गोरक्षस्तोत्रराजः
ॐ अस्य श्रीगोरक्षनाथस्तोत्रमन्त्रस्य विष्णु ऋषिः ।
अनुष्टुप् छन्दः । श्रीगोरक्ष निरञ्जनो देवता ।
विमला शक्तिः । धर्मार्थकाममोक्षार्थे जपे विनियोगः ।
आकाशमन्दिरं चैव तारारत्नैश्च मण्डितम् ।
तस्य मध्ये स्थितो नित्यं वराभयकराम्बुजः ॥ १॥
निरञ्जनो निराकारो निर्विकल्पो निरामयः ।
अगम्योऽगोचरोऽलक्ष्यो गोरक्षः सिद्धवन्दितः ॥ २॥
कौपीनी च परध्यानी तप्तकाञ्चनसन्निभः ।
ध्येयः शिवः परो देवो जटामुकुटमण्डितः ॥ ३॥
चिन्तामणिः पुमर्थानां चन्द्रार्काग्नित्रिलोचनः ।
सिद्धगन्धर्वयक्षेड्यो देवर्षिगणसेवितः ॥ ४॥
विमला वामभागे च निजा शक्तिः परात्मिका ।
एवं ध्यात्वा शिवं योगी बद्धसिद्धासनः सदा ॥ ५॥
इदं स्तोत्रं पठेन्नित्यं सर्वसिद्धिफलप्रदम् ।
श्रीगोरक्षस्तोत्रराजं दुर्लभं भुवनत्रये ॥ ६॥
देवासुरमनुष्याश्च न जानन्ति महीतले ।
सम्यग्ज्ञात्वा स्तुतो देवः सर्वकामप्रदायकः ॥ ७॥
श्रीगोरक्ष ! नमस्तुभ्यं नमस्तुभ्यं सदाशिव ! ।
सम्पूर्णाय नमस्तुभ्यं नमो लक्ष्मीप्रियाय ते ॥ ८॥
सर्वेषामेव जन्तूनां पापपुण्यविपाकदः ।
परं ब्रह्म परं धाम ! श्रीगोरक्ष ! नमोऽस्तुते ॥ ९॥
गकारो गुणसंयुक्तो रकारो रूपलक्षणः ।
क्षकारेणाक्षयं ब्रह्म श्रीगोरक्ष ! नमोऽस्तुते ॥ १०॥
ब्रह्मणां च परं ब्रह्म रुद्रादीनां शिरोमणिः ।
त्रैलोक्यं निर्मितं येन श्रीगोरक्ष ! नमोऽस्तुते ॥ ११॥
क्षमाधारी जितक्रोधः सन्तोषी विजितेन्द्रियः ।
धर्माधर्मपरित्यागी श्रीगोरक्ष ! नमोऽस्तुते ॥ १२॥
ब्रह्मचारी सदाशुद्धः कायकर्मी महातपाः ।
आशापाशो हृतो येन श्रीगोरक्ष ! नमोऽस्तुते ॥ १३॥
ज्ञानी धर्मेषु यो लीनः सत्यवादी दृढव्रतः ।
आत्मध्यानरतो नित्यं श्रीगोरक्ष ! नमोऽस्तुते ॥ १४॥
शुभाशुभविनिर्मुक्तो भावाभावविवर्जितः ।
निजभक्ते स्वयं दाता श्रीगोरक्ष ! नमोऽस्तुते ॥ १५॥
नरलोके नराधीशो नागलोके च नागराट् ।
देवलोके च देवेन्द्रः श्रीगोरक्ष ! नमोऽस्तुते ॥ १६॥
राजन्यानाञ्च यो राजा महाराजो महेश्वरः ।
महीपतिर्महीन्द्रश्च श्रीगोरक्ष ! नमोऽस्तुते ॥ १७॥
समस्तरसभोक्ता यो यः सदा भोगवर्जितः ।
सदा समरसो यश्च श्रीगोरक्ष ! नमोऽस्तुते ॥ १८॥
हठयोगविधाता च मत्स्यकीर्तिविवर्धनः ।
योगिभिर्मनसा गम्यः श्रीगोरक्ष ! नमोऽस्तुते ॥ १९॥
रेचकः पूरकश्चैव कुम्भक स्त्रोटक स्तथा ।
प्राणायामश्चतुर्धा ते श्रीगोरक्ष ! नमोऽस्तुते ॥ २०॥
ब्रह्मादिश्चैव बिष्णवादी रुद्रादिश्च सदाशिवः ।
ज्योतिर्मयोऽनवच्छिन्नः श्रीगोरक्ष ! नमोऽस्तुते ॥ २१॥
सिद्धानाञ्च महासिद्ध ऋषीणां च ऋषीश्वरः ।
योगिनाञ्चैव योगीन्द्र: श्रीगोरक्ष ! नमोऽस्तुते ॥ २२॥
पीठादीनां महापीठं शिवादीनां महाशिव: ।
मन्त्रादीनां महामन्त्रः श्रीगोरक्ष ! नमोऽस्तुते ॥ २३॥
विश्वतेजो विश्वरुपं विश्ववन्द्यः सदाशिवः ।
विश्वनामा विश्वनाथ: श्रीगोरक्ष ! नमोऽस्तुते ॥ २४॥
सर्वगुणो गुणाभावो निर्गुणश्च गुणस्थितः ।
साकारो वा निराकारः श्रीगोरक्ष ! नमोऽस्तुते ॥ २५॥
अनन्तलोकनाथश्च नाथनाथशिरोमणिः ।
सर्वनाथसमाराध्यः श्रीगोरक्ष ! नमोऽस्तुते ॥ २६॥
विश्वोत्पत्तिकरश्चैव विश्वेषां प्रतिपालकः ।
विश्वसंहारकर्ता च श्रीगोरक्ष ! नमोऽस्तुते ॥ २७॥
उत्पत्तिस्थितिसंहार कारिणे क्लेशहारिणे ।
सर्वाधारस्वरुपाय श्रीगोरक्ष ! नमोऽस्तुते ॥ २८॥
पिण्डब्रह्माण्डमध्ये च भुवनानि चतुर्दश ।
सर्वत्र व्यापको नाथः श्रीगोरक्ष ! नमोऽस्तुते ॥ २९॥
न जानामि कुलं गोत्रं वर्णावर्णविवर्जित ! ।
लक्ष्यालक्ष्यस्वरुपोऽसि श्रीगोरक्ष ! नमोऽस्तुते ॥ ३०॥
नोत्पत्तिर्न लयो नास्ते विकारो न च बन्धनम् ।
सदा समरसा बृत्तिः श्रीगोरक्ष ! नमोऽस्तुते ॥ ३१॥
न माता न पिता चैव न ते बन्धुः सहोदरः ।
अजः स्वयम्भूः सर्वात्मा श्रीगोरक्ष ! नमोऽस्तुते ॥ ३२॥
अदृश्यं दृश्यते नाथ ! अश्राव्यं श्रूयते सदा ।
त्वत्कृपालेशमात्रेण श्रीगोरक्ष ! नमोऽस्तुते ॥ ३३॥
सर्वत्र व्यापकः सूक्ष्मो जीवरुपी महेश्वरः ।
सर्वेन्द्रियमयो नाथ ! श्रीगोरक्ष ! नमोऽस्तुते ॥ ३४ ॥
चन्द्रादीनां तथा शैत्यं सूर्यादीनां त्वमुष्णता ।
सर्वसारस्वरुपोऽसि श्रीगोरक्ष ! नमोऽस्तुते ॥ ३५॥
उत्तमं मध्यमं नीचं त्वया सर्व विनिर्मितम् ।
यर्थवाग्निः सर्वरुपः श्रीगोरक्ष ! नमोऽस्तुते ॥ ३६॥
अण्डजस्वेदजोद्भिज्ज जेरजानां त्वमुद्भवः ।
अनन्तकोटिजीवानां श्रीगोरक्ष ! नमोऽस्तुते ॥ ३७॥
वायुस्त्व पञ्चरुपेण प्राणिनां देहधारकः ।
स्वयं सर्वमयो नाथः श्रीगोरक्ष ! नमोस्तुते ॥ ३८॥
शून्यानां च परं शून्यं परेषां परमेश्वरः ।
ध्यायताञ्च परंधाम श्रीगोरक्ष ! नमोऽस्तुते ॥ ३९॥
एकाकी वर्तते नित्यं भवपाशविवर्जितः ।
परं ब्रह्माक्षरं ज्योतिः श्रीगोरक्ष ! नमोऽस्तुते ॥ ४०॥
स्वर्गेषु पूज्यते दैवैर्मर्त्यलोकेषु मानवैः ।
पाताले नाथलोकैश्च श्रीगोरक्ष ! नमोऽस्तुते ॥ ४१॥
त्रिनेत्र स्त्रिपुराराति स्त्रिवेद स्त्रिजगत्पतिः ।
त्रयीवेद्य स्त्रिदेवात्मा श्रीगोरक्ष ! नमोऽस्तुते ॥ ४२॥
सिद्धाम्नायसमाम्नाता सिद्धाम्नायैकसिद्धिदः ।
सिद्धसङ्घैः सदा सेव्यः श्रीगोरक्ष ! नमोऽस्तुते ॥ ४३॥
तेजःपुञ्जः स्वयं देवो दीपो दीप्तिमतामपि ।
सर्वस्वान्तःस्थितं ज्योतिः श्रीगोरक्ष ! नमोऽस्तुते ॥ ४४॥
सर्वासां जीवजातीनां पापपुण्यैकसाक्षिणे ।
शुभाशुभफलाध्यक्ष ! श्रीगोरक्ष ! नमोऽस्तुते ॥ ४५॥
श्रीगोरक्ष स्तोत्रराजः स्वयं कृणेन निर्मितः ।
जपतां भक्तिभावेन सर्वसिद्धिविधायकः ॥ ४६॥
शिवस्तोत्रं विष्णुकृतं ब्रह्मणा पठितं पुनः ।
ये पठन्ति सदा भक्त्या ते लभन्ते समीहितम् ॥ ४७॥
इदं स्तोत्रं जपेन्नित्यं सर्वपापैः प्रमुच्यते ।
धनं पुत्रांस्तथा दाराँल्लभते नात्र संशयः ॥ ४८॥
मनसा कर्मणा वाचा स्तोत्रं यः पठते नरः ।
उद्धरेत्सप्तगोत्राणि कुलान्येकोत्तरं शतम् ॥ ४९॥
धनवाञ्जायते वंशे स्तोत्रं यस्य हृदि स्थितम् ।
जन्मजन्मकृतं पापं नाशमायाति सत्वरम् ॥ ५०॥
दर्शनं लभते साक्षाच्छ्रीनाथस्य जस्पतवम् ।
भूर्जपत्रे लिखेत्स्तोत्रमष्टगन्धेन भक्तितः ॥ ५१॥
धारयेतकण्ठमध्ये च यमलोके न पीड्यते ।
स्तोत्रराजं जपेत् प्रातः यत्स्वयं हरिणोदितम् ॥ ५२॥
गोरक्षमक्षयं देवं मनोवाचामगोचरम् ।
सिद्धनाथं सिद्धसेव्यं लभते नात्र संशयः ॥ ५३॥
इति श्रीकल्पद्रुमतन्त्रे श्रीकृष्णविरचितः
श्रीगोरक्षनाथस्तोत्रराजः सम्पूर्णः ।
Encoded and proofread by Chandrasekhar Karumuri