श्रीमातृस्तुतिः
दिव्या माता सुशुद्धा हृदयसमुदये यार्चिता वन्दनीया
मायाहीना मदघ्नी परसुखनिलया पावनी विश्वपूज्या ।
नित्या श्रीशारदा सा वितरतु विमलं सत्सुखं मुक्तहस्ता
बुद्धां विज्ञानदात्रीं जनहितनिरतां चिन्तयेत् तां हि नित्यम् ॥ १॥
माता सृष्टिलयस्थितौ सुनिपुणा काली सुशान्तिप्रदा
नित्यानन्दमयी हि या सुखकरी दुर्गा विपत्तारिणी ।
शुद्धज्ञानविधायिनी सुपथदा या शारदा मोक्षदा
ध्येया मङ्गलकारिणी सुतरणी देवी हि सा भारती ॥ २॥
तन्वा नमामि नितरां मनसा च वाचा
मातः स्मरामि तव देवि पदारविन्दम् ।
हे शारदे जननि विश्वजनस्य मातः
दूरीकुरु त्वमचिरं विपदं च दुःखम् ॥ ३॥
प्रेमामृतं तव पदं खलु चिन्तनीयं
भावास्पदं सुविमलं महिमान्वितं वै ।
ध्येयं सदा हृदि महाभयविघ्ननाशं
क्लिष्टा नरा जननि ! सुष्ठु भजन्तु सर्वे ॥ ४॥
विश्वेश्वरीं विदितविश्वमनोभिलाषां
सन्तप्तदुःखहरणक्षमभक्तिदात्रीम् ।
श्रुत्यन्तवेद्यपरमाप्रकृतिं मवेशीं
श्री शारदां नमतु ना जननीं सुशान्ताम् ॥ ५॥
वसतु वसतु नित्यं विश्वमातान्तरे मे
पिब पिब मम चित्तं स्नेहधारां जनन्याः ।
वितरतु विमलां मे शान्तिधारां सदाम्बा
विमलचरणपद्मे भातु पूता सुभक्तिः ॥ ६॥
सदा मातुर्मूर्ति विमलहृदये ध्येय चरितं
सुधापूर्णां वाणीं स्मर विपदि मातुर्हि परमाम् ।
भवाब्धौ विक्षुब्धे त्यज च कठिनं भावमसुखं
गृहाण त्वं भावं सहजसरलं शान्तिसुखदम् ॥ ७॥
शक्तिदात्रीं हि सङ्घस्य श्रीवृद्धिकारिणीं तथा ।
मातरं शारदादेवीं भगवतीं नमाम्यहम् ॥ ८॥
इति स्वामिजीवानन्दविरचिता ``श्रीश्रीमातृस्तुतिः'' समाप्ता ।
Proofread by Aruna Narayanan