श्रीकामाक्षीपञ्चशतीस्तोत्रम्
(नामसारस्तवः)
कदाचित्कमला नाथं कमलायतलोचनम् ।
पप्रच्छ करुणाराशिं प्रणम्य शिरसा मुहुः ॥ १॥
मन्नाथ किं त्वया नित्यं जप्यते दृढभक्तितः ।
तन्मे ब्रूहि मयि प्रीतिर्यद्यस्ति मधुसूदन ॥ २॥
इति पृष्टः श्रिया विष्णुरुवाच कमलां हसन् ।
इतः परं प्रवक्ष्यामि रहस्यमपि ते प्रिये ॥ ३॥
श्रीकामाक्ष्याः पञ्चशती नाम्नां सङ्कीर्त्यतेऽनिशम् ।
रहस्यातिरहस्यैषा गोपनीया विशेषतः ॥ ४॥
दर्शनीया न कस्मैचित् प्रदेयोपासकाय वै ।
कामाक्षीनामकोशेषु सारमादाय शक्तिभिः ॥ ५॥
रचितेयं पञ्चशती कामाक्षीप्रीतिसिद्धये ।
तामेव कथयाम्यद्य नामसारोद्भवां प्रिये ॥ ६॥
एतद्रहस्यं परमं कामाक्षीप्रीतिदायकम् ।
भोगमोक्षप्रदं नॄणां साम्राज्यादिफलप्रदम् ॥ ७॥
सहस्रनाम त्रिशती श्रीमत्पञ्चशती तथा ।
त्रयमेतन्महाराज्ञ्या नेत्रत्रयमितीर्यते ॥ ८॥
सर्वेषु ललितास्तोत्रकोशपाठेषु यत्फलम् ।
तस्माच्छतगुणं पुण्यं प्राप्नोत्यस्याः प्रकीर्तनात् ॥ ९॥
पद्मासनं समाबध्य वीरासनमथापि वा ।
नासाग्रन्यस्तनयनो मनः पञ्चेन्द्रियैः सह ॥ १०॥
स्ववशीकृत्य मतिमान्बहिर्व्यापारमस्मरन् ।
देवतां पुरतो ध्यात्वा यथाविभवमञ्जसा ॥ ११॥
ततो जपेत्समाधिस्थो मन्त्राः सिद्ध्यन्ति मन्त्रिणः ।
अथवा मनसि ध्यात्वा सहस्रदलपङ्कजम् ॥ १२॥
तन्मध्ये कर्णिकां ध्यात्वा क्रोशमात्रं सुविस्तृतम् ।
सिंहासनं च तन्मध्ये नवरत्नविचित्रितम् ॥ १३॥
तस्योपरि च कामाक्षीञ्चिन्तयेत्कोमलाकृतिम् ।
पूर्वस्मादधिकं ह्येतद्ध्यानमाभ्यन्तरं प्रिये ॥ १४॥
मुनीन्द्रैरपि संसेव्यं भोगमोक्षैकसाधनम् ।
गुह्याद्गुह्यं तव स्नेहाद्वच्मि ध्यानं मम प्रिये ॥ १५॥
योगिनामप्यलभ्यं तन्मातुस्तुष्टिकरं क्षणात् ।
यत्र कुत्र स्थितो वापि श्रीविद्यामन्त्रविन्नरः ॥ १६॥
हृदये रत्नवसुधां सुधासागरसंवृताम् ।
कल्पोद्यानकदम्बद्रुहेमाम्भोरुहशोभिताम् ॥ १७॥
ध्यात्वा तत्रैव सदनञ्चिन्तामणिविराजितम् ।
तस्मिन् चिन्तामणिगृहे सिंहासनवरे स्थिताम् ॥ १८॥
कामाक्षीमात्मनि ध्यायेत् सा सोऽहमिति निश्चलः ।
एवं यः कुरुते ध्यानं पश्यन्नात्मानमात्मना ॥ १९॥
तस्यैव पुरतः सापि सान्निध्यं कुरुते क्षणात् ।
आत्मानं तन्मयं ध्यात्वा यस्तु विद्यां जपेन्नरः ॥ २०॥
विद्या तस्य विशालाक्षि तत्क्षणादेवसिद्ध्यति ।
तस्मात्तथैव कामाक्षीं ध्यात्वा पश्चादिमां स्तुतिम् ॥ २१॥
जपेदखिलपापौघशान्तये शान्तमानसः ।
नामानि तानि वक्ष्यामि शृणु सुन्दरि भक्तितः ॥ २२॥
अचिन्तयन् वयोलिङ्गवर्णभेदमतन्द्रितः ।
यानि जप्त्वा महामोहान्मुक्तः सायुज्यमाप्नुयात् ॥ २३॥
विनियोगः -
अथ अस्य श्रीकामाक्षीपञ्चशतीस्तोत्रमहामन्त्रस्य
मन्त्रिण्यादि शक्तयः ऋषयः, अनुष्टुप्छन्दः, श्रीकामाक्षी देवता,
ॐ ऐं वाग्भवकूटेन बीजं, श्रीकामाक्ष्यै क्लीं मध्यकूटेन शक्तिः,
नमः सौः शक्तिकूटेन कीलकं, मम श्रीकामाक्षीप्रसादसिद्ध्यर्थे
नामपारायणे जपे विनियोगः ॥
करन्यासः -
ॐ कां अङ्गुष्ठाभ्यां नमः । ॐ कीं तर्जनीभ्यां नमः ।
ॐ कूं मध्यमाभ्यां नमः । ॐ कैं अनामिकाभ्यां नमः ।
ॐ कौं कनिष्ठिकाभ्यां नमः । ॐ कः करतलकरपृष्ठाभ्यां नमः ॥
अङ्गन्यासः -
ॐ कां हृदयाय नमः । ॐ कीं शिरसे स्वाहा ।
ॐ कूं शिखायै वषट् । ॐ कैं कवचाय हुम् ।
ॐ कौं नेत्रत्रयाय वौषट् । ॐ कः अस्त्राय फट् ।
ॐ भूर्भुवस्सुवरोमिति दिग्बन्धः ॥
ध्यानम्-
कामाक्षीं कारणपरचिद्रूपां करुणात्मिकाम् ।
काञ्चीक्षेत्रगतां चन्द्रकलालङ्कृतशेखराम् ॥
कल्हारोल्लासिचिकुरां कर्णान्तायतलोचनाम् ।
मन्दस्मेराञ्चितमुखीं तपनोडुपकुण्डलाम् ॥
कम्बुकण्ठीं घनकुचां मुक्तामालाशतावृताम् ।
लम्बवामकराम्भोजां दक्षहस्तलसच्छुकाम् ॥
अदृश्यमध्यामरुणचेलामब्जपदोज्ज्वलाम् ।
सचामररमावाणीसेवितांश्रितवत्सलाम् ॥
सुवर्णतनुमेकाम्रनायकोत्सङ्गवासिनीम् ।
ध्यायामि वरदां देवीं सदानन्दस्वरूपिणीम् ॥
मानसिकपञ्चोपचारपूजा -
ॐ लं पृथिव्यात्मिकायै श्रीकामाक्ष्यै गन्धं कल्पयामि ।
ॐ हं आकाशात्मिकायै श्रीकामाक्ष्यै पुष्पाणि कल्पयामि ।
ॐ यं वाय्वात्मिकायै श्रीकामाक्ष्यै धूपं कल्पयामि ।
ॐ रं अनलात्मिकायै श्रीकामाक्ष्यै दीपं कल्पयामि ।
ॐ वं अमृतात्मिकायै श्रीकामाक्ष्यै अमृतनिवेदनं कल्पयामि ।
ॐ सं सर्वात्मिकायै श्रीकामाक्ष्यै सर्वानुपचारान् कल्पयामि ॥
अथ स्तोत्रम् ।
ॐ कामाक्षी करुणामूर्तिः कल्याणगिरिमन्दिरा ।
चिदग्निजाता चिद्रूपा श्रितसंरक्षणोद्यता ॥ १॥
बालार्ककोटिरुचिरवपुस्सन्नद्धयौवना ।
आघृष्टपद्मरागाश्मनिष्पन्नमकुटोज्ज्वला ॥ २॥
स्फुरच्चन्द्रकलाक्लृप्तचूडापीडविराजिता ।
सीमन्तरेखारचितसिन्दूरश्रेणिमञ्जुला ॥ ३॥
स्फुरत्कस्तूरितिलककन्दलन्नीलकुन्तला ।
कदम्बमञ्जरिलसत्कर्णपूरमनोहरा ॥ ४॥
भ्रूवल्लीस्मरकोदण्डसायकीभूतलोचना ।
मार्ताण्डमण्डलाकाररत्नकुण्डलमण्डिता ॥ ५॥
विशङ्कटारालकेशकर्णिकाकोशनासिका ।
लसन्मुक्तामणिभ्राजन्नासाभरणभासुरा ॥ ६॥
कस्तूरीक्लृप्तमकरिकादिराजत्कपोलभूः ।
लाक्षालक्ष्मीनिर्व्यपेक्षपाटलोष्ठपुटाञ्चिता ॥ ७॥
कुन्दकोरकसश्रीकदन्तपङ्क्तिविराजिता ।
अतर्क्यौपम्यचुबुका मुग्धस्मेरमुखाम्बुजा ॥ ८॥
नितम्बलम्बमानत्रिवेणीचूलात्तछालिका ।
शिरीषकोमलभुजविभ्राजत्कनकाङ्गदा ॥ ९॥
लम्बवामकराम्भोजा दक्षहस्तलसच्छुका ।
नानामणीगणलसत्सुवर्णकृतकङ्कणा ॥ १०॥
पाशाङ्कुशधनुर्बाणलसत्पाणितलोज्ज्वला ।
रत्नाङ्गुलीयसन्दोहरमणीयकराङ्गुलिः ॥ ११॥
लोलचिन्ताकपदकमुक्तावलिलसद्गला ।
गन्धकस्तूरिकर्पूरकुङ्कुमालङ्कृतस्तना ॥ १२॥
स्तनभूधरसन्नद्धसोपानत्रिवलीयुता ।
नवीनरोमलतिकाजितकादम्बिनीद्युतिः ॥ १३॥
अर्धोरुकग्रन्थिलसद्रत्नकाञ्चीगुणान्विता ।
सौन्दर्यपूरविलसदावर्तायितनाभिका ॥ १४॥
जपाकुसुमसच्छायपट्टांशुकपरीवृता ।
जघनाभोगसुभगपृथुश्रेणीभरालसा ॥ १५॥
एकाम्रनायकोत्सङ्गकाम्योरुमहिमोच्छ्रया ।
करीन्द्रकुम्भकठिनजानुद्वयविराजिता ॥ १६॥
स्मरकाण्डीरतूणीरसम्प्रदायकजङ्घिका ।
स्फुरन्माणिक्यमञ्जीररञ्जिताङ्घ्रिसरोरुहा ॥ १७॥
कमठीकर्परतटीकठोरप्रपदान्विता ।
यावकश्रीनिर्व्यपेक्षपाद लौहित्यवाहिनी ॥ १८॥
हरीन्द्रमुखकोटीरतटीघटितपादुका ।
सौन्दर्यलहरीसीमसर्वावयवपाटला ॥ १९॥
मरालीलालितगतिः रामणीयकशेवधिः ।
सर्वशृङ्गारवेषाढ्या सर्वावगुणवर्जिता ॥ २०॥
मोहिताशेषजगती मोहिनीरूपधारिणी ।
महामायी पराशक्तिर्मदिरारुणलोचना ॥ २१॥
सम्पत्करी महासेनासमृद्धा सम्पदुन्नता ।
अनेककोटिदैत्येन्द्रगर्वनिर्वापणोल्बणा ॥ २२॥
चक्रराजरथारूढचक्रिणी चक्रनायिका ।
मन्त्रिणीसेवितपदा मन्त्रतन्त्राधिदेवता ॥ २३॥
अश्वारूढा समाराध्या विश्वातीता विरागिणी ।
बालासमेता त्रिपुरा कालातीता कलावती ॥ २४॥
दण्डनाथसमासेव्या भण्डासुरवधोद्यता ।
कामराजप्रिया कामसञ्जीवनमहौषधिः ॥ २५॥
ब्रह्मादिदैवताराध्या ब्रह्मविद्या बृहत्तनूः ।
चापिनी चन्दनालिप्ता चन्द्रविद्या पराङ्कुशा ॥ २६॥
मनुविद्या महाराज्ञी महाविद्या महीयसी ।
सिंहासनेशी सिन्दूररुचिः सूर्याभिवन्दिता ॥ २७॥
सुन्दरी सुदती सुभ्रूर्वन्दारुजनवत्सला ।
समानाधिकशून्यार्घा सकलार्थप्रदायिनी ॥ २८॥
सम्राज्ञी सान्द्रकरुणा सनकादिमुनिस्तुता ।
महादेवी महेशानी महेश्वरपतिव्रता ॥ २९॥
लोपामुद्रागस्त्यनुता लोभघ्नी लोभवर्जिता ।
पावनी पशुपाशघ्नी पश्यन्ती परमेश्वरी ॥ ३०॥
कदम्बकलिकोत्तंसा कामेशी कामपूजिता ।
नन्दिविद्याऽऽनन्दमयी नीलस्निग्धाब्जलोचना ॥ ३१॥
कल्याणी कामरहिता कामदा कामकोटिका ।
चराचरजगद्धात्री चन्द्रिका चन्द्रवर्तिनी ॥ ३२॥
शिरीषसुकुमाराङ्गी शितिकण्ठप्रिया शिवा ।
अनङ्गवल्लभाऽनङ्गशास्त्रसिद्धान्तमञ्जरी ॥ ३३॥
कुबेरविद्या कुलजा कुरुकुल्ला कुलेश्वरी ।
कुलाङ्गना त्रिकूटस्था कुरङ्गाङ्ककलाधरा ॥ ३४॥
दुर्वासःपूजिता दुःखहन्त्री दुर्मतिदूरगा ।
आम्नायनाथा नाथेशी सर्वाम्नायनिवासिनी ॥ ३५॥
सर्वारुणा सङ्गहीना सावित्री सर्वतोमुखी ।
ब्रह्म गीता ब्रह्म मयी ब्रह्मानन्दरसात्मिका ॥ ३६॥
निरामया निरानन्दा निर्द्वन्द्वा निरहङ्कृतिः ।
निगमादृष्टचरणा निराधारा निरीश्वरी ॥ ३७॥
नियन्त्री नियतिर्नित्या निराशा निरपायिनी ।
अखण्डानन्दभरिता खण्डत्रयपरिष्कृता ॥ ३८॥
काञ्चीक्षेत्रगता कामपीठस्था कामपूजिता ।
महाश्मशाननिलया गायत्रीमण्डपेश्वरी ॥ ३९॥
कैलासनाथदयिता कम्पातीरविहारिणी ।
अविच्छिन्नानन्दमूर्तिरप्रमेयापराजिता ॥ ४०॥
अगम्या गगनाकारा प्रकृतिप्रत्ययात्मिका ।
अवेद्या वेद्यविज्ञात्री पञ्चकृत्यपरायणा ॥ ४१॥
सृष्टिस्थितिक्षयतिरोधानानुग्रहकारिणी ।
ब्रह्मगोविन्दादि पञ्चप्रेतमञ्चाधिवासिनी ॥ ४२॥
तमोऽतीता तमोहन्त्री तत्त्वातत्त्वविवेचिनी ।
सर्वतत्त्वमयी सर्वभूतिदा समयप्रिया ॥ ४३॥
जिताखिलेन्द्रियग्राममानसाम्बुजहंसिका ।
सुरासुरगणाराध्या सदसद्रूपिणी सती ॥ ४४॥
चण्डिका चारुवदना खण्डितारातिमण्डला ।
अगस्त्यविद्यासंसेव्या नन्दिताशेषविष्टपा ॥ ४५॥
संवित्सत्यमयी सौम्या दुर्निरीक्ष्या दुरत्यया ।
त्रिकालस्था त्रिकोणस्था त्रिमूर्तिस्त्रिगुणास्पदा ॥ ४६॥
यज्ञरूपा यज्ञभोक्त्री कार्याकार्यविचक्षणा ।
नामरूपादिरहिता वामदक्षाध्वपूजिता ॥ ४७॥
विश्वेश्वरी विश्ववन्द्या विद्येशी वेदरूपिणी ।
आदिमध्यान्तरहिता सर्वशक्तिस्वरूपिणी ॥ ४८॥
अतर्क्यमूर्तिरजिता प्रधानाऽतर्क्यवैभवा ।
चिदूर्मिमाला सञ्चिन्त्या चिन्तितार्थप्रदायिनी ॥ ४९॥
चिन्तामणिगृहान्तस्था चित्रकर्मा चिरन्तनी ।
मोहहन्त्री मोक्षदात्री मुग्धचन्द्रावतंसिनी ॥ ५०॥
मुद्रेशी न्यस्तराज्यश्रीर्मृदुमुग्धस्मितानना ।
क्रोडीकृताशेषघृणा कोमलाङ्गी कुटुम्बिनी ॥ ५१॥
षडङ्गदेवतासेव्या षडानननमस्कृता ।
शिवाराध्या शिवमयीशिवमाया शिवाङ्कगा ॥ ५२॥
षडूर्मिहन्त्री तरुणी वन्द्या षट्चक्रनायिका ।
माधवी माधवाराध्या माधवीकुसुमप्रिया ॥ ५३॥
ब्रह्मविष्ण्वादि जननी बृहती ब्रह्मवादिनी ।
सङ्गीतरसिका रामा वीणागानविनोदिनी ॥ ५४॥
ज्योतिर्मयी जगद्वन्द्या जयिनी जयदायिनी ।
भक्तिनम्रजनाधीना भक्तानुग्रहकारिणी ॥ ५५॥
जामदग्न्यार्चिता धौम्यपूजिता मूकसन्नुता ।
भक्तिगेया भक्तिगता भक्तक्लेशविनाशिनी ॥ ५६॥
भुक्तिमुक्तिकरी सिद्धविद्या सिद्धगणार्चिता ।
रागद्वेषादि रहिता रागिणी रागवर्धनी ॥ ५७॥
साम्राज्यदाननिरता रतिः सुरतलम्पटा ।
राजराजेश्वरी धीरा नासीरमुखभासुरा ॥ ५८॥
क्षेत्रेश्वरी क्षेत्ररूपा क्षेत्रज्ञा क्षयवर्जिता ।
क्षराक्षरमयी रक्षा दक्षिणामूर्तिरूपिणी ॥ ५९॥
मदिरास्वादरसिका मतङ्गकुलनायिका ।
मन्दारकुसुमापीडा मातङ्गी मदहारिणी ॥ ६०॥
कल्पान्तसाक्षिणी कामा कल्पनाकल्पनक्षमा ।
सङ्कल्पनिर्मिताशेषभुवना भुवनेश्वरी ॥ ६१॥
भव्या भवार्णवतरिर्भावारूढा भयापहा ।
रहस्ययोगिनी पूज्या रहोगम्या रमार्चिता ॥ ६२॥
अन्तर्वदनसन्दृश्या सन्ततध्यानदीपिता ।
कन्दलत्प्रीतिहृदया कमला कर्मसाक्षिणी ॥ ६३॥
कान्तार्धदेहा दीप्यन्ती कान्तिधूतजपाछविः ।
हृदयाकाशतरणिर्ह्रींकारी हृष्टमानसा ॥ ६४॥
ह्रीमती हृदयाकाशज्योत्स्ना हार्दतमोऽपहा ।
परापररहस्याख्यसर्वानन्दमयेश्वरी ॥ ६५॥
सर्वसिद्धिप्रदाऽऽरूढातिरहस्याधिदेवता ।
रहस्ययोगिनी क्षेत्रसर्वरोगहराधिपा ॥ ६६॥
निगर्भयोगिन्यावाससर्वरक्षाकरेश्वरी ।
सर्वार्थसाधकभ्राजत्कुलोत्तीर्णाभिवन्दिता ॥ ६७॥
सौभाग्यसत्सम्प्रदाययोगिनीपरिपूजिता ।
क्षोभणोद्यद्गुप्ततरयोगिनीगणसेविता ॥ ६८॥
आशापरीपूरकात्तगुप्तयोगिन्यभिष्टुता ।
त्रैलोक्यमोहनस्थप्रकटयोगिन्युपासिता ॥ ६९॥
कलातिथिनिधीष्विन्दुवर्णमन्त्रस्वरूपिणी ।
गुणरेखाग्निवृत्तान्तर्नृपनागदलालया ॥ ७०॥
मुनिदिक्पङ्क्तिवसुभूकोणान्तर्बिन्दुवासिनी ।
वेदर्तुदिक्सूर्यकलादस्रपत्राब्जचक्रगा ॥ ७१॥
मृणालतन्तुसदृशी सुषमावासिनी वसुः ।
सदाऽऽराध्या सदाध्येया सत्सङ्गतिरनुत्तमा ॥ ७२॥
पीयूषरससंस्रावसन्तर्पितजगत्त्रयी ।
सन्ततिस्सन्ततिच्छेदहारिणी धारणा धरा ॥ ७३॥
स्वाहाकारा हविर्भोक्त्री यजमानाकृतिः कृतिः ।
पितृप्रसू प्रसूः पद्मा स्वयम्भूरात्मभूरभूः ॥ ७४॥
त्र्यक्षरी त्रिगुणातीता क्लीङ्कारी क्लमहारिणी ।
प्रसादरूपा पदवी परा प्रासादरूपिणी ॥ ७५॥
शर्वाणी शर्मदा धात्री धर्मरूपा परागतिः ।
मुञ्जकेशी मुक्तसङ्गा पञ्चयज्ञपराकृतिः ॥ ७६॥
षट्त्र्येककर्मनिरतजनरक्षणदीक्षिता ।
स्वीकृतानुग्रहकला दूरस्थापितनिग्रहा ॥ ७७॥
निरन्तरसुखा गौरी नीपारण्यनिवासिनी ।
मोक्षदेशानमहिषी लक्ष्यालक्ष्यस्वरूपिणी ॥ ७८॥
राजसी कमलावासा ब्राह्मी सृष्टिविधायिनी ।
सत्त्वाढ्या वैष्णवी पात्री तामसी रुद्ररूपिणी ॥ ७९॥
हन्त्रीश्वरी तिरोधानकारिणी बहुरूपिणी ।
सदाशिवानुग्रहदा सदाशिवमयी मतिः ॥ ८०॥
अखण्डैकरसानन्दतनुः पीयूषरूपिणी ।
ऐङ्कारस्यन्दितत्त्वाख्यविश्वेन्द्रियफलप्रदा ॥ ८१॥
आनन्दाज्याहुतिप्रीता भक्तिज्ञानप्रदायिनी ।
त्रिमुद्रिणी भगाराध्या परनिर्वाणरूपिणी ॥ ८२॥
सर्वभूतहिता वाणी ब्रह्मरन्ध्रनिवासिनी ।
तटित्कोटिसमच्छाया सर्वविद्यास्वरूपिणी ॥ ८३॥
महापद्माटवीसंस्था कारणानन्दविग्रहा ।
सिद्धलक्ष्मीर्महालक्ष्मीः राज्यलक्ष्मीः पराङ्कुशा ॥ ८४॥
छन्दोमयी चतुष्षष्टिकलाकाव्यार्थदर्शिनी ।
ऐङ्कारिणी कालरूपाऽणिमादिकफलप्रदा ॥ ८५॥
महोरूपा महायोगिन्यमला भूतिदा कला ।
कूटत्रयमयी मूलमन्त्ररूपा मनोन्मनी ॥ ८६॥
बन्धकासुरसंहर्त्री कन्यकारूपधारिणी ।
महाबिलगुहालीना महामुनिमनोनटी ॥ ८७॥
शृङ्गारमूर्तिः सम्राज्ञी शृङ्गाररसनायिका ।
भद्राकृतिः कान्तिमयी भद्रदा भक्तवत्सला ॥ ८८॥
महाबला महानन्दा महाभैरवमोहिनी ।
सौभाग्यदायिनी स्वामिन्युदग्रा सम्प्रदायिनी ॥ ८९॥
गोमती गुह्यनिलया गुह्यमूर्तिर्गुणास्पदा ।
विवेकदायिनी शिष्टाशिष्टचेतोनिवासिनी ॥ ९०॥
कात्यायनी कामकोटिरन्नपूर्णाऽभयङ्करी ।
शाकिनी शाम्भवी भद्रा भैरवी भारतीमयी ॥ ९१॥
अभ्याससाध्या जयदा विजया भगमालिनी ।
रुक्मिणी रुक्मसच्छायरोचनातिलकोज्ज्वला ॥ ९२॥
वेदान्तमृग्यचरणा जरामृत्युभयापहा ।
कान्तिः कामकला कान्ता विधुमण्डलवासिनी ॥ ९३॥
शम्भुलोचनपीयूषवर्तिरार्तिनिवारिणी ।
विघ्नकादम्बिनीवात्या सर्वप्राणिमयी स्मृतिः ॥ ९४॥
लोकहन्त्री लोकभर्त्री भोगकर्त्री परात्परा ।
वीरप्रिया वीतरागा नाशिताशेषवैकृतिः ॥ ९५॥
नमज्जनाह्लादिकरी नादब्रह्मस्वरूपिणी ।
विप्राधीना विप्ररूपा विप्रजिह्वाविहारिणी ॥ ९६॥
विप्राराध्या विप्रगणपूजातुष्टा वियन्मयी ।
अव्याहताज्ञा जननी जयिनी प्रणवात्मिका ॥ ९७॥
कामरूपा कलालापा भार्गवी जगदीश्वरी ।
विमानस्था मानवती नित्यतृप्तजनप्रिया ॥ ९८॥
परा विभूतिः सर्वज्ञानादिबोधा दयानिधिः ।
अनन्तशक्तिरचला प्रणतप्रियबान्धवा ॥ ९९॥
अनादिरखिलाधारा सच्चिदानन्दरूपिणी ।
सर्वोपनिषदुद्घुष्टवैभवा सर्वमङ्गला ॥ १००॥
इति ते कथितं स्तोत्रं नामसारात्मकं मया ।
सर्वसौभाग्यदं देवि सर्वैश्वर्यप्रदायकम् ॥ १०१॥
आयुष्करं पुष्टिकरं तुष्टिदं पुरुषार्थदम् ।
साहित्यवैशद्यकरं विशेषादृष्टदं नृणाम् ॥ १०२॥
विद्याप्रदं पुत्रकरं सर्वसम्पत्प्रदायकम् ।
य इदं प्रपठेद्विद्वांस्त्रिवारं प्रतिवासरम् ॥ १०३॥
गङ्गायां च कुरुक्षेत्रे तथान्यासु नदीषु च ।
उपरागे पुष्पवतोर्द्विमुखीशतदानतः ॥ १०४॥
पृथक्फलं यद्धर्मस्य स तत्फलमवाप्नुयात् ।
ब्रह्महत्यादि पापानि नश्यन्त्यस्य जपात्प्रिये ॥ १०५॥
स्तवोऽप्यन्यश्च नास्त्येव नामपञ्चशतीसमः ।
तस्मात्त्वमपि पद्माक्षि स्तवेनानेन नित्यशः ॥ १०६॥
कामाक्षीं परमेशानीं स्तुहि श्रद्धासमन्विता ।
स्तुता त्वया महेशानी महाशक्तिः परात्परा ॥ १०७॥
शृङ्गारनायिका लक्ष्मीः करुणारूपिणी शिवा ।
श्रीमाता देवि कामाक्षी तवाभीष्टानि दास्यति ॥ १०८॥
॥ इति चतुर्लक्षग्रन्थविस्तारेश्रीसौभाग्यलक्ष्मीकल्पे
मोक्षपादे श्रीकमलाकमलाक्षसंवादे नामसारस्तवाख्यं
श्रीकामाक्षीपञ्चशतीस्तोत्रम् ॥
परिशिष्टः ।
कारणपरचिद्रूपा काञ्चीपुरसीम्नि कामपीठगता ।
काचन विहरति करुणा काश्मीरस्तबककोमलाङ्गलता ॥
कञ्चन काञ्चीनिलयं करधृतकोदण्डबाणसृणिपाशम् ।
कठिनस्तनभरनम्रं कैवल्यानन्दकन्दमवलम्बे ॥
ऐश्वर्यमिन्दुमौलेः ऐकात्म्यप्रकृतिकाञ्चिमध्यगतम् ।
ऐन्दवकिशोरशेखरमैदम्पर्यं चकास्ति निगमानाम् ॥
कामपरिपन्थिकामिनि कामेश्वरि कामपीठमध्यगते ।
कामदुघा भव कमले कामकले कामकोटि कामाक्षि ॥
लीये पुरहरजाये माये तव तरुणपल्लवच्छाये ।
चरणे चन्द्राभरणे काञ्चीशरणे नतार्तिसंहरणे ॥
जय जय जगदम्ब शिवे जय जय कामाक्षि जय जयाद्रिसुते ।
जय जय महेशदयिते जय जय चिद्गगनकौमुदीधारे ॥
इति श्रीकामाक्षीपञ्चशतीस्तोत्रं सम्पूर्णम् ।
Proofread by PSA Easwaran