Shri Adbhutananda Stotram

श्रीअद्भुतानन्दस्तोत्रम्

निरक्षरं महाप्राज्ञं भक्तश्रेष्ठं गुणोत्तमम् । रामकृष्णप्रभोरेवं रामदत्तस्य सेवकम् ॥ १॥ अन्तर्बहिश्च पश्यन्तं भगवन्तं सदामुदा । वीक्ष्य श्रीरामकृष्णो यं दीक्षां प्रदात् स्वलीलया ॥ २॥ सेवया रामकृष्णस्य शारदाकरुणाबलात् । धर्मतत्त्वं निरीक्षन्तं हस्तामलकवच्छिवम् ॥ ३॥ तत्त्वान्युपनिषद्गानि स्वानुभूत्या विकासयन् । निर्वृत्तिं यः परां लेभे तन्नमामः सदाद्भुतम् ॥ ४॥ रामकृष्णस्य महतीं सृष्टिमद्भुतमद्भुताम् । मन्यते यं महाभक्तं विवेकानन्दरूपधृक् ॥ ५॥ एवं भक्तोत्तमं श्रेष्ठं लीलामानस विग्रहम् । अद्भुतन्त्वदद्भुतानन्दं भूयो भूयो नमाम्यहम् ॥ ६॥ जगत्यामवतीर्णस्य साधकस्य प्रियस्य च । तस्य श्री पादपद्मे नः प्रणामाः सन्तु नित्यशः ॥ ७॥ अद्भुतं चरितं नित्यं स्मरेयुर्भयविह्वलाः । तेषां सर्वं भयं यायाद् भवोद्भवभयेन च ॥ ८॥ इति अध्यापकपण्डितश्रीकुमुदरञ्जनगोस्वामीतर्कवेदान्ततीर्थविरचितं ``श्रीमदद्भुतानन्दस्तोत्रम्'' सम्पूर्णम् । प्रणाममन्त्रः- निरक्षरोऽपि सर्वं यो जानाति गुरुसेवया । नमोऽस्त्वदद्भुतपादाय पश्चिमोत्तरदेशिनः ॥ Proofread by Aruna Narayanan