श्रीनृसिंहसरस्वतिस्तोत्रम्
(शार्दूलविक्रीडितवृत्तम्)
सर्वप्राणिशुभात्मकं श्रुतिनुतं दिव्यं पदं पावनं
अज्ञानान्धदृगार्तमूढजनताभास्वत्प्रदीपाननम् ।
भक्तानन्तशुभेप्सितार्थफलदं राराजमानं गुरुं
भूमानन्दचिदम्बुधिं यतिवरं वन्दे नृसिंहं शिवम् ॥ १॥
ब्रह्माविष्णुमहेशरूपममलं श्रीदत्तनामाङ्कितं
सर्वप्राणिविजीवनं निरवधिं सर्वान्तरज्योतिषम् ।
स्मृत्यादिश्रुतियुक्तिभिः परिचितं स्वानन्दसूर्यं गुरुं
भूमानन्दचिदम्बुधिं यतिवरं वन्दे नृसिंहं शिवम् ॥ २॥
संसाराम्बुधिमज्जनार्दितनरत्राणक्रियातत्परं
मायौद्धत्यविलापकामृतगिरं सर्वज्ञमीशं गुरुम् ।
मायासृष्टिविकारशून्यममलं ब्रह्माभयं शाश्वतं
भूमानन्दचिदम्बुधिं यतिवरं वन्दे नृसिंहं शिवम् ॥ ३॥
नानाचित्रचरित्रदिव्यकुसुमामोदान्न्विताङ्गप्रभुं
नानाभक्तगणालिसेवितपदद्वन्द्वाम्बुजं निर्मलम् ।
सर्वप्राणिगुहाशयं निरवधिं भक्ताब्धिचन्द्रं गुरुं
भूमानन्दचिदम्बुधिं यतिवरं वन्दे नृसिंहं शिवम् ॥ ४॥
मोक्षानन्दसुधामृतामरवपुः संन्यासिभिः संस्तुतं
बोधप्राणमुनिन्द्रसेवितपदं दत्ताभयं पावनम् ।
काषायाम्बरदण्डमण्डिततनुं वेदान्तवेद्यं गुरुं
भूमानन्दचिदम्बुधिं यतिवरं वन्दे नृसिंहं शिवम् ॥ ५॥
इति श्रीसमर्थ रामदासानुगृहीत रामपदकञ्जभृङ्गायमान
श्रीमत्परमहंस परिव्राजकाचार्य सद्गुरु भगवता
श्री श्रीधरस्वामिना विरचितं श्रीनृसिंहसरस्वतिस्तोत्रं सम्पूर्णम् ।
(रचनाकाल - दीपावली १८६७,
रचनास्थल - नरसोबाची वाडी,
श्रीधरसन्देशः कार्तिक १८८८)
Proofread by Paresh Panditrao