जगदादिशक्तिस्तोत्रम्
देवीं नमामि शिरसा जगदादिशक्तिं
कात्यायनीं भगवतीं सुखदां च दुर्गाम् ।
या हन्ति राक्षसगणान् युधि भद्रकाली
सा पातु मां भगवती गिरिजा कराली ॥ १॥
माहेश्वरी त्वमसि वैष्णवी नारसिंही
ब्राह्मी त्वमेव ललिता सुरसुन्दरी त्वम् ।
वाराहि षोडशि करालि शुभे त्वमैन्द्री
कौमारि भैरवि जये सततं नमस्ते ॥ २॥
शैले वने वसति यो वनराजसिंह
आरुह्य तं भ्रमति दुर्गमपर्वतेषु ।
ग्रामेषु या च नगरेषु च मन्दिरेषु
सा पातु मां भगवती जगदादिशक्तिः ॥ ३॥
या क्वापि लोकजननी प्रथिता भवानी
या सर्वमङ्गलयुता च शुभा मृडाणि ।
तां चण्डिकां हतखलामधुना स्मरामि
तां कालिकां भगवतीं शिरसा नमामि ॥ ४॥
ज्वालामुखी त्वमसि भानुमुखी प्रभा त्व-
मुल्कामुखी रविमुखी वडवामुखी त्वम् ।
कण्ठे निजे धरति या रिपु मुण्डमालां
सा पातु मां भगवती जगदादिशक्तिः ॥ ५॥
अष्टादशापि च भुजाः प्रभवन्ति यस्याः
या पूज्यते दशभुजा क्वचनाष्टहस्ता ।
या दैत्यशुम्भ-महिषासुर-मर्दिनी च
तां चण्डिकां भगवतीं प्रणमामि दुर्गाम् ॥ ६॥
मातङ्गिनी त्वमसि भूतभयङ्करी त्वं
श्रीकालिकासि रिपुहा जगदम्बिकासि ।
वैरोचिनी त्वमसि कालजया तमिस्त्रा
त्वं डाकिनी यमनिशासि नमोऽस्तु तुभ्यम् ॥ ७॥
भीमाकृते त्रिपुरसुन्दरि राक्षसघ्ने
ताराऽऽकृते त्रिपुरभैरवि कालवह्ने ।
घोराकृते त्रिगुणदे त्रिपुरारिवन्द्ये
धूमाकृते भुवनजीवनदे नमस्ते ॥ ८॥
काल्यै नमोऽस्तु सततं जगदम्बिकायै
देव्यै नमोऽस्तु हरिणाधिपवाहनायै ।
तेजः प्रभाकिरणभूषितमस्तकायै
तस्यै नमोऽस्तु सततं जगदादिशक्त्यै ॥ ९॥
योत्पत्तिपालनकरी जगती जनानां
गन्धर्वकिन्नरसुरार्चितपादपद्मा ।
शर्वप्रिया प्रियशिवा शिवदा शिवानी
सा पातु मां भगवती गिरिजा भवानी ॥ १०॥
या शाङ्करी भगवती वृषवाहनस्था
तां मोक्षदां शिवकरीं हृदये भजामि ।
शङ्खत्रिशूलहलचक्रगदाऽऽयुधा या
सा पातु मां भगवती जगदादिशक्तिः ॥ ११॥
इति श्रीरामकिशोरमिश्रविरचितं जगदादिशक्तिस्तोत्रं सम्पूर्णम् ।