श्रीव्यासनामावलीस्तोत्रम्
ईशिता श्रुतिभर्ताच भुवन प्रभुरेव च ।
जगद्गुरुः सद्गुरुश्च मुनिवंशस्य शेखरः ॥ १॥
भगवत्तमो वेदराट् च तथा सत्यवतीसुतः ।
श्रुतीश्वरो नीलभाश्च पाराशर्यो महाप्रभुः ॥ २॥
वेदव्यासः सत्पतिश्च द्विजेन्द्रान्वयजस्तथा ।
जगत्पिताजितश्चैव मुनीन्द्रोवेदनायकः ॥ ३॥
देवतापूज्यचरणश्चाम्नायानां सुपालकः ।
भारतानां वरगुरुः ब्रह्मसूत्रप्रणायकः ॥ ४॥
द्वैपायनो मध्वनाथो ज्ञानसूर्यः सदिष्टदः ।
विद्यापतिः श्रुतिपतिः विद्याराजो गिरां प्रभुः ॥ ५॥
विद्याधिराजो वेदेशस्तथा वेदपतिः स्वभूः ।
विद्याधिनाथो वेदराट् तथाम्नाय विकासकः ॥ ६॥
विद्याधीशः श्रुतीशश्च श्रुतिपङ्कज भास्करः ।
कृष्णद्वैपायनो व्यासो भक्तचिन्तामणिस्तथा ॥ ७॥
महाभारत निर्माता कवीन्द्रो बादरायणः ।
स्मृतिमात्रार्तिहा चैव भक्तवित्रासहा तथा ॥ ८॥
विश्ववेत्ता विश्वपतिर्भक्ता ज्ञान विनाशकः ।
विघ्नौघध्वान्ततरणिर्विघ्नाटव्याश्च हव्यवाट् ॥ ९॥
विघ्नव्याल विपश्चैव विघ्नौघ घन मारुतः ।
विघ्नर्भ पञ्चाननश्च विघ्नपर्वत सत्पविः ॥ १०॥
विघ्नाब्धिकुम्भजश्चैव विघ्नतूल सरागतिः ।
बादरिर्जैमिनिश्चैव सुमन्तुर्वैशम्पायनः ॥ ११॥
आत्मरथ्यश्च पैलश्च काशकृत्स्नश्च लोमशः ।
कार्ष्णाजनिश्चौडुलोमिरात्रेयो रोमहर्षणः ॥ १२॥
इत्येते मुनयः शिष्या यस्यासौ मुनिशेखरः ।
ब्रह्माद्यैः प्रार्थितो विष्णुः सत्यवत्यां पराशरात् ॥ १३॥
प्रादुर्भूतो व्यासरूपी वेदोद्धारकस्तथा ।
विज्ञानरोचिषा पूर्णो ब्रह्माण्डान्तर्बहिस्तथा ॥ १४॥
योगिमानस कञ्जस्थः हरितोपलसन्निभः ।
भक्ताज्ञान सुसंहारी तर्क मुद्रायुतः करे ॥ १५॥
दक्षिणे भवभीतानां भवनाशाय मुद्रया ।
अभयाख्यया युतः सव्ये करे सन्मङ्गलप्रदः ॥ १६॥
प्राज्ञमौलिश्च पुरुधीः सुखकान्तिर्विबोध भाः ।
शतेन्द्वधिक सत्कान्तिरयोग्य जनमोहकः ॥ १७॥
शुक्लरक्त विदूरश्च ब्रह्माद्यैर्वर्णमानिभिः ॥
संस्तुतानन्द सुगुणो योगीन्द्रः पद्मजार्चितः ॥ १८॥
आचार्यवर्यो विप्रात्मा पापनाशननामवान् ।
वेदान्तकर्ता भक्तानां कविताधिगुणप्रदः ॥ १९॥
वादे विजयदश्चैव रणे च विजयप्रदः ।
कीटराज्यप्रदः कीटमोक्षदाता च सत्प्रभुः ॥ २०॥
आम्नायोद्धारकश्चैव तथा सत्परुवंशकृत् ।
मुनेः शुकस्य जनको जनकस्योपदेशकः ॥ २१॥
मातुः स्म्यत्यैवागमन वरदातेश्वरेश्वरः ।
यमुनाद्वीप सुजनिर्यमुनाद्वीप भासकः ॥ २२॥
मात्राज्ञापालनार्थाय भगवान् पुरुषोत्तमः ।
धृतराष्ट्र पाण्डु विदुरजनको ज्ञानदस्तथा ॥ २३॥
उग्ररूपः शान्तरूपोचिन्त्यशक्तिः परात्परः ।
पाण्डवानां दुःखहन्ता तथापरिमितान्तरः ॥ २४॥
हिडिम्बासङ्ग्रहार्ताय भीमाज्ञा संप्रदायकः ।
शाक्तः कानीन इन्द्रश्च शास्त्रकृद्धरिरेव च ॥ २५॥
द्विषामज्ञानपापानामतिसङ्क्रामकस्तथा ।
कर्म बन्ध सुभेत्ता च मुक्तानां स्वात्मवाहकः ॥ २६॥
वासवी हृदयानन्द वेदशास्त्र प्रणायकम् ।
वेदव्यासं गुरूपास्यं वन्देभिष्टप्रदायकम् ॥ २७॥
(न्यायामृत प्रकाशः)
इति श्रीबिदरहऌ श्रीनिवासतीर्थकृतं श्रीव्यासनामावलिस्तोत्रं सम्पूर्णम् ।
Encoded and proofread by Krishnananda Achar