श्रीचक्रेश्वरीस्तोत्रम्
श्रीजीनदत्तसूरिविरचितं
श्रीचक्रेश्वरि चक्रचुम्बितकरे चञ्चच्चलत्कुण्डला-
लङ्कारे कृतमस्तकोरुमुकुटे ग्रैवेयकालङ्कृते ।
स्फारोदारभुजाग्रभूषणकरे सन्नूपुरैर्बन्धुरे
मातर्मन्ति नयं स्वमिष्टविनयं त्रायस्व सन्त्रासतः ॥ १॥
श्रीचकेश्वरी चन्द्रमण्डलमिव ध्वस्तान्धकारोत्करं
भव्यप्राणिचकोरचुम्बितकरं सन्तापसम्पद्धरम् ।
सम्यग्दृष्टिसुखप्रदं सुविशदं कान्त्यास्पदं सम्पदां
पात्रं जीवमनःप्रसादजनकं भाति त्वदीयं मुखम् ॥ २॥
श्रीचकेश्वरी युष्मदाननरविं पश्यन्ति नैवोदितं
ध्वस्तध्वान्तततिं प्रदत्तसुगतिं संप्राप्तमार्गस्थितिम् ।
ते ज्ञेया इह कौशिका इव जना हेयाः सतां सर्वथा
नादेयाः कुदृशो भवन्ति भगवन्युच्चैःशिव वाञ्छताम् ॥ ३॥
श्रीचक्रेश्वरी युष्मदङ्घ्रिचरितं सर्वत्र तद्विश्रुतं
कस्याज्ञस्य मनोमुदे भवति नो निष्पुण्यचूडामणेः ।
कारुण्यान्वितमङ्गिसम्मतमतिभ्रान्तिप्रशान्तप्रियं
श्रीसङ्केतगृहं सदास्तविरहं पुण्यानुबन्धि स्फुटम् ॥ ४॥
श्रीचकेश्वरि ये स्तुवन्ति भवतीं भव्या भवद्भक्तयः
श्रीसर्वज्ञपदारविन्दयुगले विश्राममातन्वतीम् ।
भृङ्गीवत्सदृशां सुखं त्वसदृशं संप्रार्थयन्तो जना-
स्ते स्युर्ध्वस्तविपत्तयः सुमतयः स्पष्टं जितारातयः ॥ ५॥
श्रीचक्रेश्वरि नित्यमेव भवतीनामाऽपि ये सादरं
सन्तः सत्यशमाश्रिताः प्रतिपदं सम्यक् स्मरन्ति स्फुरत् ।
तेषां किं दुरितानि यान्ति निकटे नायाति किं श्रीर्गृहे
नोपैति द्विषतां गणोऽपि विलयं नाऽभीष्टसिद्धिर्भवेत् ॥ ६॥
श्रीचक्रेश्वरि ये भवन्ति भवतीपादारान्वेन्दाश्रिता-
स्ते भृङ्गा इव कामितार्थमधुनः पात्रं सदैवाङ्गिनः ।
जायन्ते जगति प्रतीतिभवनं भव्याः स्फुरत्कीर्त्तय-
स्तेषां क्वापि कदापि सा भवति नो दारिद्र्यमुद्रा गृहे ॥ ७॥
श्रीचक्रेश्वरि यः स्तवं तव करोत्युच्चैः स किं मानवः
कस्मादन्यजनाच्च याचत इह क्लेशैर्विमुक्ताशयः ।
कासश्वासशिरोगलग्रहकटीवातातिसारज्वर-
स्रोतोनेत्रगतामयैरपि न स श्रेयानिह प्रार्थते ॥ ८॥
श्रीचक्रेश्वरि शासनं जिनपतेस्तद्रक्षसि त्वं मुदा
ये केचिज्जिनभाषितान्यवितथात्युच्चैः प्रजल्पन्ति च ।
भव्यानां पुरतो हितानि कुरुषे तेषां तु तुष्टिं सदा
क्षुद्रोपद्रवविद्रवं प्रतिपदं कृत्वा कृतान्तादपि ॥ ९॥
श्रीचक्रेश्वरि विश्वविस्मयकरी त्वं कल्पवृक्षोपमा
धत्सेऽभीष्टफलानि वस्तुनिकृतिं दत्से विना संशयम् ।
तेन त्वं विनुता मयाऽपि भवती मत्वेति मन्निश्चयं
कुर्याः श्रीजनदत्तभक्तिषु मनो मे सर्वदा सर्वथा ॥ १०॥
इति श्रीजीनदत्तसूरिविरचितं श्रीचक्रेश्वरीस्तोत्रं सम्पूर्णम् ।
Proofread by DPD