कुमारविरचितं पार्वतीस्तवः
उमा गौरी महाकाली महागौरी शिवा सती ।
शर्वाणी चण्डिका दुर्गा रुद्राणी गिरिकन्यका ॥ १॥
मृडानी पार्वती माया महामाया महेश्वरी ।
अपर्णा शाम्भवी भद्रा शुभा त्रिपुरभैरवी ॥ २॥
श्रीः सर्वमङ्गला लक्ष्मीः भवानी दक्षकन्यका ।
आर्या हैमवती चेति स्मृत्वा जयमवाप्नुयात् ॥ ३॥
एकैकमपि यन्नाम गौर्यास्तद्दुःखनाशकम् ।
जयदं धनदं चैतत् आयुर्वृद्धिकरं परम् ॥ ४॥ (जयप्रदमिदं चैतत्)
ततः कुमार तां गौरीं स्मृत्वा युद्धाय याहि ते ।
जयो भवत्यसन्दिग्धं तन्नाम जयदं यतः ॥ ५॥
स्मृत्वापि गौरीं गिरिराजकन्यां धन्यां च मान्यां च कलङ्कशून्याम् ।
दुर्गामनन्यामपि भावयन्तः सद्यो भवन्त्येव हि भाग्यवन्तः ॥ ६॥
स्मृत्वापि यां पातकमागरेभ्यो निर्गत्य सङ्गत्य च सौख्यसङ्घैः ।
स्वर्गं समेत्याप्यपवर्गमेत्य तिष्ठन्ति भाग्येन नराः शिवाग्रे ॥ ७॥
यद्दृष्टिपातेन जगत्समस्तमुत्पन्नमेतत् परिपालितं च ।
कल्पावसाने प्रलयं प्रयाति सा देवता मङ्गलदेवता या ॥ ८॥
यत्पादपद्मस्मरणं मुनीनां तपस्यया केवलमम्बिका सा ।
स्मृता सदा सर्व सुखप्रदात्री सैषा विधात्री सुखसागराणाम् ॥ ९॥
यामन्नपूर्णां प्रवदन्ति देवाः स्तुवन्ति गन्धर्वगणा मुनीन्द्राः ।
मर्त्याश्च तत्पादरजःप्रसादात् रमादिभिः सा खलु पूजनीया ॥ १०॥ (रमादयः)
यस्याः कटाक्षप्रसरेण धन्यो दीनो दरिद्रः कृपणोऽपि धन्यः ।
मान्यः सुराणां धनसागराणामधीश्वरः स्यादिति तां भजाम्याम् ॥ ११॥
यत्पादपद्माम्बुजरेणुलेशं दधार शौरिर्धृतकूर्मरूपः ।
शेषः सहस्रेण दधार मूर्ध्ना सैपा भवानी शुभराजधानी ॥ १२॥
कुलाचलैः मेरुसमानधैर्यैः अतिप्रयत्नेन विभुग्नकायैः ।
यत्पादपद्माम्बुजरेणुशैलो धृतो मुदा सा गिरिजा सदाऽम्बा ॥ १३॥
दिग्दन्तिभिर्यत्पदपद्मरेणुः धृतः स्वकुम्भस्थलपङ्किलोऽपि ।
मदाम्बुधारापरिवीतगात्रैः तद्धारणायासगतैः स्वतन्त्रैः ॥ १४॥
यत्पादपद्माम्बुरुहार्चनाय रत्नाकरो नूतनरत्नजालम् ।
सम्पादयत्यन्वहमादरेण सा किं न गौरी तव पूजनीया ॥ १५॥
॥ इति शिवरहस्यान्तर्गते कुमारविरचितं पार्वतीस्तवः सम्पूर्णः ॥
- ॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः १३। २९-४३॥
- .. shrIshivarahasyam . harAkhyaH tRRitIyAMshaH . pUrvArdham . adhyAyaH 13. 29-43..
Proofread by Ruma Dewan