श्रीराधास्तोत्रम्
व्रजमोहनदासकृतम् ।
जय जय वृषभानुनन्दनि रमणीशिरोमणि राधिके ।
जय जय मोहननागरशेखरमदनमोहनमनोहारिके ॥ १॥
जय जय वृन्दाविपिनविहारिणि श्यामसुन्दरसुखदायिके ।
जय जय ललितादिकवशवर्तिनि नन्दनन्दनहृदि शायिके ॥ २॥
जय जय गोपीजनरतिनायकालिङ्गनसुखजीविके ।
जय जय प्रेमसुधामयि सुन्दरि पीताम्बरधरसेविके ॥ ३॥
जय जय नीलाम्बरवरधारिणि व्रजपतिसुतहृतवंशिके ।
जय जय शास्त्रागमान्तरवर्तिनि सिद्धसतीकुलवंशिके ॥ ४॥
जय जय रासविनोदविमोहिनि रासेश्वरि रसवर्धिके ।
जय जय कान्त्यामृतमदखण्डनि रूपवतीमदमर्दिके ॥ ५॥
जय जय केशिनिषूदनकर्षिणि भावविशेषविभूषिके ।
जय जय पूर्णानन्दमुकुटमणे बिम्बाधररसपोषिके ॥ ६॥
जय जय गोकुलमण्डनमण्डिनि अधरस्मितशोभिके ।
जय जय दामोदरसङ्गानन्दनिरन्तरलोभिके ॥ ७॥
जय जय जगदाह्लादकहृदये सङ्कीर्तनमिति भावके ।
सुजनकण्ठभूषणमिदं वर्णितव्रजमोहनदासके ॥ ८॥
इति व्रजमोहनदासकृतं श्रीराधास्तोत्रं सम्पूर्णम् ।
Proofread by PSA Easwaran