श्रीबालास्तोत्रं ७
श्रीभैरवः -
अधुना देवि बालायाः स्तोत्रं वक्ष्यामि पार्वति ।
पञ्चमाङ्गं रहस्यं मे श्रुत्वा गोप्यं प्रयत्नतः ॥ १॥
अरुणकिरणजालैरञ्जिताशावकाशा
विधृतजपवटीका पुस्तकाभीतिहस्ता ।
इतरकरवराढ्या फुल्लकह्लारसंस्था
निवस्तु हृदि बाला नित्यकल्याणशीला ॥ २॥
वाणीं जपेद्यस्त्रिपुरे भवान्या बीजं निशीथे जडभावलीनः ।
भवेत्स गीर्वाणगुरोर्गरीयान् गिरीशपत्निप्रभुतादि तस्य ॥ ३॥
कामेश्वरि त्र्यक्षरीकामराजं जपेद्दिनान्ते तव मन्त्रराजम् ।
रम्भापि जम्भारिसभां विहाय भूमौ भजेत्तं कुलदीक्षितं च ॥ ४॥
तार्तीयकं बीजमिदं जपेद्यस्त्रैलोक्यमातस्त्रिपुरे पुरस्तात् ।
विधाय लीलां भुवने तथान्ते निरामयं ब्रह्मपदं प्रयाति ॥ ५॥
धरासद्मत्रिवृत्ताष्टपत्रषट्कोणनागरे ।
बिन्दुपीठेऽर्चयेद्बालां योऽसौ प्रान्ते शिवो भवेत् ॥ ६॥
इति मन्त्रमयं स्तवं पठेद्यस्त्रिपुराया निशि वा निशावसाने ।
स भावेद्भुवि सार्वभौममौलिस्त्रिदिवे शक्रसमानशौर्यलक्ष्मीः ॥ ७॥
इतीदं देवि बालायाः स्तोत्रं मन्त्रमयं परम् ।
अदातव्यमभक्तेभ्यो गोपनीयं स्वयोनिवत् ॥ ८॥
इति रुद्रयामलान्तर्गतं श्रीबालास्तोत्रं (७) सम्पूर्णम् ।
Proofread by PSA Easwaran