायै श्रीसीतायै सुमङ्गलम् ॥ ७३॥
जगज्जन्मादिहेतुर्या जगन्मूलं जगच्च या ।
तस्यै जगज्जनन्यै हि श्रीसीतायै सुमङ्गलम् ॥ ७४॥
भयाभयविधातारः सर्वे यद्वशवर्त्तिनः ।
तस्यै च निखिलेश्वर्यै श्रीसीतायै सुमङ्गलम् ॥ ७५॥
यस्याः सीतेतिनामोक्तिर्यमदूतौघतर्जिनी ।
तस्यै चाभयदायिन्यै श्रीसीतायै सुमङ्गलम् ॥ ७६॥
शक्तिदा भुक्तिदा या च भक्त्तिदा मुक्तिदा च या ।
तस्यै हितस्वरूपायै श्रीसीतायै सुमङ्गलम् ॥ ७७॥
अणोरणीयसी या च महतश्च महीयसी ।
तस्यै च विभुमानायै श्रीसीतायै सुमङ्गलम् ॥ ७८॥
रजसा तमसा शून्या या तमः परवर्त्तिनी ।
तस्यै परात्परायै च श्रीसीतायै सुमङ्गलम् ॥ ७९॥
आदित्यान्तः स्थिता या च ह्यादित्यस्य प्रकाशदा ।
तस्यै चादित्यवर्णायै श्रीसीतायै सुमङ्गलम् ॥ ८०॥
विश्वं कर्तुञ्च सक्तायै भर्त्तुं हर्त्तुं तथैव च ।
षड्विधैश्वर्ययुक्तायै श्रीसीतायै सुमङ्गलम् ॥ ८१॥
सदाचाररता या च सदाचारोपदेशिका ।
तस्यै धर्मप्रवर्तिन्यै श्रीसीतायै सुमङ्गलम् ॥ ८२॥
बोधिका त्रीरहस्यानामाकारत्रयशिक्षिका ।
तस्यै महोपकत्र्यै च श्रीसीतायै सुमङ्गलम् ॥ ८३॥
प्राकृतगुणशून्यत्वान्निर्गुणा या प्रकीर्तिता ।
सद्गुणाम्बुधये तस्यै श्रीसीतायै सुमङ्गलम् ॥ ८४॥
चिदचिद्व्यापिकायै च चिदचित्तनवे तथा ।
चिदचित्तत्त्वभिन्नायै श्रीसीतायै सुमङ्गलम् ॥ ८५॥
वात्सल्यरससिन्धुर्या करुणावरुणालयः ।
लावण्यनिधये तस्यै श्रीसीतायै सुमङ्गलम् ॥ ८६॥
सर्वत्र सर्वदा या च श्रीमद्रामपरायणा ।
तस्यै महासतीश्वर्यै श्रीसीतायै सुमङ्गलम् ॥ ८७॥
लोकाभिरामलोकायै लोकाभिराममूर्तये ।
लोकाभिरामभावायै श्रीसीतायै सुमङ्गलम् ॥ ८८॥
यस्याश्चानन्दविज्ञानाज्जायते न भयं क्वचित् ।
तस्यै चानन्ददायिन्यै श्रीसीतायै सुमङ्गलम् ॥ ८९॥
प्राणानां प्राणरूपायै ज्योतिषां ज्योतिषे तथा ।
सूर्यान्तवासशीलायै श्रीसीतायै सुमङ्गलम् ॥ ९०॥
मूर्तामूर्त्तस्वरूपायै तथैकानेक मूर्तये ।
दूरेऽदूरे स्थितायै च श्रीसीतायै सुमङ्गलम् ॥ ९१॥
सर्वार्चनार्चनीया या सर्वेभ्यः फलदा च या ।
तस्यै सर्वशरीरायै श्रीसीतायै सुमङ्गलम् ॥ ९२॥
वेदे रामायणे चैव पुराणे भारते तथा ।
पाञ्चरात्रे च गीतायै श्रीसीतायै सुमङ्गलम् ॥ ९३॥
मेधया वेदपाठेन तपसालभ्यते न या ।
तस्यै भक्त्यैकलभ्यायै श्रीसीतायै सुमङ्गलम् ॥ ९४॥
कर्माद्यपरतन्त्रायै पूर्णषाड्गुण्यमूर्त्तये ।
विकाररहितायै च श्रीसीतायै सुमङ्गलम् ॥ ९५॥
ज्ञानिनां ज्ञेयरूपायै चाराध्यायै च कर्मिणाम् ।
भक्तानां भजनीयायै श्रीसीतायै सुमङ्गलम् ॥ ९६॥
महापुरुष रामस्य प्रियायै दिव्यमूर्त्तये ।
प्रधानपुरुषेश्वर्ये श्रीसीतायै सुमङ्गलम् ॥ ९७॥
जगद्वन्द्यपदाब्जायै जगतो गुरवे तथा ।
विज्ञानाम्बुधिरूपायै श्रीसीतायै सुमङ्गलम् ॥ ९८॥
यस्याः स्मरणतो याति बाह्याभ्यन्तः पवित्रताम् ।
पवित्रताब्धये तस्यै श्रीसीतायै सुमङ्गलम् ॥ ९९॥
यच्छक्त्या शक्तिमन्तश्च विधिविष्णुशिवादयः ।
शक्तिवारिधये तस्यै श्रीसीतायै सुमङ्गलम् ॥ १००॥
रक्षति सकलं विश्वं यस्याः पत्युश्चपादुका ।
तस्यै पतिप्रियायै च श्रीसीतायै सुमङ्गलम् ॥ १०१॥
यस्याः शक्त्या जगत् सर्वं यन्त्रवद् भ्राम्यते सदा ।
तस्यै जगन्नियन्त्रिण्यै श्रीसीतायै सुमङ्गलम् ॥ १०२॥
रामेण सृज्यते विश्वं यत्कारुण्यदिदृक्षुणा ।
कारुण्याम्बुधये तस्यै श्रीसीतायै सुमङ्गलम् ॥ १०३॥
उपादानं निमित्तं या जगतश्चोर्णनाभिवत् ।
हेतवे जगतस्तस्यै श्रीसीतायै सुमङ्गलम् ॥ १०४॥
सेव्यं च यत्परं नास्ति कीर्तनीयं न यत्परम् ।
तत्त्वं न यत्परं तस्यै श्रीसीतायै सुमङ्गलम् ॥ १०५॥
कारणं कारणानां या मङ्गलानाञ्च मङ्गलम् ।
तस्यै चाश्रयणीयायै श्रीसीतायै सुमङ्गलम् ॥ १०६॥
दाता न यत्परः कश्चित् त्राता न यत्परः क्वचित् ।
तस्यै परशरण्यायै श्रीसीतायै सुमङ्गलम् ॥ १०७॥
श्रितानामनुकूला या प्रतिकूला श्रितद्विषाम् ।
तस्यै प्रपदनीयायै श्रीसीतायै सुमङ्गलम् ॥ १०८॥
या श्रियः श्रीस्वरूपा श्रीसम्प्रदायप्रवर्त्तिका ।
गुरुणां गुरवे तस्यै श्रीसीतायै सुमङ्गलम् ॥ १०९॥
दुर्वादध्वान्तमार्तण्डराघवानन्दनिर्मिता ।
श्रीसीतामङ्गलानां च माला स्यान्मङ्गलप्रदा ॥ ११०॥
इति दुर्वादध्वान्तमार्त्तण्ड जगद्गुरु श्रीराघवानन्दाचार्य
सिद्धसंराट्प्रणीता श्रीसीतामङ्गलमाला समाप्ता ।
Proofread by Mrityunjay Pandey