Shri Raghavendra Karavalambana Stotram

 श्रीराघवेन्द्रकरावलम्बनस्तोत्रम् 
श्रीधराङ्घ्रिसरोरुहे दिश दासतामनुदासतां
     तद्वधूपवनादिकेष्वनुदासतामनुदासताम् ।
राघवेन्द्र कराश्रयं तव देहि मे वर देहि मां
     राघवेन्द्र कराश्रयं दिश रक्षतां कुरु चाक्षताम् ॥ १॥

रामया हृतहृत्त्वहं न लभे सुखं न लभे सुखं
     किं करोमि हताशयश्चरितास्म्यहं मृगतृष्णया ।  हताशयश्चरिष्णुरहं
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ २॥

घातुकं मम पूर्वकर्म विभाधते प्रविबाधते
     तेन संसृतिसागरे भ्रमतो मम भ्रमतो मम ।
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ ३॥

वेद्मि किञ्चन साधनं न हि सद्गतेर्मम सद्गते
     मार्गमाशु विमुक्तिदं प्रतिदर्शय प्रतिदर्शय ।
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ ४॥

द्रावयाऽशु ममापदं नियतायतामनयाऽगतां
     अन्यथा तव भक्तदुःखहरप्रथा तु भवेद्वृथा ।
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ ५॥

यामि कं त्वदृते पितः शरणं वदाशरणः प्रभो
     पुत्रवत्सलता पितुस्तव नास्ति किं तव नास्ति किम् ।
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ ६॥

मानयस्व सुतस्य मे बहु भाषणं करुणेषणं
     वक्रवागपि बालकस्य मुदं पितुः कुरुते न किम् ।
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ ७॥

कृष्णनामयुतावधूतकृतं तव स्तवमादरात्
     यःपठेदिह तस्य तत्सुखमादिशाभयमादिश ।
राघवेन्द्र कराश्रयं तव देहि मे वरदैहि मां
     राघवेन्द्र कराश्रयं दिश रक्षतां कुरु चाक्षताम् ॥ ८॥

इति श्रीकृष्णावधूतविरचिते श्रीराघवेन्द्रतन्त्रे नवमपटले
      करावलम्बनस्तोत्रं नाम चतुर्थोऽध्यायः सम्पूर्णः ।


Proofread by Gopalakrishnan, PSA Easwaran