श्रीकमलाम्बानवावरणस्तोत्रम्
। ॐ ।
श्रीरामजयम् ।
ॐ सद्गुरुश्रीत्यागराजस्वामिने नमो नमः ॥
ॐ श्रीचक्रिण्यै च विद्महे । ह्रींबीजायै च धीमहि ।
तन्नौ माता प्रचोदयात् ॥
अथ श्रीकमलाम्बानवावरणस्तोत्रम् ।
नवावरणचक्रेशि श्रीमातः कमलाम्बिके ।
श्रीदीक्षितार्यसङ्गीते सङ्गीतकविताप्रिये ॥ १॥
तोडीरागकृतिध्याते कररामशुकारमे(१) ।
कमलालयतीर्थेशि करुणारसपूरिते ॥ २॥
अरुणोदयसंकाशे तरुणारुणसत्पदे ।
अखण्डानन्दसम्पूर्णे परमानन्दमुक्तिदे ॥ ३॥
आनन्दभैरवीरूपे तामसासुरमर्दिनि ।
त्रैलोक्यमोहनावासे चक्रेश्वरि नमोस्तु ते ॥ ४॥
पार्श्वस्थकमलावाणि नित्यकल्याणि योगिनि ।
सर्वाशापरिपूरश्रीचक्रवासिनि हंसिनि ॥ ५॥
शङ्कराभरणे शक्ते मूकवाग्वरदायिनि ।
चक्रसंक्षोभणाकारे शोकापोहपदाम्बुजे ॥ ६॥
काम्भोजचरणे पूर्णे सर्वसौभाग्यदायिके ।
हिमवत्तनुजे गौरि ह्रींकारमन्त्रपूजिते ॥ ७॥
भैरवीकीर्तनानन्दे परे सर्वार्थसाधिके ।
बहिर्दशारचक्रस्थे दशशक्तिनमस्कृते ॥ ८॥
परमाद्वैतसंस्फूर्ते सच्चिदानन्दरूपिणि ।
नादरहस्यमर्मज्ञयोगिवृन्दसुरक्षणे ॥ ९॥
सर्वरक्षासुचक्रेशि सङ्गीतरसिके शिवे ।
वेणीजितसुपुन्नागवरालि वर्णमातृके ॥ १०॥
पाणीधृतेक्षुकोदण्डपाशाङ्कुशसुमशरे ।
वाणीसंमृदुमाधुर्ये एणीकटाक्षवीक्षणे ॥ ११॥
सहानारागसङ्गीते सर्वरोगहरे वरे ।
परादिवाक्स्वरूपार्ये निरामयवरे परे ॥ १२॥
ह्रींकारमन्त्रगुप्तार्थे ह्रींकारमन्त्ररूपिणि ।
वाणीलज्जितवीणार्ये वीणासुनादवादिनि ॥ १३॥
मुक्तिघण्टारवावासे श्रीकमलाम्बिके शिवे ।
अखण्डैकरसावाहे सर्वसिद्धिप्रदायिके ॥ १४॥
आहिरीरागसन्नूते सर्वानन्दमयेश्वरि ।
काद्यादिमन्त्ररूपे श्रीमहात्रिपुरसुन्दरि ॥ १५॥
श्रीमातः श्रीपुरान्तस्थचिन्तामणिगृहस्थिते ।
ब्रह्मानन्दप्रकाशे श्रीराजराजेश्वरि शुभे ॥ १६॥
श्रीचक्रेश्वरि मातः श्रीललिते भुवनेश्वरि ।
श्रीरागरागसङ्गीते राजयोगिनि सौभगे ॥ १७॥
सङ्गीतवरदे मातः सङ्गीतरसमञ्जरि ।
सङ्गीतश्लोकसान्निध्ये नमामि परदेवते ॥ १८॥
मङ्गलं कमलाम्बायै श्रीचक्रेश्यै सुमङ्गलम् ।
नवावरणगेयायै श्रीकर्यै शुभमङ्गलम् ॥ १९॥
अनुरागकृतं स्तोत्रं बालालापं तवार्पणम् ।
स्वीकुरुष्व मदम्बे श्रीर्गानवरं प्रदेहि मे ॥ २०॥
त्यागराजगुरुस्वामिशिष्यापुष्पासुगीतिकम् ।
नवावरणसुस्तोत्रं कमलाम्बाकृपावहम् ॥ २१॥
इति सद्गुरुश्रीत्यागराजस्वामिनः शिष्यया भक्तया पुष्पया कृतं
श्रीकमलाम्बानवावरणस्तोत्रं गुरौ समर्पितम् ।
ॐ शुभमस्तु ।
Footnote :
(1) delighting in the parrot in hand repeating ``RAma RAma᳚
Encoded and proofread by N V Vathsan nvvathsan at gmail.com
Copyright Pushpa Srivatsan