श्रीबालानामस्मरणपूर्वकस्वरूपध्यानम्
कल्याणी त्रिपुरा बाला माया त्रिपुरसुन्दरी ।
सुन्दरी सर्वसौभाग्यवती ह्रीङ्काररूपिणी ॥ १॥
ऐङ्कारी सर्वजननी क्लीङ्कारी परमेश्वरी ।
सौःकारी सर्वशक्त्याढ्या त्र्यक्षरी दिव्यगन्धिनी ॥ २॥
संविदानन्दलहरी श्रीविद्या त्रिपुरेश्वरी ।
गुप्ता गुत्पतरा नित्या नित्या षोडशकावृता ॥ ३॥
भक्तानुरक्ता रक्ताङ्गी शिवा सर्वारुणा शुभा ।
मोहिनी परमानन्दा कामेशी तरुणी कला ॥ ४॥
पद्मावती भगवती पद्मरागकिरीटिनी ।
रक्तवस्त्रा रक्तभूषा रक्तगन्धानुलेपना ॥ ५॥
सौगन्धिकमिलद्वेणी मन्त्रिणी मन्त्रपुष्पिणी ।
तत्त्वासना तत्त्वमयी सिद्धान्तःपुरवासिनी ॥ ६॥
श्रीवाणीड्या महादेवी कौलिनी परदेवता ।
कैवल्यरेखा वशिनी सर्वेशी सर्वमङ्गला ॥ ७॥
नारायणी वेदवेद्या सर्वसम्पत्प्रदा सती ।
चतुर्भुजा चन्द्रचूडा पुराणागमबोधिता ॥ ८॥
भूतेश्वरी भूतमयी पञ्चाशद्वर्णरूपिणी ।
सर्वमङ्गलमाङ्गल्या कामाक्षी कामदायिनी ॥ ९॥
किङ्करीभूतगीर्वाणी सुधापानविनोदिनी ।
आधारवीथीपथिका स्वाधिष्ठानसमाश्रिता ॥ १०॥
मणिपूरसमासीना अनाहतनिवासिनी ।
विशुद्धिचक्रनिलया आज्ञाचक्रनिवासिनी ॥ ११॥
अष्टत्रिंशत्कलामूर्तिः सुषुम्नागारमध्यगा ।
योगीश्वरमुनिध्येया परब्रह्मस्वरूपिणी ॥ १२॥
दिक्पालशक्तिसंयुक्ता सर्वाशापरिपूरका ।
अनङ्गकुसुमादीड्या वाग्देव्यष्टकसंवृता ॥ १३॥
सर्वसौभाग्यदेशानी मात्रष्टकसमावृता ।
भैरवष्टकसंसेव्या सर्वाभीष्टार्थसाधिका ॥ १४॥
योगिनीषट्कसंसेव्या सर्वरक्षाकराधिपा ।
रतिप्रीतिविजयाख्यत्रिशक्तिगुरुसेविता ॥ १५॥
सर्वसिद्धिप्रदेशानी सर्वानन्दमयाधिपा ।
रहःपूजासमालोला बिन्दुस्थलमनोहरा ॥ १६॥
त्रिकोणमध्यनिलया षट्कोणपुरवासिनी ।
वसुपत्रद्वयावासा भूपुरद्वयमध्यगा ॥ १७॥
शिवकामेश्वराङ्कस्थकामेश्वर्यङ्कवासिनी ।
कामेश्वरीसमाकारा फुल्लकल्हारमध्यगा ॥ १८॥
पुस्तकाभीतिवरदजपमालालसत्करा ।
तरुणारुणदेहाभा दिव्याभरणभूषिता ॥ १९॥
बन्धूककुसुमप्रख्या बाललीलाविनोदिनी ।
काश्मीरकर्दमालिप्ततनुच्छायाविराजिता ॥ २०॥
सपर्याचारनिरतगुरुमण्डलसेविता ।
चतुर्वर्गप्रदानोत्क नित्यकल्याणरूपिणी ॥ २१॥
एवं ध्याता हृदि सदा पराम्बा बालरूपिणी ।
देवि ! भाग्यवशादत्र सन्निधत्से चिदाकृतिः ॥ २२॥
इति श्रीबालानामस्मरणपूर्वकस्वरूपध्यानं सम्पूर्णम् ।
Proofread by PSA Easwaran