श्रीमीनाक्षीसुप्रभातम्
श्रीस्वामिशास्त्रिणा अनन्तानन्दनाथेन विरचितं
ॐ नमो भगवत्यै श्रीचन्द्रशेखरमूर्तये ।
सच्चिदानन्दरूपिण्यै स्वात्मबोधप्रपूर्तये ॥
श्रीमान् गजास्यो मधुरापुरस्थो लम्बोदरो मीनदृगात्मजो यः ।
त्रिप्रस्थपूर्णाकृतिमोदकाढ्यः क्रियाद्गणेशो मम सुप्रभातम् ॥ १॥
मातङ्गकन्येति कवीन्द्रवन्द्या विद्यावतीपुण्यफलप्रदा या ।
श्रीपाण्ड्यराजस्य सुता च साऽम्बा करोतु देवी मम सुप्रभातम् ॥ २॥
चिदग्निजाता मधुरापुरेशी पट्टाभिषिक्ता मलयध्वजेन ।
यया जिता दिक्पतयो नृपाश्च करोतु देवी मम सुप्रभातम् ॥ ३॥
या त्रिस्तनीशानजयाय गत्वा दृष्ट्वा महेशं त्वतिसुन्दराङ्गम् ।
सम्मोहिताऽभूज्जनमोहदात्री करोतु देवी मम सुप्रभातम् ॥ ४॥
श्रीसुन्दरेशेक्षणमात्रलुप्तमध्यस्तनी शान्तमहेशयुद्धा ।
मीनाम्बका श्रीमधुरापुरेशी करोतु देवी मम सुप्रभातम् ॥ ५॥
वाक्कामशक्त्यादिमबीजपूर्वमन्त्रस्य लक्ष्यार्थतनुर्महेशी ।
षडङ्गशक्त्यावृतबिन्दुवासा करोतु देवी मम सुप्रभातम् ॥ ६॥
परप्रकाशादिमशङ्करान्त श्रीदिव्यसिद्धौघसुमानवौघैः ।
सदा परीता गुरुभिः स्वचक्रे करोतु देवी मम सुप्रभातम् ॥ ७॥
रत्यादि शक्तित्रयपञ्चबाणबाणैश्च कामादिमपञ्चमारैः ।
या सेविता मीननिभस्वनेत्रा करोतु देवी मम सुप्रभातम् ॥ ८॥
ब्राह्म्यादिशक्त्यष्टकसेविता या लक्ष्म्यादिशक्त्यष्टकसंश्रिताऽम्बा ।
कदम्बकान्तारतलैकवासा करोतु देवी मम सुप्रभातम् ॥ ९॥
वज्रादिसंशोभितहस्तपद्म वामादिभिष्षोडशशक्तिभिर्या ।
समावृता सा प्रियकप्रियाम्बा करोतु देवी मम सुप्रभातम् ॥ १०॥
त्रिशूलसंशोभिकरासिताङ्गमुख्यैर्वृता ह्यष्टसुभैरवैर्या ।
मीनाम्बका नीपवनैकवासा करोतु देवी मम सुप्रभातम् ॥ ११॥
मातङ्गिनीपूर्वकशक्तिसङ्घैः गणेशपूर्वत्रिदिवैश्चतुर्भिः ।
शुकप्रियाऽम्बा परिसेव्यमाना करोतु देवी मम सुप्रभातम् ॥ १२॥
श्रीशारिकावेणुविपञ्चिकाढ्या श्रीद्वादशान्तस्थमतङ्गकन्या ।
या वै लघुश्यामतनुर्झषाक्षी करोतु देवी मम सुप्रभातम् ॥ १३॥
वाग्वादिनी या नकुलीति देवी सङ्कीर्त्यते सिद्धजनैः प्रपञ्चे ।
कवित्वदा कामितदा झषाक्षी करोतु देवी मम सुप्रभातम् ॥ १४॥
सप्तस्वराणामपि लक्ष्यभूता सङ्गीतयोगिन्यभिधीयते या ।
सानन्दरूपा झषलोचनाम्बा करोतु देवी मम सुप्रभातम् ॥ १५॥
सच्चित्स्वरूपा भवसङ्गरे मे जयप्रदा चन्द्रकलावतंसा ।
गुरुस्वरूपा मधुरापुरेशी करोतु देवी मम सुप्रभातम् ॥ १६॥
स्वर्णाब्जिनीतीरविहारशीलपदाम्बुजा वर्णतनूरपर्णा ।
भवान्धतामिस्रसमावृतस्य करोतु देवी मम सुप्रभातम् ॥ १७॥
अनन्तनागेन्द्रशयानविष्णु सहोद्भवा नीलतनुर्झषाक्षी ।
अनन्तकल्याणगुणैकभूमिः करोतु देवी मम सुप्रभातम् ॥ १८॥
इति अनन्तानन्दनाथेन विरचितं श्रीमीनाक्षीसुप्रभातं सम्पूर्णम् ।
Proofread by Rajesh Thyagarajan