ज्वालामुखीस्तोत्रम्
ॐ नताः स्तुतिपराः सर्वे यस्या नित्यं दिवौकसः ।
तमो हृत्वा शङ्करस्य भूत्यै भूयात्सदाशिवा ॥ १॥
श्रीसुन्दरीं जगद्धात्रीं ज्वालाव्याप्तदिगन्तराम् ।
सुरैः सिद्धैः स्तुतां भूपैः सुमुखीं नौम्यहं शिवाम् ॥ २॥
दैत्यानां भटकोटिकोटिमुकुटाटोपानधः कुर्वतीं
विघ्नानां कटकान्यतीव कटकान्यापाटयन्तीं स्फुटम् ।
भक्तानामभयं वरं च दधतीं शान्तात्मनां सर्वदा
षड्वक्त्रेण जितां क्रियाविरहतो ज्वालामुखीं नौम्यहम् ॥ ३॥
ब्रह्माणं मधुकैटभौ वधपरौ सन्त्रासयन्तौ परं
नानारूपधरावतीव भयदौ स्थूलोन्नतौ संयुगे ।
तौ हत्वा विनिवर्तितां कृतवतीं तन्मेदसा मेदिनीं
सर्वेषां शुभदायिनीं भगवतीं ज्वालामुखीं नौम्यहम् ॥ ४॥
सैन्यानां महिषासुरस्य मृतिदां सिंहाधिरूढां च तां
नानाकारविशेषसौख्यजननीं देहान्तरे संस्थिताम् ।
बालामध्यमवृद्धरूपरमणीं श्रीसुन्दरीं वैष्णवीं
स्त्रीरूपेण जगद्विमोहनकरीं ज्वालामुखीं नौम्यहम् ॥ ५॥
देवानां भयदायकौ सुकठिनौ शुम्भो निशुम्भस्तथा
नानाशस्त्रधरौ रिपू धृतिहरौ तौ चण्डमुण्डाङ्कितौ ।
सङ्ग्रामेऽप्यपराजितौ विकसितौ द्वौ रक्तबीजान्वितौ
हत्वैवं सुबलां प्रसन्नवदनां ज्वालामुखीं नौभ्यहम् ॥ ६॥
संसारार्णवतारिणरिणीं रविशशिकोटिप्रभां सुप्रभां
पापातङ्कनिवारिणीं हरिहरब्रह्मादिभिः संस्तुताम् ।
दारिद्र्यस्य विनाशिनीं सुकृतिनां जाड्यं हरन्तीं भृश-
मज्ञानान्धमतेः कवित्वजननीं ज्वालामुखीं नौभ्यहम् ॥ ७॥
रत्नपञ्चकनामानं श्रीसुन्दर्याः स्तवं वरम् ।
अव्याकुलं यः पठति सोऽभीष्टां सिद्धिमाप्नुयात् ॥ ८॥
ज्वालामुखि महाज्वाले ज्वालापिङ्गललोचने ।
ज्वालातेजी महातेजी ज्वालामुखि नमोऽस्तु ते ॥
इति ज्वालामुखीस्तोत्रं सम्पूर्णम् ।
Proofread by PSA Easwaran psaeaswaran at gmail.com