श्रीबालात्रैलोक्यविजयकवचम्
श्रीभैरव उवाच-
अधुना ते प्रवक्ष्यामि कवचं मन्त्रविग्रहम् ।
त्रैलोक्यविजयं नाम रहस्यं देवद्रुलभम् ॥ १॥
श्रीदेव्युवाच-
या देवी त्र्यक्षरी बाला चित्कला श्रीसरस्वती ।
महाविद्येश्वरी नित्या महात्रिपुरसुन्दरी ॥ २॥
तस्याः कवचमीशान मन्त्रगर्भं परात्मकम् ।
त्रैलोक्यविजयं नाम श्रोतुमिच्छामि तत्त्वतः ॥ ३॥
श्रीभैरव उवाच-
देवदेवि महादेवि बालाकवचमुत्तमम् ।
मन्त्रगर्भं परं तत्त्वं लक्ष्मीसंवर्धनं महत् (परम्) ॥ ४॥
सर्वस्वं मे रहस्यं तु गुह्यं त्रिदशगोपितम् ।
प्रवक्ष्यामि तव स्नेहान्नाख्येयं यस्य कस्यचित् ॥ ५॥
(यद्धृत्वा कवचं देव्या मातृकाक्षरमण्डितम् ।
नारायणोऽपि दैत्येन्द्रान् जघान रणमण्डले ॥ ६॥
त्र्यम्बकः कामदेवं च बलं शक्रो जघान हि ।
कुमारस्तारकं दैत्यमन्धकं चन्द्रशेखरः ॥ ७॥
अवधीद्रावणं रामो वातापिं कुम्भसम्भवः ।
कवचस्यास्य देवेशि धारणात्पठनादपि ॥ ८॥
स्रष्टा प्रजापतिर्ब्रह्मा विष्णुस्त्रैलोक्यपालकः ।
शिवोऽणिमादिसिद्धीशो मघवान् देवनायकः ॥ ९॥
सूर्यस्तेजोनिधिर्देवि चन्द्रस्ताराधिपः स्थितः ।
वह्निर्महोर्मिनिलयो वरुणोऽपि दिशां पतिः ॥ १०॥
समीरो बलवांल्लोके यमो धर्मनिधिः स्मृतः ।
कुबेरो निधिनाथोऽस्ति नैरृतिः सर्वराक्षसान् ॥ ११॥
ईश्वरः शङ्करो रुद्रो देवि रत्नाकरोऽम्बुधिः ।
अस्य स्मरणमात्रेण कुले तस्य कुलेश्वरि ॥ १२॥
आयुः कीर्तिः प्रभा लक्ष्मीर्वृद्धिर्भवति सन्ततम् ।
कवचं सुभगं देवि बालायाः कौलिकेश्वरि ॥) १३॥
ऋषिः स्याद्दक्षिणामूर्तिः पङ्क्तिश्छन्द उदाहृतः ।
बाला सरस्वती देवि देवता त्र्यक्षरी स्मृता ॥ १४॥
बीजं तु वाग्भवं प्रोक्तं शक्तिः शक्तिरुदाहृता ।
कीलकं कामराजं तु फडाशाबन्धनं तथा ।
भोगापवर्गसिद्ध्यर्थं विनियोगः प्रकीर्तितः ॥ १५॥
अकुलकुलमयन्ती चक्रमध्ये स्फुरन्ती
मधुरमधु पिबन्ती कण्टकान् भक्षयन्ती ।
दुरतिमपहरन्ती साधकान् पोषयन्ती
जयतु जयतु बाला सुन्दरी क्रीडयन्ती ॥
ऐं बीजं मे शिरः पातु क्लीं बीजं भ्रुकुटीं मम ।
सौः भालं पातु मे बाला ऐं क्लीं सौः नयने मम ॥ १॥
अं आं इं ईं श्रुती पातु बाला पञ्चाक्षरी मम ।
उं ऊं ऋं ॠं सदा पातु मम नासापुटद्वयम् ॥ २॥
लृं लॄं एं ऐं पातु गण्डौ ऐं क्लीं सौः त्रिपुराम्बिका ।
ॐ औं अं अः मुखं पातु सौः क्लीं ऐं त्रिपुरेश्वरी ॥ ३॥
कं खं गं घं डं करौ मे सौः क्लीं ऐं भगमालिनी ।
चं छं ज झं ञं मे पातु बाहू सौः सर्वसिद्धिदा ॥ ४॥
टं ठं डं ढं णं मे पातु वक्षः क्लीं वीरनायिका ।
तं थं दं धं नं मे पातु ऐं कुक्षौ कुलनायिका ॥ ५॥
पं फं बं भं मं मे पातु पार्श्वौ परमसुन्दरी ।
यं रं लं वं पातु पृष्ठं सौः क्लीं ऐं विश्वमातृका ॥ ६॥
शं षं सं हं पातु नाभिं सौः सौः सौः त्रिगुणात्मिका ।
लं क्षं कटिं सदा पातु क्लीं क्लीं क्लीं मातृकेश्वरी ॥ ७॥
ऐं ऐं ऐं पातु लिङ्गं मे भगलिङ्गामृत्श्वरी ।
ऐं क्लीं गुह्यं सदा पातु भगलिङ्गस्वरूपिणी ॥ ८॥
सौः ऐं ऊरू सदा पातु वेदमाताऽष्टसिद्धिदा ।
सौः ऐं जानु सदा पातु महामुद्राभिमुद्रिता ॥ ९॥
सौः ऐं क्लीं पातु मे जङ्घे बाला त्रिभुवनेश्वरी ।
ऐं ऐं सौः सौः पातु गुल्फौ त्रैलोक्यविजयप्रदा ॥ १०॥
ऐं ऐं क्लीं क्लीं पातु पादौ बाला त्र्यक्षररूपिणी ।
शिरसः पादपर्यन्तं सर्वावयवसंयुतम् ॥ ११॥
पायात्पादादि शीर्षान्तं ऐं क्लीं सौः सकलं वपुः ।
ब्राह्मी मां पूर्वतः पातु वह्नौ नारायणी तथा ॥ १२॥
माहेश्वरी दक्षिणेऽव्यान्नैरृत्ये चण्डिकाऽवतु ।
पश्चिमे पातु कौमारी वायव्ये चापराजिता ॥ १३॥
वाराही तूत्तरे पायादीशान्यां नारसिंहका ।
प्रभाते भैरवी पातु मध्याह्ने योगिनी क्रमात् ॥ १४॥
सायं मां वटुकः पायादर्धरात्रे शिवोऽवतु ।
निशान्ते सर्वगा पातु सर्वदा चक्रनायिका ॥ १५॥
रणे राजकुले द्यूते विवादे शत्रुसङ्कटे ।
सर्वत्र सर्वतः पातु ऐं क्लौ सौः बीजभूषिता ॥ १६॥
इतीदं कवचं दिव्यं बालायाः सारमुत्तमम् ।
मन्त्रविद्यामयं तत्त्वं मातृकाक्षरभूषितम् ॥ १७॥
ब्रह्मविद्यामयं ब्रह्मसाधनं मन्त्रसाधनम् ।
यः पठेत्सततं भक्त्या धारयेद्वा महेश्वरि ॥ १८॥
तस्य सर्वार्थसिद्धिः स्यात् साधकस्य न संशयः ।
रवौ भूर्जे लिखित्वेदं अर्चयेद्धारयेत्ततः ॥ १९॥
वन्ध्यापि काकवन्ध्यापि मृतवत्सापि पार्वति ।
लभेत्पुत्रान् महावीरान् मार्कण्डेयसमायुषः ॥ २०॥
वित्तं दरिद्रो लभते मतिमानयशःस्त्रियः ।
य एतद्धारयेद्वर्म सङ्ग्रामे स रिपून् जयेत् ॥ २१॥
जित्वा वैरिकुलं घोरं कल्याणं गृहमाविशेत् ।
बाहौ कण्ठे तथा देवि धारयेन्मूर्ध्नि सन्ततम् ॥ २२॥
इह लोके धनारोग्यं परमायुर्यशः श्रियम् ।
प्राप्य भक्त्या नरो भोगानन्ते याति परं पदम् ॥ २३॥
इदं रहस्यं परमं सर्वतत्त्वेषु ह्युत्तमम् ।
गुह्याद्गुह्यमिमं नित्यं गोपनीयं स्वयोनिवत् ॥ २४॥
(रुद्रयामले)
(१-१६ श्लोकेषु पाठभेदः -
अं आं इं ईं श्रुती पातु बाला कामेश्वरी मम ।
उं उं ऋं ॠं सदा पातु मम नासापुटद्वयम् ॥ २॥
लृं लॄं एं ऐं पातु गण्डौ ऐं क्लीं सौः त्रिपुराम्बिका ।
ॐ औं अं अः मुखं पातु क्लीं ऐं सौः त्रिपुरेश्वरी ॥ ३॥
कं खं गं घं ङं करौ मे सौः ऐं क्लीं शत्रुमर्दिनी ।
चं छं जं झं ञं पातु मे कुक्षिं ऐं कुलनायिका ॥ ४॥
टं ठं डं ढं णं पातु मे वक्षः क्लीं भगमालिनी ।
तं थं दं धं नं पातु मे बाहू सौः जयदायिनी ॥ ५॥
पं फं बं भं मं मे पातु पार्श्वे परमसुन्दरी ।
यं रं लं वं पातु पृष्ठं ऐं क्लीं सौः विश्वमातृका ॥ ६॥
शं षं सं हं पातु नाभिं भगवत्यमृतेश्वरी ।
लं क्षं कटिं सदा पातु क्लीं क्लीं क्लीं मातृकेश्वरी ॥ ७॥
ऐं ऐं ऐं पातु मे लिङ्गं भगं मे भगगर्भिणी ।
सौः सौः सौः पातु मे ऊरू वीरमाताऽष्टसिद्धिदा ॥ ८॥
सौः ऐं क्लीं जानू मे पातु महामुद्राभिमुद्रिता ।
सौः क्लीं ऐं पातु मे जङ्घे बाला त्रिभुवनेश्वरी ॥ ९॥
क्लीं ऐं सौः पातु गुल्फौ मे त्रैलोक्यविजयप्रदा ।
ऐं क्लीं सौः पातु मे पादौ बाला त्र्यक्षररूपणी ॥ १०॥
शीर्षादिपादपर्यन्तं सर्वावयवसंयुतम् ।
पायात्पाय्वादि शीर्षाङ्गं ऐं क्लीं सौः सकलं वपुः ॥ ११॥
ब्राह्मी मां पूर्वतः पातु वह्नी वाराहिकाऽवतु ।
महेश्वरी दक्षिणे च इन्द्राणी पातु नैरृतौ ॥ १२॥
पश्चिमे पातु कौमारी वायव्ये चण्डिकाऽवतु ।
वैष्णवी पातु कौबेर्यां ईशान्यां नारसिंहिका ॥ १३॥
प्रभाते भैरवी पातु मध्याह्ने योगिनी तथा ।
सापाह्ने वटुका पातु अर्धरात्रे शिवाऽवतु ॥ १४॥
निशान्ते सर्वगा पातु सर्वदा चक्रनायिका ।
रणे नागकुले द्यूते विवादे शत्रुसङ्कटे ॥
सर्वत्र सर्वदा पातु ऐं क्लीं सौः बीजभूषिता । १५॥)
इति श्रीबालात्रैलोक्यविजयकवचं सम्पूर्णम् ।
Proofread by PSA Easwaran