श्रीशारदादेव्यष्टकम्
पादाम्भोजरजः कणैर्वसुमतीं कृत्स्नां पुनन्ती स्वकै-
र्जाता या शुभलक्षणा जनगणक्षेमाय सौम्याकृतिः ।
बङ्गान्तर्जयरामवाट्यभिहिते ग्रामे द्विजस्यान्वये
वन्दे तां खलु शारदामणिमहं श्रीरामकृष्णप्रियाम् ॥ १॥
यां मातां पथि दस्युरप्यवनतः क्रौर्यं निरस्यादवाद्
द्रागङ्गीकृतवांश्चिराय दुहितेत्याख्याय मोहात्ययात् ।
सेवाद्यैरचिरात् प्रसाद्य दयितस्थानं तथा नीतवान्
वन्दे तां खलु शारदामणिमहं श्रीरामकृष्णप्रियाम् ॥ २॥
पूर्वं कल्पितया विवाहविधये दैवेन सद्वृत्तया
बध्वा शिक्षितयात्मना स्वमनसो वाञ्छानुरूपं शनैः ।
शुद्धात्मापि पतिर्यया शुचितरो जातः कृतार्थोऽप्यहो
वन्दे तां खलु शारदामणिमहं श्रीरामकृष्णप्रियाम् ॥ ३॥
चित्रं भोः फलहारिणीतिथिरजन्यर्धे स्व सिद्धेः फलं
पूजान्ते पुरुषोत्तमेन गुरुणा यस्यै रहस्यार्पितम् ।
षोडश्यै विधिवत् त्रिलोकजननी बुद्ध्या जपाक्षस्रजा
वन्दे तां खलु शारदामणिमहं श्रीरामकृष्णप्रियाम् ॥ ४॥
यस्या नो द्विजते स्म जीवनिवहः शिष्या नरेन्द्रादयः ।
प्राप्याज्ञामपि सम्भ्रमादपि भयात् प्रीत्यान्वतिष्ठन्नपि ।
लीयन्ते रिपवः प्रणश्यति भवः शान्तिश्च सञ्जायते ।
वन्दे तां खलु शारदामणिमहं श्रीरामकृष्णप्रियाम् ॥ ५॥
सेवाप्रेम दयात्रपामति कथा यस्याः परं गीयते ।
श्रद्धाभक्तिभराज्जनैरहरहः पारेऽब्धि राष्ट्रेष्वपि ।
कारुण्यं नयनेऽभयं करतले मुक्तिश्च पादाम्बुजे ।
वन्दे तां खलु शारदामणिमहं श्रीरामकृष्णप्रियाम् ॥ ६॥
यस्यां स्नेहनिधौ प्रकामविनताः सौजन्यमुग्धान्तराः ।
साध्वीसङ्घशिरोमणौ पृथुतपो निष्ठाम्बुधौ सज्जनाः ।
स्वेषामादधति प्रसन्प्रवदनाः सर्वस्वमप्यार्तितो ।
वन्दे तां खलु शारदामणिमहं श्रीरामकृष्णप्रियाम् ॥ ७॥
मातर्मातरये ! कृपामयि ! धरोद्धारार्धमभ्यागते !
त्रायस्वेह सुताननाथपतितांस्तत्पादपद्माश्रितान् ।
सम्प्रार्थ्येति वरं क्रमादुपगताः प्राच्याः प्रतीच्याश्च यां
वन्दे तां खलु शारदामणिमहं श्री रामकृष्णप्रियाम् ॥ ८॥
श्री शारदाफुल्लपदारविन्दे लग्नो यथालिर्मकरन्दमत्तः
अत्याल्पधी-मातृकृपार्थि-दुर्गादासास्तृतोऽस्तु स्तव एष शस्तः ॥ ९॥
इति अध्यापकश्रीदुर्गादासगोस्वामीविरचितं ``श्रीश्रीशारदादेव्यष्टकम्'' सम्पूर्णम् ।
Proofread by Aruna Narayanan