Yatiraja Vijaya Shlokah

 यतिराजविजयश्लोकाः 
            ॥ श्रीः ॥

    ॥ श्रीमते रामानुजाय नमः ॥

 ॥ श्रीघटिकाशतवात्स्यवरदगुरवे नमः ॥

श्रीघटिकाशतवात्स्यवरद्गुरुभिरनुगृहीताः
॥ अथ यतिराजविजयश्लोकाः (१)॥

नमो वरदविष्ण्वार्यनयनानन्ददायिने ।
वात्स्याय वरदार्याय वादिनीहारभास्वते ॥

मायाविमोहितसुरानसुरानलावीत्
      येनाच्युतस्स कुहनासमयैर्मनुष्यान् ।
सम्मोहयत्सु पुनरेषु सुदर्शनोऽपि
      तानेव जेतुमधुना यतिशेखरोऽभूत् ॥ १॥

त्रिदण्डकाषायशिखोपवीतैः
      प्रसाधयन् पारमहंस्यलक्ष्मीम् ।
वैकुण्ठमारोपयितुं मुमुक्षून्
      सोपानकारी यतिराज एषः ॥ २॥

स एष साक्षात्कृतकृष्णदत्तां
      निक्षेपविद्यां निरवद्यभूमा ।
गद्यात्मना कृष्णजनोपभोग्यां
      संवादरूपां विदधे दयालुः ॥ ३॥

प्रमाणेष्वेष वेदान्तः प्रमेयेषु परः पुमान् ।
प्रमातृषु यतीन्द्रोऽयं न द्वितीयमपेक्षते ॥ ४॥

कर्मव्याजकृताखिलात्मनिवहक्लेशावबोधस्फुरत्-
      पश्चात्तापकृपाविमोचितजगज्जन्मादिलीलादरम् ।
भोगैकप्रवणं विधास्यति परं ब्रह्मापि दत्ताभयः
      भूतेभ्यो यतिराज एष इति मे चेतस्यभून्निश्चयः ॥ ५॥

देहाक्षादिविलक्षणोऽणुरजडो नित्योऽहमर्थोऽमल-
      ज्ञानानन्दमयोऽप्यतन्मय इव भ्राम्यत्यविद्यावृतः ।
पञ्चक्लेशविपाकपावकशिखालीढस्य तस्यात्मनः
      निर्वाणाय निसर्गसौहृदनिधे ! नान्या गतिस्त्वांविना ॥ ६॥

सर्वज्ञो न न वेद तस्य करुणाराशेरुपेक्षा कुतः
      सर्वेशः किमसौ न शक्ष्यति परित्रातुं तथापि प्रभुः ।
सर्वान् रक्षति यत्कटाक्षकणिकापेक्षी नरानुद्धरन्
      संसाराम्बुनिधेः स एव हि गुरुः सर्वोत्तरं दैवतम् ॥ ७॥

त्रिवर्गमवधीरयन् त्रिविधचेतनाचेतन-
      प्रपञ्चमयकञ्चुके भगवति स्वयं ज्योतिषि ।
निवेशितधियां सतां निखिलमङ्गलैकास्पदं
      तमेव कथयन् गतिं यतिभिरीडितः क्रीडति ॥ ८॥

कुदर्शनानीतरदर्शनानि
      यतीन्द्र ! कुर्वन्निजदर्शनेन ।
सम्यक् श्रुतिन्यायकलापदर्शी
      सुदर्शनोऽसि प्रियदर्शनस्त्वम् ॥ ९॥

काले वर्षतु वासवः क्षितिभुजो रक्षन्तु सम्यक् महीं
      सर्वे सन्तु निरामयाश्च कृतिनः सत्वोत्तराः प्राणिनः ।
पुण्या लोकमिदं पुनातु भगवद्भक्तिः चिरस्थायिनी
      मालावत् यतिशेखरस्य विहरत्वाज्ञा नृणां मूर्धसु ॥ १०॥

इति श्रीघटिकाशतवात्स्यवरदगुरुभिरनुगृहीताः
                यतिराजविजयश्लोकाः सम्पूर्णाः ।

 Footnote
(१) श्रीघटिकाशतवात्स्यवरद्गुरुभिः (एते श्रीश्रुतप्रकाशिकाप्रसूतेः
श्रीनडादूरम्माल् वात्स्यवरदगुरोः वंश्याः, श्रीनिगमान्तमहादेशिकस्य
प्रशिष्याः, श्रीपरकालमठस्थापकस्य ब्रह्मतन्त्रस्वतन्त्रगुरोः
शिष्याः, श्रीमदहोबिलमठस्थापकस्य शठकोपमुनेः आचार्याः ।)
अनुगृहीतात् यतिराजविजयनाटकात् उद्धृता इमे श्लोकाः ॥)

नमो वरद्विष्ण्वार्यनयनानन्ददायिने ।
वात्स्याय वरदार्याय वादिनीहारभास्वते ॥

 ॥ श्रीघटिकाशतवात्स्यवरदगुरवे नमः ॥


Proofread by Aruna Narayanan