श्रीदत्तस्तोत्रम् ६
बालार्कप्रभमिन्द्रनीलजटिलं भस्माङ्गरागोज्वलं
शान्तं नादविलीनचित्तपवनं शार्दूलचर्माम्बरम् ।
ब्रह्मज्ञैः सनकादिभिः परिवृतं सिद्धैः समाराधितं
आत्रेयं समुपास्महे हृदि मुदा ध्येयं सदा योगिभिः ॥ १॥
दिगम्बरं भस्मविलेपिताङ्गं चक्रं त्रिशूलं डमरुं गदां च ।
पद्मासनस्थं शशिसूर्यनेत्रं दत्तात्रेयं ध्येयमभीष्टसिद्ध्यै ॥ २॥
ॐ नमः श्रीगुरुं दत्तं दत्तदेवं जगद्गुरुम् ।
निष्कलं निर्गुणं वन्दे दत्तात्रेयं नमाम्यहम् ॥ ३॥
ब्रह्म लोकेश भूतेश शङ्खचक्रगदाधरम् ।
पाणिपात्रधरं देवं दत्तात्रेयं नमाम्यहम् ॥ ४॥
सुरेशवन्दितं देवं त्रैलोक्य लोकवन्दितम् ।
हरिहरात्मकं देवं दत्तात्रेयं नमाम्यहम् ॥ ५॥
निर्मलं नीलवर्णं च सुन्दरं श्यामशोभितम् ।
सुलोचनं विशालाक्षं दत्तात्रेयं नमाम्यहम् ॥ ६॥
त्रिशूलं डमरुं मालां जटामुकुटमण्डितम् ।
मण्डितं कुण्डलं कर्णे दत्तात्रेयं नमाम्यहम् ॥ ७॥
विभूतिभूषितदेहं हारकेयूरशोभितम् ।
अनन्तप्रणवाकारं श्रीदत्तात्रेयं नमाम्यहम् ॥ ८॥
प्रसन्नवदनं देवं भुक्तिमुक्तिप्रदायकम् ।
जनार्दनं जगत्त्राणं दत्तात्रेयं नमाम्यहम् ॥ ९॥
राजराजं मिताचारं कार्तवीर्यवरप्रदम् ।
सुभद्रं भद्रकल्याणं दत्तात्रेयं नमाम्यहम् ॥ १०॥
अनसूयाप्रियकरं अत्रिपुत्रं सुरेश्वरम् ।
विख्यातयोगिनां मोक्षं दत्तात्रेयं नमाम्यहम् ॥ ११॥
दिगम्बरतनुं श्रेष्ठं ब्रह्मचर्यव्रते स्थितम् ।
हंसं हंसात्मकं नित्यं दत्तात्रेयं नमाम्यहम् ॥ १२॥
कदा योगी कदा भोगी बाललीलाविनोदकः ।
दशनैः रत्नसङ्काशैः दत्तात्रेयं नमाम्यहम् ॥ १३॥
भूतबाधा भवत्रासः ग्रहपीडा तथैव च ।
दरिद्रव्यसनध्वंसी दत्तात्रेयं नमाम्यहम् ॥ १४॥
चतुर्दश्यां बुधे वारे जन्ममार्गशिरे शुभे ।
तारकं विपुलं वन्दे दत्तात्रेयं नमाम्यहम् ॥ १५॥
रक्तोत्पलदलपादं सर्वतीर्थे समुद्भवम् ।
वन्दितं योगिभिः सर्वैः दत्तात्रेयं नमाम्यहम् ॥ १६॥
ज्ञानदाता प्रभुः साक्षाद्गतिर्मोक्षप्रदायकः ।
आत्मभूरीश्वरः कृष्णः दत्तात्रेयं नमाम्यहम् ॥ १७॥
भृगुविरचितमिदं दत्तात्रेय पारायणान्वितम् ।
साक्षाद्यद्वत्स्वयं ब्रह्मा दत्तात्रेयं नमाम्यहम् ॥ १८॥
प्राणिनां सर्वजन्तूनां कर्मपाशप्रभञ्जनम् ।
दत्तात्रेयगुरुस्तोत्रं सर्वान्कामानवाप्नुयात् ॥ १९॥
अपुत्रो लभते पुत्रं धनधान्यसमन्वितः ।
राजमान्यो भवेल्लक्ष्मीं अप्राप्यं प्राप्नुयात् नरः ॥ २०॥
त्रिसन्ध्यं जपमानस्तु दत्तात्रेयस्तुतिं सदा ।
तस्य रोगभयं नास्ति दीर्घायुर्विजयी भवेत् ॥ २१॥
कूष्माण्डडाकिनीपक्षपिशाचब्रह्मराक्षसाः ।
स्तोत्रस्य श्रुतमात्रेण गच्छन्त्यत्र न संशयः ॥ २२॥
एतद्विंशतिश्लोकानां आवृत्तिं कुरु विंशतिम् ।
तस्यावृत्तिसहस्रेण दर्शनं नात्र संशयः ॥ २३॥
इति श्रीभृगुविरचितं दत्तस्तोत्रं सम्पूर्णम् ॥
Proofread by Sunder Hattangadi