श्रीरामकृष्णस्तुतिः
गुणातीतचित्तं परज्ञानवित्तं
महायोग-साक्षात्कृत-ब्रह्मतत्त्वम् ।
महिम्ना द्युलोक प्रसर्पन्महत्वं
भजे रामकृष्णं महाशुद्धसत्त्वम् ॥ १॥
वरेण्यं शरण्यं कृपाप्रावृषेण्यं
जगन्मातृहस्ताम्बुजस्पर्श धन्यम् ।
महामोहनाशाभिलाषैः प्रपन्नं
भजे रामकृष्णं समाधिप्रसन्नम् ॥ २॥
समाराध्यतन्त्रैर्महाशक्तिमन्त्रैः
समीयागताया जगन्मातुरङ्के ।
लसद्दिव्यकान्तिच्छटाभिर्विभान्तं
भजे रामकृष्णं त्रिलोक्यां महान्तम् ॥ ३॥
निरुद्धान्तरत्वादनिष्पन्दकायं
परज्योतिरुत्सादितोत्तुङ्गमायम् ।
स्थितं निर्विकल्पे समाधौ प्रशान्तं
भजे रामकृष्णं परध्यानवन्तम् ॥ ४॥
प्रशान्तं महान्तं त्रितापं हरन्तं
कृतान्तं जयन्तं गिरीशं स्मरन्तम् ।
चितब्धौ निमज्जन्तमुग्रं तपन्तं
भजे रामकृष्णं भवानीं भजन्तम् ॥ ५॥
यः कामकाञ्चनमोहमुक्तः
नित्ये परब्रह्मणि नित्ययुक्तः ।
योगीन्द्रवृन्दार्चितपादपद्मं
तं नौमिदेवं भवरोगवैद्यम् ॥ ६॥
विश्वार्तिखण्डनविभावनबद्धचेता-
स्तत्वार्थनिर्णयविधौ समिति प्रमाता ।
दृष्ट्या तृणीकृत जगद्विषयाभिलाषं
तं नौमि दुर्लभसमागममिष्ट भाषम् ॥ ७॥
यो मृण्मयीं स्वतपसा कृतचिन्मयीं तां मूर्तिं
व्यलोकयद सन्मतिभागिनेऽस्मिन् ।
पुत्रीयति प्रतिपदं जगदेकमाता यं
शाम्भवी क्षितितले मम सोऽस्तु पाता ॥ ८॥
लीलार्थमीप्सित-विशुद्ध विवाह रङ्गं
शक्त्या विधित्सितमनोजविलास भङ्गम् ।
अङ्गीकृतानधजितेन्द्रिय साधुसङ्गं
तं नौमि दुर्दमविषयेष्वसङ्गम् ॥ ९॥
अतुलितमहिमानं ब्रह्मवित्सु प्रधानं
भगवदमृतपानं तत्त्वबोधैकदानम् ।
विबुधनिकरशाश्वद्भक्ति पूजा प्रदानं
कुमति तिमिरहानं नौमि वन्द्यातिमानम् ॥ १०॥
सगुणमिति यदस्मिन् नामरूप प्रभिन्नं
पुनरपगत भेदं निर्गुणं स्यात्तदेव ।
निजविदित रहस्यं सर्वतो व्याहरन्तं
त्रिदिव वसति पूज्यं नौमि तं ज्ञानवन्तम् ॥ ११॥
वलयितविमलार्चिर्वेष्टितं निश्चलाङ्गं
शुचि ललित निजाङ्के न्यस्तहस्ताब्जयुग्मम् ।
मुकुलितकमलाक्षं पञ्चवट्यां निषण्णं
समधिगतसमाधिं नौमिदेवं प्रसन्नम् ॥ १२॥
भ्रमरवृतसरोज श्रीमुषाश्मश्रुलेन शशिसित-
रुचिभाजा भ्राजमानं मुखेन ।
जगदघनिकरान्तं वीक्षणैः कारयन्तं
पदकमलमुपेतान् नौमि नः पावयन्तम् ॥ १३॥
त्रिभुवनजनसारं सर्वविद्याविहारं
घनकुमतिविदारं ब्रह्मतत्त्व प्रचारम् ।
तमिह परमहंसं त्यागिवर्यं सदारं
क्षयितदुरितभारं नौमि दिव्यावतारम् ॥ १४॥
बीजं मुक्तितरोरनर्थभुजगीसन्दंशनिस्तारकं
धामं प्रेम रसस्य मोहदुरिता शुद्धात्मनां पावकम् ।
यत् साक्षाज्जनयेदमन्दमनसां चिच्छक्तिवृत्युद्भवं
भूयात् तच्चरणं सदैव शरणं श्रीरामकृष्णस्य नः ॥ १५॥
अन्तर्ज्योतिरवेक्षण प्रमुदिताम्भोजायमानेक्षणं
चेतोवृत्तिनिरोध निश्चलतनुं निर्बीजयोगस्थितम् ।
प्रह्लादद्युतिसुन्दरोज्ज्वलमुखं निर्वातदीपोपमं
तं वन्दे यतिराजमुन्नतकरं दण्डायमानं गुरुम् ॥ १६॥
नानातत्त्वमयं गिरा सरलया गूढार्थविज्ञापकं
प्रेष्ठं यस्य कथामृतं हृदि नृणां सन्ताप संहारकम् ।
प्रज्ञाभास्करदिव्यदीप्त महिम प्रक्रान्तदिङ्मण्डलं
तं वन्दे भगवन्तमिष्टशरणं श्री रामकृष्णाह्वयम् ॥ १७॥
सर्वैर्धर्मपथैरनन्तमहिमा लब्धव्य एकेश्वरः
यस्यैतद्वचनाशनिर्विवदतां मोहाद्रिविद्रावणम् ।
शश्वत्साधितसर्वधर्म शरणिं तत्त्वार्थिकल्पद्रुमम् ।
तं वन्दे धृतविग्रहामरवरं श्रेष्ठावतारं कलौ ॥ १८॥
नाना मार्ग प्रभिन्ना धृतगतिसरितः सागरं निर्विकारं
गत्वा प्रनष्टभेदाः परिगत समता अन्विताः स्युर्यथास्मिन् ।
तद्वयं सर्वभावा विषममतिमता ज्ञाततत्त्वैकसारं
लब्ध्वा नष्टप्रभेदास्तमिह यतिवरं रामकृष्णं प्रवन्दे ॥ १९॥
अखण्डानन्द बोधाय पूर्णाय देवतात्मने ।
नमोऽस्तु रामकृष्णाय नित्य चैतन्यरूपिणे ॥ २०॥
इति विधुभूषण भट्टाचार्य सप्ततीर्थं प्रणीता
``श्रीरामकृष्णस्तुतिः'' सम्पूर्णम् ।
Proofread by Aruna Narayanan