जानकी सहस्रनामस्तोत्रम्
श्रीजानकीचरितामृते सप्ताशीतितमोऽध्यायः ॥ ८७॥
अथ श्रीयोगेश्वरकवि द्वारा वर्णितं श्रीजानकीसहस्रनामस्तोत्रम् ।
श्रीकविरुवाच ।
नीलेन्दीवरलोचनां जनकजां विस्मेरबिम्बाधरां
ब्रह्माविष्णुमहेशसेव्यचरणां दीव्यत्सुवर्णप्रभाम् ।
सव्ये श्रीमिथिलेशितुः सुनयनाक्रोडे मुदा राजितां
वन्दे बन्धुगणान्वितामनुचरीवृन्दैः समाराधिताम् ॥ १॥
ॐ अकल्पाऽकल्मषाऽकामा अकायाऽकारचर्चिता ।
अकारणाऽकोपपूज्या अक्रूरैकाऽक्षणाऽक्षरा ॥ २॥
अगदाऽगुणाऽग्रगण्या अचलापुत्रिकाऽचला ।
अच्युताऽजाऽजेयबुद्धिरज्ञातगतिसत्तमा ॥ ३॥
अणोरणीयस्यतर्क्या अतीन्द्रियचयाऽतुला ।
अदभ्रमहिमाऽदृश्या अद्वितीयक्षमानिधिः ॥ ४॥
अद्वितीयदयामूर्तिरद्वितीयानहङ्कृतिः ।
अदीनवुद्धिरद्वैता अधृताऽधोक्षजाऽनघा ॥ ५॥
अनन्तविग्रहाऽनन्ता अनन्तैश्वर्यसंयुता ।
अनन्यभावसन्तुष्टा अनर्थौघनिवारिणी ॥ ६॥
अनवद्याऽनामरूपा अनिर्देश्यस्वरूपिणी ।
अनिर्वाच्यसुखाम्भोधिरनिर्वाच्याङ्घ्रिमार्दवा ॥ ७॥
अनिर्विण्णाऽनुकूलैका अनुकम्पैकविग्रहा ।
अनुत्तमाऽनुत्तमात्मा अनुरागर्भराञ्चिता ॥ ८॥
अपारमहिमाऽपारभववारिधितारिणी ।
अपूर्वचरिताऽपूर्वसिद्धान्ताऽपूर्वसौभगा ॥ ९॥
अप्रकृष्टाऽप्रतिद्वन्द्वविक्रमाऽप्रतिमद्युतिः ।
अप्रतिमाऽप्रमत्तात्मा अप्रमेयसुखाकृतिः ॥ १०॥
अप्राकृतगुणैश्वर्यविश्वमोहनविग्रहा ।
अभिवाद्याऽमलाऽमाना अमिताऽमृतरूपिणी ॥ ११॥
अमृताऽमृतदृष्टिश्च अमृताशाऽमृतोद्भवा ।
अयोनिसम्भवाऽरौद्रा अलोलाऽवनिपुत्रिका ॥ १२॥
अवराऽवर्ण्यमाधुर्य्या अवर्ण्यकरुणावधिः ।
अविचिन्त्याऽविशिष्टात्मा अव्यक्ताऽव्ययशेमुषी ॥ १३॥
अव्याजकरुणामूर्तिरशोकाऽसङ्ख्यकाऽसमा ।
असम्मिताऽऽप्तसङ्कल्पा आत्मज्ञानविभाकरी ॥ १४॥
आत्मोद्भवाऽऽत्ममर्मज्ञा आत्मलाभप्रदायिनी ।
आत्मवत्यादिकर्त्र्यादिराधारपरमालया ॥ १५॥
आध्येयाङ्घ्रिसरोजाङ्का आनन्दामृतवर्षिणी ।
आम्नायवेद्यचरणा आश्रितत्राणतत्परा ॥ १६॥
आसक्त्यपहृतासक्तिरास्यस्पर्द्धिविधुव्रजा ।
आह्लादसूपमासिन्धुरिनवंश्यपरप्रिया ॥ १७॥
इन्दुपूर्णोल्लसद्वक्त्रा इभराजसुतागतिः ।
इयत्त्वरहितेर्वाल्वी प्रपन्नसकलापदाम् ॥ १८॥
इष्टा समस्तदेवानामीप्सितार्थप्रदायिनी ।
ईश्वरी सर्वलोकानामुच्छिन्नाश्रित्तसंशया ॥ १९॥
उज्ज्वलैकसमाराध्या उत्फुल्लेन्दीवरेक्षणा ।
उत्तरोत्तानहस्ताब्जा उत्तमोत्सङ्गभूषणा ॥ २०॥
उदारकीर्त्तनोदारचरितोदारवन्दना ।
उदारजपपाठेज्या उदारध्यानसंस्तवा ॥ २१॥
उदारवल्लभोदारवीक्षणस्मितभाषिता ।
उदारश्रीनामरूपलीलाधामगुणव्रजा ॥ २२॥
उदारालिगणोदारोपासका ॠतरूपिणी ।
ॠभुवन्द्याङ्घ्रिरॄकारा लॄपुत्री लॄस्वरूपिणी ॥ २३॥
एकैकशरणं पुंसामैक्यभावप्रसादिता ।
ओकःप्रधानिकौजोऽव्धिरौदार्यौत्कर्ष्य विश्रुता ॥ २४॥
कमला कमलाराध्या करणं कलभाषिणी ।
कलाधारा कलाभिज्ञा कलामूर्तिः कलावधिः ॥ २५॥
कल्पवृक्षाश्रया कल्प्या कल्मषौघनिवारिणी ।
कल्याणदात्री कल्याणप्रकृतिः कामचारिणी ॥ २६॥
कामदा काम्यसंसक्तिः कारणाद्वयकारणम् ।
कारुण्यार्द्रविशालाक्षी कालचक्रप्रवर्तिका ॥ २७॥
कीनाशभयमूलघ्नी कुञ्जकेलिसुखप्रदा ।
कुञ्जराधीशगतिका कृतज्ञार्च्या कृतागमा ॥ २८॥
कृपापीयूषजलधिः कोमलार्च्यपदाम्बुजा ।
कौशल्याप्रतिमाम्भोधिः कौशल्यासुतवल्लभा ॥ २९॥
खरारिहृदयातुल्यपरमोत्सवरूपिणी ।
खलान्यमतिसन्दात्री खवासीशादिवन्दिता ॥ ३०॥
खेलमात्रजगत्सृष्टिर्गणनाथार्च्चिता गतिः ।
गतैश्वर्यस्मयश्रेष्ठा गभीरा गम्यभावना ॥ ३१॥
गहनाग्र्या गीर्गीर्वाणहितसाधनतत्परा ।
गुप्ता गुहेशया गुह्या गेयोदारयशस्ततिः ॥ ३२॥
गोपनीयपदासक्तिर्गोप्त्री गोविदनुत्तमा ।
ग्रहणीयशुभादर्शा ग्लौपुञ्जाभनखच्छविः ॥ ३३॥
घनश्यामात्मनिलया घर्मद्युतिकुलस्नुषा ।
घृणालुका ङस्वरूपा चतुरात्मा चतुर्गतिः ॥ ३४॥
चतुर्भावा चतुर्व्यूहा चतुर्वर्गप्रदायिनी ।
चतुर्वेदविदां श्रेष्ठा चपलासत्कृतद्युतिः ॥ ३५॥
चन्द्रकलासमाराध्या चन्द्रबिम्बोपमानना ।
चारुशीलादिभिः सेव्या चारुसम्पावनास्मिता ॥ ३६॥
चारुरूपगुणोपेता चारुस्मरणमङ्गला ।
चार्वङ्गी चिदलङ्कारा चिदानन्दस्वरूपिणी ॥ ३७॥
छविक्षुब्धरतिः छिन्नप्रणताशेषसंशया ।
जगत्क्षेमविधानज्ञा जगत्सेतुनिबन्धिनी ॥ ३८॥
जगदादिर्जगदात्मप्रेयसी जगदात्मिका ।
जगदालयवृन्देशी जगदालयसङ्घसूः ॥ ३९॥
जगदुद्भवादिकर्त्री जगदेकपरायणम् ।
जगन्नेत्री जगन्माता जगन्माङ्गल्यमङ्गला ॥ ४०॥
जगन्मोहनमाधुर्यमनोमोहनविग्रहा ।
जतुशोभिपदाम्भोजा जनकानन्दवर्धिनी ॥ ४१॥
जनकल्याणसक्तात्मा जननी सर्वदेहिनाम् ।
जननीहृदयानन्दा जनबाधानिवारिणी ॥ ४२॥
जनसन्तापशमनी जनित्री सुखसम्पदाम् ।
जनेश्वरेड्या जन्मान्तत्रासनिर्णाशचिन्तना ॥ ४३॥
जपनीया जयघोषाराध्यमाना जयप्रदा ।
जया जयावहा जन्मजरामृत्युभयातिगा ॥ ४४॥
जलकेलिमहाप्राज्ञा जलजासनवन्दिता ।
जलजारुणहस्ताङ्घ्रिर्जलजायतलोचना ॥ ४५॥
जवानतमनोवेगा जाड्यध्वान्तनिवारिणी ।
जानकी जितमायैका जितामित्रा जितच्छविः ॥ ४६॥
जितद्वन्द्वा जितामर्षा जीवमुक्तिप्रदायिनी ।
जीवानां परमाराध्या जीवेशी जेतृसद्गतिः ॥ ४७॥
जेत्री ज्ञानदा ज्ञानपाथोधिर्ज्ञानिनां गतिः ।
ज्ञेयाऽऽत्महितकामानां ज्येष्ठा ज्योत्स्नाधिपानना ॥ ४८॥
ज्वरातिगा ज्वलत्कान्तिर्ज्वालामालासमाकुला ।
झणन्नूपुरपादाब्जा झम्पाकेशप्रसादिता ॥ ४९॥
झपकेतुप्रियायूथसञ्चितच्छविमोहिनी ।
झाटवाटोत्सवाधारा ञरूपा टुण्टुकेतरा ॥ ५०॥
ठात्मिका डम्बरोत्कृष्टा दामराधीशगामिनी ।
ढुण्ढीष्टदेवता ढक्कामञ्जुनादप्रहर्षिता ॥ ५१॥
णकारा तडिदोघाभदीप्ताङ्गी तत्त्वरूपिणी ।
तत्त्वकुशला तत्त्वात्मा तत्त्वादिस्तनुमध्यमा ॥ ५२॥
तन्तुप्रवर्द्धिनी तन्वी तपनीयनिभद्युतिः ।
तपोमूर्तिस्तपोवासा तमसः परतः परा ॥ ५३॥
तमोघ्नी तापशमनी तारिणी तुष्टमानसा ।
तुष्टिप्रदायिका तृप्ता तृप्तिस्तृप्त्येककारिणी ॥ ५४॥
तेजःस्वरूपिणी तेजोवृषा तोयभवार्चिता ।
त्रिकालज्ञा त्रिलोकेशी थै थै शब्दप्रमोदिनी ॥ ५५॥
दक्षा दनुजदर्पघ्नी दमिताश्रितकण्टका ।
दम्भादिमलमूलघ्नी दयार्द्राक्षी दयामयी ॥ ५६॥
दशस्यन्दनजप्रेष्ठा दाक्षिण्याखिलपूजिता ।
दान्ता दारिद्र्यशमनी दिव्यध्येयशुभाकृतिः ॥ ५७॥
दिव्यात्मा दिव्यचरिता दिव्योदारगुणान्विता ।
दिव्या दिव्यात्मविभवा दीनोद्धरणतत्परा ॥ ५८॥
दीप्ताङ्गी दीप्तमहिमा दीप्यमानमुखाम्बुजा ।
दुरासदा दुराराध्या दुरितघ्नी दुर्मर्षणा ॥ ५९॥
दुर्ज्ञेया दुष्प्रकृतिघ्नी दुःस्वप्नादिप्रणाशिनी ।
द्युतिर्द्युतिमति देवचूडामणिप्रभुप्रिया ॥ ६०॥
देवताहितदा दैन्यभावाचिरसुतोषिता ।
धराकन्या धरानन्दा धरामोदविवर्धिनी ॥ ६१॥
धरारत्नं धर्मनिधिर्धर्म सेतुनिबन्धिनी ।
धर्मशास्त्रानुगा धामपरिभूततडिद्द्युतिः ॥ ६२॥
धृतिर्ध्रुवा नतिप्रीता नयशास्त्रविशारदा ।
नामनिर्धूतनिरया निगमान्तप्रतिष्ठिता ॥ ६३॥
निगमैर्गीतचरिता नित्यमुक्तनिषेविता ।
निधिर्निमिकुलोत्तंसा निमित्तज्ञानिसत्तमा ॥ ६४॥
नियतेन्द्रियसम्भाव्या नियतात्मा निरञ्जना ।
निराकारा निरातङ्का निराधारा निरामया ॥ ६५॥
निर्व्याजकरुणामूर्तिनीतिः पङ्केरुहेक्षणा ।
पतितोद्धारिणी पद्मगन्धेष्टा पद्मजार्च्चिता ॥ ६६॥
पद्मपादा पद्मवक्त्रा पद्मिनी परमेश्वरी ।
परब्रह्म परस्पष्टा पराशक्तिः परिग्रहा ॥ ६७॥
परित्रात्री परिश्लाघ्या परेप्टा पर्यवस्थिता ।
पवित्रं पाटवाधारा पातिव्रत्यधुरन्धरा ॥ ६८॥
पापिपापौघसंहर्त्री पारिजातसुमार्च्चिता ।
पावनानुत्तमादर्शा पावनी पुण्यदर्शना ॥ ६९॥
पुण्यश्रवणचरिता पुण्यश्लोकवरीयसी ।
पुष्पालङ्कारसम्पन्ना पुष्टिः पुष्टिप्रदायिनी ॥ ७०॥
पूतात्मा पूतसर्वेहा पूज्यपादाम्बुजद्वया ।
पूर्णा पूर्णेन्दुवदना प्रकृतिः प्रकृतेः परा ॥ ७१॥
प्रकृष्टात्मा प्रणम्याङ्घ्रिः प्रणयातिशयप्रिया ।
प्रणतातुल्यवात्सल्य प्रणतध्वस्तसंसृतिः ॥ ७२॥
प्रणविनी प्रतिष्ठात्री प्रथमा प्रथिता प्रधीः ।
प्रपन्नरक्षणोद्योगा प्रवित्तं प्रविशारदा ॥ ७३॥
प्रह्वी प्राणप्रदा प्राणनिलया प्राणवल्लभा ।
प्राणात्मिका प्रार्थनीया प्रियमोहनदर्शना ॥ ७४॥
प्रियार्हा प्रीतितत्त्वज्ञा प्रीतिदा प्रीतिवर्धिनी ।
प्रेज्या प्रेमरता प्रेमवल्लभातीववल्लभा ॥ ७५॥
प्रेमवारां निधिः प्रेमविग्रहा प्रेमवैभवा ।
प्रेमशक्त्येकविवशा प्रेमसंसाध्यदर्शना ॥ ७६॥
प्रेमैकहाटकागारा प्रेमैकाद्भुतविग्रहा ।
फणीन्द्रावर्ण्यविभवा फलरूपा सुकर्मणाम् ॥ ७७॥
बुद्धिदा बुधमृग्याङ्घ्रिकमला बोधवारिधिः ।
ब्रह्मलेखातिगा ब्रह्मवेत्त्री ब्रह्माण्डवृन्दसूः ॥ ७८॥
भक्तत्राणविधानज्ञा भक्तिसंसाध्यदर्शना ।
भजनीयगुणोपेता भयघ्नी भवतारिणी ॥ ७९॥
भवपूज्या भवाराध्या भवोत्पत्यादिकारिणी ।
भाग्यैकसंशोधयित्री भावैकपरितोषिता ॥ ८०॥
भूतप्रसूतिर्भूतात्मा भूतादिर्भूतिदायिनी ।
भूतिमत्समुपास्याङ्घ्रिर्भूसुता भ्रान्तिहारिणी ॥ ८१॥
मङ्गलाशेषमाङ्गल्या मङ्गलैकमहानिधिः ।
मधुरा मधुराकारा मननीयगुणावलिः ॥ ८२॥
मनोजवा मनोज्ञाङ्गी मनोरमगुणान्विता ।
मनः स्वरूपा महती महनीयगुणाम्बुधिः ॥ ८३॥
महद्ध्र्येका महाकीर्तिर्महाकोशा महाक्रतुः ।
महाक्रमा महागर्ता महाछविर्महाद्युतिः ॥ ८४॥
महादृष्टिर्महाधाम्नी महानन्दस्वरूपिणी ।
महानायकसम्मात्या महानैपुण्यवारिधिः ॥ ८५॥
महापूज्या महाप्राज्ञा महाप्रेज्या महाफला ।
महाभागा महाभोगा महामतिमतां वरा ॥ ८६॥
महामाधुर्यसम्पन्ना महामायास्वरूपिणी ।
महायोगप्रसाध्यैका महायोगेश्वरप्रिया ॥ ८७॥
महारतिर्महालक्ष्मीर्महाविद्यास्वरूपिणी ।
महाशक्तिर्महाश्रेष्ठा महाश्लाघ्ययशोऽन्विता ॥ ८८॥
महासिद्धिर्महासेव्या महासौभाग्यदायिनी ।
महाहविर्महार्हार्हा महिष्टात्मा महीयसी ॥ ८९॥
महीशजा महोत्कर्षा महोत्साहा महोदया ।
महोदारा महेशादिसमालभ्व्याङ्घ्रिपङ्कजा ॥ ९०॥
माता समस्त जगतां माधुरीजितमाधुरी ।
मान्यपरमसम्मान्या मा मितकोकिलस्वना ॥ ९१॥
मिथिलेशक्रतूद्भूता मिथिलेश्वरनन्दिनी ।
मीनाक्षी मुक्तिवरदा मुनिसेव्यपदाम्बुजा ॥ ९२॥
मुनीन्द्रावर्ण्यमहिमा मूलप्रकृतिसंज्ञिता ।
मृगनेत्रा मृगाङ्काभवदना मृदुभाषिणी ॥ ९३॥
मृदुला मूदुलाचारा मृदुसमोहनेक्षणा ।
मृदुस्वभावसम्पन्ना मृद्वी मेधसमुद्भवा ॥ ९४॥
मेधेशी मैथिली मोदवर्षिणी मौढ्यभञ्जिका ।
यतचित्तेन्द्रियग्रामा युक्ता युक्तात्मभाषिता ॥ ९५॥
योगदा योगनिलया योगस्था योगिनां गतिः ।
योगिनां समुपालभ्या योगिराजप्रियात्मजा ॥ ९६॥
रक्तोत्पललसद्धस्ता रघुनन्दनवल्लभा ।
रघुनाथस्वभावज्ञा रघुवीरसुखे रता ॥ ९७॥
रतिसौन्दर्यदर्पघ्नी रतीशेहाहरस्मृतिः ।
रविमण्डलध्यस्था रविवंशेन्दुहृत्स्थिता ॥ ९८॥
रसज्ञा रसभावज्ञा रसानन्दविवर्धिनी ।
रमणीयगुणग्रामा रमाराध्या रमालया ॥ ९९॥
रम्यरम्यनिधी रम्याशेषा रसमयाकृतिः ।
रसापुत्री रसासक्ता रसिकानां परागतिः ॥ १००॥
रसिकेन्द्रप्रिया राकाधिपपुञ्जनिभानना ।
राघवेन्द्रप्रभावज्ञा राधा रासरसेश्वरी ॥ १०१॥
रासलीलाकलापज्ञा रासानन्दप्रदायिनी ।
रासेशी रूपदाक्षिण्यमण्डिता लक्ष्मणार्च्चिता ॥ १०२॥
ललनादर्शचरिता ललनाधर्मदीपिका ।
ललामैकनामरूपलीलाधामगुणादिका ॥ १०३॥
ललिताम्भोजपत्राक्षी ललिताशेषचेष्टिता ।
लावण्यजितपाथोधिर्लाकृतिर्लीनरक्षिका ॥ १०४॥
लीलाभूमाधवप्रेष्ठा लोककल्याणतत्परा ।
लोकत्रयमहाराज्ञीलोकमृग्याङ्घ्रिपङ्कजा ॥ १०५॥
लोकज्ञा लोकशरणं लोकपावनपावनी ।
लोकप्रगीतमहिमा लोकानुत्तमदर्शना ॥ १०६॥
लोकालयकलापाम्बा लोकोत्पत्यादिकारिणी ।
लोकेशकान्ता लोकेशी लोकैकप्रियकाङ्क्षिणी ॥ १०७॥
लोचनादीन्द्रियव्रातशक्तिसञ्चारकारिणी ।
लोपयित्री लोभहरा लोमशादिकभाविता ॥ १०८॥
वत्सरा वत्सलोत्कृष्टा वदान्या वनजेक्षणा ।
वनमालाञ्चिता वभ्व्री वरणीयपदाश्रया ॥ १०९॥
वरदाधिराजकान्ता वरदा वरवर्णिनी ।
वरबोधा वरारोहाभूषिता वर्णनातिगा ॥ ११०॥
वर्णाभावा वर्णश्रेष्ठा वर्णाश्रमविधायिनी ।
वर्ण्यानवद्यचित्केलिर्वर्द्धिनी सुखसम्पदाम् ॥ १११॥
वशकृद्वशगश्रेष्ठा वश्या वसुप्रदायिनी ।
बहुश्रुतो वाच्यकीर्तिर्वारिजासनवन्दिता ॥ ११२ ॥
विकल्मषा विक्षरात्मा विगतेहा विजेतृका ।
विज्ञानदात्री विज्ञानमयाप्राकृतविग्रहा ॥ ११३॥
विज्ञा विज्वरा विदिता विदिशा विद्ययाऽन्विता ।
विद्यावत्पुङ्गवोत्कृष्टा विधात्री विधिकेतना ॥ ११४ ॥
विधिदुर्ज्ञेयमहिमा विधुपूर्णमुखाम्बुजा ।
विनयार्हा विनीतात्मा विपक्वात्मा विपद्धरा ॥ ११५॥
विमत्सरा विमलार्च्या विमुक्तात्मा विमुक्तिदा ।
विमोहिनी वियन्मूर्तिर्विरतिप्रदचिन्तना ॥ ११६॥
विरामा विलसत्क्षान्तिर्विबुधर्षिगणार्चिता ।
विवेकपरमाधारा विवेकवदुपासिता ॥ ११७॥
विशदश्लोकसम्पूज्या विशालेन्दीवरेक्षणा ।
विशिष्टात्मा विशेषज्ञा विश्वलीलाप्रसारिणी ॥ ११८॥
विश्वतः पाणिपादास्या विश्वमात्रैकधारिणी ।
विश्वभरणी विश्वात्मा विश्वालयव्रजेश्वरी ॥ ११९॥
विश्वासरूपा विश्वेषां साक्षिणी विस्तृतोत्तमा ।
वीणावाणी वीतभ्रान्तिः वीतरागस्मयादिका ॥ १२०॥
वीतशङ्कासमाराध्या वीतसम्पूर्णसाध्वसा ।
बुधाराध्याङ्घ्रिकमला वृपपा वेदकारणम् ॥ १२१॥
वेदगा वेदनिःश्वासा वेदप्रणुतवैभवा ।
वेदप्रतिपाद्यतत्त्वा वेदवेदान्तकोविदा ॥ १२२॥
वेदरक्षाविधानज्ञा वेदसारमयाकृतिः ।
वेदान्तवेद्या वेदान्ता वैदेही वैभवार्णवा ॥ १२३॥
वङ्कचिकुरा वङ्कभ्रूर्वङ्काकर्षणवीक्षणा ।
शक्तिव्रजेश्वरी शक्तिः शतमूर्तिः शतोदिता ॥ १२४॥
शब्दब्रह्मातिगा शब्दविग्रहा शमदायिनी ।
शमिताश्रितसङ्क्लेशा शमिभक्त्याशुतोषिता ॥ १२५॥
शम्पादामोल्लसत्कान्तिः शम्प्रदध्यानसंस्तवा ।
शम्मयाशेषकैङ्कर्य्या शरणं सर्वदेहिनाम् ॥ १२६॥
शरणागतसन्त्रात्री शरण्यैकाऽसुधारिणाम् ।
शबरीमानदप्रेष्ठा शान्ता शान्तिप्रदायिनी ॥ १२७॥
शाश्वतचिन्तनीयाङ्घ्रिकमला शाश्वतस्थिरा ।
शाश्वती शासिकोत्कृष्टा शिरोधार्यकराम्बुजा ॥ १२८॥
शिशिरा शीलसम्पन्ना शुचिगम्याङ्घ्रिचिन्तना ।
शुचिप्राप्यपदासक्तिः शुद्धान्तःकरणालया ॥ १२९॥
शुद्धा शुद्धिप्रदध्याना शूलत्रयनिवारिणी ।
शैलराजसुतादीष्टा शोभासागर सत्कृता ॥ १३०॥
शौर्यपाथोनिधिः श्यामा श्रयणीयपदाम्बुजा ।
श्रवणीययशोगाथा श्रीकरी श्रीप्रदायिनी ॥ १३१॥
श्रीमदुत्तंसमहिता श्रीमयी श्रीमहानिधिः ।
श्रीलक्ष्म्यादिभिः सेव्या श्रीवासा श्रीसमुद्भवा ॥ १३२॥
श्रीः श्रुतिगीतचरिता श्रुत्यन्तप्रतिपादिता ।
श्रेयोगुणेरणा श्रेयोनिधिः श्रेयोमयस्मृतिः ॥ १३३॥
श्रोत्रियैकसमाराध्या श्लक्ष्णसूनृतभाषिणी ।
श्लाघनीयमहाकीर्तिः श्लीलचारित्र्यविश्रुता ॥ १३४॥
श्लोकलोकार्चिताब्जाङ्घ्रिः श्वसनाधीशसत्कृता ।
श्वेतधामोल्लसद्वक्त्रा षट्चतुर्वस्विलोदिता ॥ १३५ ॥
षडतीता षडाधारा षडर्द्धाक्षहृदिस्थिता ।
सखीमण्डलमध्यस्था सगुणा सङ्क्षयोज्झिता ॥ १३६॥
सङ्ख्यातीतगुणा सङ्गमुक्ता सङ्गीतकोविदा ।
सङ्गीर्णप्रणतत्राणा सङ्ग्रहानुग्रहे रता ॥ १३७॥
सख्यशीघ्रसमासाद्या सज्जनोपासिताङ्घ्रिका ।
सतताराध्यचरणा सतीत्वादर्शदायिनी ॥ १३८॥
सतीवृन्दशिरोरत्नं सतीशाजस्रभाविता ।
सत्तमा सत्यधर्मैकपालिका सत्यरूपिणी ॥ १३९॥
सत्यसञ्चिन्तना सत्यसन्धा सत्यापतिस्नुषा ।
सत्या सत्रधरागर्भोद्भूता सत्ववदग्रणीः ॥ १४०॥
सदाचारा सदासेव्या सदृशातीतशेमुषी ।
सनातनी सदानम्या सन्तोषैकप्रदायिनी ॥ १४१॥
सन्देहापहरा सन्धिः सन्निषेव्यसमाश्रिता ।
सन्नुत्याशेषचरिता सभ्यलोकसभाजिता ॥ १४२॥
समग्रज्ञानवैराग्यधर्मश्रीर्यशोनिधिः ।
समग्रैश्वर्यसम्पन्ना समतीतगुणोपमा ॥ १४३॥
समदृष्टिः समर्च्यैका समर्थाग्रा समर्धका ।
समविश्वमनोज्ञाङ्गी समवेक्ष्याङ्घ्रिलाञ्छना ॥ १४४॥
समाकर्ण्ययशोगाथा समाहर्त्री समाहिता ।
समानात्मा समाराध्या समालम्ब्याङ्घ्रिपङ्कजा ॥ १४५॥
समावर्ता समासेव्या समार्हा समितिञ्जया ।
समीक्ष्याव्याजकरुणा सविभाव्यसुविग्रहा ॥ १४६॥
सरयूपुलिनाक्रीडा सरला सरसेक्षणा ।
सर्गस्थित्यन्तप्रभवा सर्वकामप्रदायिनी ॥ १४७॥
सर्वकार्यबुधा सर्वच्छद्मज्ञा सर्वजन्मदा ।
सर्वजीवहिता सर्वज्ञानिनां ज्ञेयसत्तमा ॥ १४८॥
सर्वज्ञाननिधिः सर्वज्ञानवद्भिरुपासिता ।
सर्वज्ञा सर्वज्येष्ठादिः सर्वतीर्थमयस्मृतिः ॥ १४९॥
सर्वतोऽक्ष्यास्यहस्ताङ्घ्रिकमला सर्वदर्शना ।
सर्वदिव्यगुणोपेता सर्वदुःखहरस्मिता ॥ १५०॥
सर्वदेवनुता सर्वधर्मतत्त्वविदां वरा ।
सर्वधर्मनिधिः सर्वनायकोत्तमनायिका ॥ १५१॥
सर्वनीतिरहस्यज्ञा सर्वनैपुण्यमण्डिता ।
सर्वपापहरध्याना सर्वपावनपावनी ॥ १५२॥
सर्वभक्तावनाभिज्ञा सर्वभक्तिमतां गतिः ।
सर्वभावपदातीता सर्वभावप्रपूरिका ॥ १५३॥
सर्वभक्तिप्रदोत्कृष्टा सर्वभूतहिते रता ।
सर्वभूताशयाभिज्ञा सर्वभृतसुधारिणी ॥ १५४॥
सर्वमङ्गलमाङ्गल्या सर्वमण्डनमण्डना ।
सर्वमेधाविनां श्रेष्ठा सर्वमोदमयेक्षणा ॥ १५५॥
सर्वमोहच्छिदासक्तिः सर्वमोहनमोहिनी ।
सर्वमौलिमणिप्रेष्ठा सर्वयज्ञफलप्रदा ॥ १५६॥
सर्वयज्ञव्रतस्नाता सर्वयोगविनिःसृता ।
सर्वरम्यगुणागारा सर्वलक्षणलक्षिता ॥ १५७॥
सर्वलावण्यजलधिः सर्वलीलाप्रसारिणी ।
सर्वलोकनमस्कार्या सर्वलोकेश्वरप्रिया ॥ १५८॥
सर्वलोकेश्वरी सर्वलौकिकेतरवैभवा ।
सर्वविद्याव्रतस्नाता सर्ववैभवकारणम् ॥ १५९॥
सर्वशक्तिमतामिष्टा सर्वशक्तिमहेश्वरी ।
सर्वशत्रुहरा सर्वशरणं सर्वशर्मदा ॥ १६०॥
सर्वश्रेयस्करी सर्वसहा सर्वसदर्चिता ।
सर्वसद्भावनाधारा सर्वसद्भावपोषिणी ॥ १६१॥
सर्वसौख्यप्रदा सर्वसौभाग्यैकप्रदायिनी ।
साकेतपरमस्थाना साकेतपरमोत्सवा ॥ १६२॥
साकेताधिपतिप्रेष्ठा साकेतानन्दवर्षिणी ।
साक्षान्छ्रीः साक्षिणी सर्वदेहिनां सर्वकर्मणाम् ॥ १६३॥
साघप्राणिजनारुष्टा सातपत्रोत्तमासना ।
साधनातीतसम्प्राप्तिः साध्या साध्वीजनप्रिया ॥ १६४॥
सामगा सामगोद्गीता साफल्यैकप्रदायिनी ।
सामर्थ्यजगदाधारमोहिनी साम्यदायिनी ॥ १६५॥
सारज्ञा सिद्धसङ्कल्पा सिद्धसेव्यपदाम्बुजा ।
सिद्धार्था सिद्धिदा सिद्धिरूपिणी सिद्धिसाधनम् ॥ १६६ ।
सीता सीमन्तिनीश्रेष्ठा सीरध्वजनृपात्मजा ।
सुकटाक्षा सुकीर्तीड्या सुकृतीनां महाफला ॥ १६७॥
सुकेशीसुखमूलैका सुखसन्दोहदर्शना ।
सुगमा सुघनज्ञाना सुचार्वी सुजवोत्तमा ॥ १६८॥
सुज्ञा सुतन्वी सुदती, सुदाननिरताश्रया ।
सुधावाणी सुधीरात्मा सुधीश्रेष्ठा सुधेक्षणा ॥ १६९॥
सुनयनाक्रोडरत्नं सुनयनाप्रपोषिता ।
सुनयनामहाराज्ञीहृदयानन्दवर्द्धिनी ॥ १७०॥
सुनासा सुनिदिध्यास्या सुनीतिः सुप्रतिष्ठिता ।
सुप्रसादा सुभगायाः करपल्लवचर्चिता ॥ १७१॥
सुभगा सुभुजा सुभ्रूः सुमुखी सुरपूजिता ।
सुराध्यक्षा सुरानम्या सुराधीशजरक्षिका ॥ १७२॥
सुरेश्वरी च सुलभा सुवर्णाभाङ्गशोभना ।
सुवेद्यैका सुशरणं सुश्रीः सुश्लोकसत्तामा ॥ १७३॥
सृष्टदीनहितोपाया सृष्टिजन्मादिकारिणी ।
सेव्या सैरध्वजीज्येष्ठा सोमवत्प्रियदर्शना ॥ १७४॥
सौभाग्यजननी सौम्या स्थानं सर्वासुधारिणाम् ।
स्थिरा स्थूलदया चैव स्थूलसूक्ष्मविलक्षणा ॥ १७५॥
स्रष्टृपात्रन्तकर्तॄणामीश्वरी स्वगतिप्रदा ।
स्वङ्घ्रिका स्वच्छहृदया स्वच्छन्दा स्वजनप्रिया ॥ १७६॥
स्वजनानन्दनिवहा स्वतर्क्या स्वधरस्मिता ।
स्वधर्माचरणाख्याता स्वधर्मावनपण्डिता ॥ १७७॥
स्वधास्वरूपा स्वधृता स्वभावाघहरस्मिता ।
स्वभावापास्तनार्शस्या स्वभावावर्ण्यमार्दवा ॥ १७८॥
स्वभावावाच्यवात्सल्या स्ववशा स्वस्तिदक्षिणा ।
स्वस्तिदा स्वस्तिरूपा च स्वामिनीसर्वदेहिनाम् ॥ १७९॥
स्वास्या स्वाश्रितसर्वेष्टदायिनी स्विष्टदेवता ।
स्वेच्छाचारेणरहिता हरिणोत्फुल्ललोचना ॥ १८०॥
हारसम्भूषिता हास्यस्पर्द्धिचन्द्रकरव्रजा ।
हितैका सर्वजगतां हृदयानन्दवर्द्धिनी ॥ १८१॥
हृदयेशी च हृद्यैका हेमागारनिवासिनी ।
हेमासेव्यपदाम्भोजा हेयपादाब्जविस्मृतिः ॥ १८२॥
ह्लादिनी ह्रीमतां श्रेष्ठा क्षमाध्वस्तधरास्मया ।
क्षमास्वरूपा क्षमिणां क्षमेशी क्षान्तिविग्रहा ॥ १८३॥
क्षितीशतनया क्षेमदायिनी क्षेमयाऽर्चिता ।
सुता तवैषा कल्याणी सर्वोपास्येति में मतम् ॥ १८४॥
इयं हि राजन् ! मृगपोतलोचना वागीश्वरीशैलसुतारमादिभिः ।
निषेव्यमाणाड्घ्रिसरोरुहद्वया विराजते पूर्णसुधाकरानना ॥ १८५॥
महामुनीनां यतिपुङ्गवानां योगेश्वराणां सुरसत्तमानाम् ।
सिद्धीश्वराणां विगतैषणानां भोगार्थिनां मोक्षपदेच्छुकानाम् ॥ १८६॥
हानीतरोत्सुक्यसमन्वितानां स्वजन्मनो भूमिपतेऽखिलानाम् ।
सम्भावनीया समुपासनीया ज्ञेयाऽनुगेया तनया तवेयम् ॥ १८७॥
अनन्तनामानि तवात्मजायाः सन्ति क्षितीशप्रवराद्य तेषाम् ।
मया सहस्रेण मुदा प्रगीता तनोतु शं सेयमयोनिजा नः ॥ १८८॥
भक्त्याऽनुरक्त्या पठतामजस्र ध्यानान्वितानां तनया धरण्या ।
दृग्गोचरी वञ्छितसिद्धिदात्री भूयाद्द्रुतं नाम सहस्रमेतत् ॥ १८९॥
श्रीशिव उवाच ।
नृणां चतुर्वर्गविलोलचेतसां पाट्यं सङ्कल्पमिदं शुभावहम् ।
गिरीन्द्रकन्ये ! मधुराक्षरान्विते श्रीजानकीनामसहस्रमन्वहम् ॥ १९०॥
इति सप्ताशीतितमोऽध्यायान्तर्गतं श्रीजानकीसहस्रनामस्तोत्रं सम्पूर्णम् ॥८७॥
Proofread by Raman. M, PSA Easwaran